Read Hmar INPÂKNA HLA BU 98 Bible Online

INPÂKNA HLA BU 98 - Hmar bible

INPÂKNA HLA BU 98

¹Inpâkna Hla. Aw LALPA chawimawiin hla thar sak unla, Thil maktakhai a thaw ta si a; A kut changtieng le a bân inthieng chun ama ta dingin sandamna a siempêk ta a.

² LALPA chun a sandamna chu ân hriettir a, A felna chu hnam tin mithmua chun chiengtakin ân langtir tah.

³Israel sûnghai chunga a ngilneizie le, a ringumzie chu a hriet zing a, Kâwlkawdawnga mi po po khawmin ei Pathien sandamna chu an hmu tah.

⁴Leihnuoia um po pohai, LALPA chawimawiin hlimtakin khêk unla, Khêk suok unla, hlimin hla sak ro; anih, inpâkna hla sak ro.

⁵Ṭingṭang leh LALPA inpâkin hla sak ro, Ṭingṭang le inpâkna hla ri leh.

⁶Tawtawrâwthai le tawtawrâwt bi nei ri leh, Laltak, LALPA hmaa chun hlimtakin khêk ro.

⁷Tuisuoriet le a sûnga um po po hi inri hum hum raw se, Khawvêl le a sûnga chênghai le hin.

⁸Tuilienhai chun an kut ben sienla, Tlânghai chu hlimin LALPA hmaa chun hla sak tâwl rawhai se.

⁹Hnuoi ro rêl dingin a hung ding a ni si a, Khawvêl hi feltakin ro rêlpêk a ta; Thlierbîk nei lovin mi tin ro chu rêl a tih.