Read Hmar INPÂKNA HLA BU 96 Bible Online

INPÂKNA HLA BU 96 - Hmar bible

INPÂKNA HLA BU 96

¹Aw LALPA chawimawiin hla thar sak unla. Leihnuoia um po pohai, LALPA chawimawiin hla sak ro.

²LALPA chawimawia hla sakin, a hming inpâk unla, Ni tin a sandamna thu chu inhriettir ro.

³Hnam tin lai chun a ropuizie hril unla, Mi tinrênghai lai chun a thilmak thawhai hril ro.

⁴LALPA chu a ropui a, nasataka inpâk ding a ni si a, Pathien po po nêka ṭî ding a nih.

⁵Mipuihai pathienhai chu milimhai an ni si a, LALPA ruok chun vânhai khi a siem a nih.

⁶Chawimawina le ropuina a hmaah an um a, Hrâtna le mawina chu a hmun inthiengah an um.

⁷Mi tina chi tinrênghai, LALPA kuomah pe unla, LALPA kuoma chun ropuina le hrâtna pe ro.

⁸LALPA kuomah a hming ropuina chu pe unla, Thil inhlân ding chawiin a biekin inhuonna sûng tuollaia chun hung ro.

⁹Aw, inthieng mawina[23] inbelin LALPA chu chibai bûk unla, Leihnuoia um po pohai, a hmaa chun inthin ro.

¹⁰Hnam tin lai chun, “LALPA chu lalah a ṭhung a,” ti ro, Khawvêl khawm hi ân hnîng thei nawna dingin sukdetin a um a; Ama chun thlierbîk nei lovin mi tin ro chu rêl a tih.

¹¹Vânhai khi lâwmtakin um sienla, hnuoi khawm hi hlimtakin um raw se, Tuisuoriet le a sûnga um po po hi inri hum hum sienla,

¹²Lo le a sûnga um po po hi lâwmtakin um raw se, Chu pha chun ram hnuoia thing po po hi hlimin hla sak an tih.

¹³LALPA hmaa chun ama chu a hung ding a nih, Hnuoi ro rêl dingin a hung ding a ni si a. Khawvêl hi feltakin ro rêlpêk a ta, Mi tinhai chu a thutakin ro rêlpêk bawk a tih.