Read Hmar INPÂKNA HLA BU 97 Bible Online

INPÂKNA HLA BU 97 - Hmar bible

INPÂKNA HLA BU 97

¹LALPA chu Lalah a ṭhung a, hi hnuoi hi hlimtakin um sienla, Thlierkâr tamtak takhai chu lâwmtakin um raw se.

²Sûmhai le inthim sâmup hi a vêlah a um a, Felna le rorêlna fel chu a lalṭhungpha innghatna a nih.

³A hma tieng chun mei a fe a, A vêla ama dotuhai chu a kâng hmang hlak.

⁴A kâwlinlephai chun khawvêl hi a el zawt zawt a, Hnuoi hin a hmu a ân thin a.

⁵Tlânghai chu khuoihlu ang hin LALPA hmaah an intui hmang ta a, Khawvêl po po LALPA hmaa chun.

⁶Vânhai khin a felna chu a tlânginsampui hlak a, Mi tinrêng chun a ropuizie an hmu ta a.

⁷Milim siemfâwmhai rawngbâwltuhai po po chu muolphoin um raw se, Milimhai suongtuhai chu: Nangni pathien po pohai, ama chibai bûk ro.

⁸Zion tlâng chun a hriet a, lâwmtakin a um a; Juda naunuhai chu hlimtakin an um bawk a, Aw LALPA, i rorêlnahai leiin.

⁹LALPA, nang chu hnuoi chung po poa hin a chunghnungtak i ni si a, Nang chu pathien po po chung daia chawimawiin i um a.

¹⁰Aw LALPA hmangaituhai, suol chu theida ro, Ama chun a mi inthienghai hringna chu a vawng ṭha hlak a; Anni chu mi rilohai kuta inthawkin a sanhim hlak.

¹¹Mi fel ta ding chun var hi thêpêk a ni hlak, Lungril indiktak puttu ta ding chun lâwmna thêpêk a ni bawk hlak.

¹²Mi felhai, LALPAA chun lâwmtakin um unla, A hming inthieng chu inpâk ro.