Read Hmar THUVARHAI 10 Bible Online

THUVARHAI 10 - Hmar bible

THUVARHAI 10

¹Solomon Thuvarhai chu. Naupa var chun pa lâwm a siem a, Naupa invêt ruok chu nu ta dingin phurrik a nih.

²Khawhlona rohai chu ienga khawm a hlâwk naw a, Felna ruok chun thinaa inthawkin a san suok.

³Mi fel hringna chu a ṭâm LALPA chun phal naw ni a, Mi khawhlo thilchâk chu a hnawt hmang.

⁴Kut zawia sinthaw chu a hung pase a, Kut taima ruok chun ama chu a sukhausa.

⁵Nipui laia la khâwmtu chu naupa var a na, Busîk huna ininnghil ruok chu naupa, inzakna intluntu chu a nih.

⁶Mi fel lu chunga chun malsâwmnahai a um a, Mi khawhlo bau ruok chu nunsietnain ân khum.

⁷Mi indik hriet zingna chu malsâwmin a um a, Mi khawhlo hming ruok chu thâm hmang a tih.

⁸Lungrila var chun thupêkhai pawm a ta, Hmûr khêlinhlip ruok chu sukhnuoi nîng a tih.

⁹Mi tluongtaka fe chu ngamtakin a fe a, A lampuihai pêtsantu ruok chu hriet nîng a tih.

¹⁰Mi a mit sêp sêp vêltu chun lungngaina ân tlungtir a, Hmûr khêlinhlip ruok chu sukhnuoi nîng a tih.

¹¹Mi fel bau chu hringna tuikhur a na, Mi khawhlo bau ruok chu nunsietnain ân khum.

¹²Theidana chun inkhingna a chawk suok a, Hmangaina ruok chun bawsietna po po ân khum hmang.

¹³Hrietthiemna neitu hmûrhaia chun varna hmu a na, Hmawl ruok chu mi hrietthiemna boa um ruongzâng ta ding a nih.

¹⁴Mi var chun hrietna a siekhâwl a, Mi invêt bau ruok chu sietna zing a nih.

¹⁵Mi hausa hausakna chu a khawpui det a na, Mi pasie suksietna ruok chu an pasietna a nih.

¹⁶Mi fel sininrimna chun hringna ân tlun a, Mi khawhlo hlâwkna chun suolna.

¹⁷Sukdikna pawisatu chu hringna lampuiah a um a nih, Kâwkna nghatsantu ruok chun a suksuol hlak.

¹⁸Hmûr khêlinhlipa theidana chu ip a; Demna thu sâksuoktu chu invêt a nih.

¹⁹Thu um khâwm ṭeu laia hin bawsietna a bo naw a; A hmûr vêngṭhatu ruok chun vartakin a thaw a nih.

²⁰Mi fel lei chu tangka ditum ang a na, Mi khawhlo lungril chu man tlâwmte a nih.

²¹Mi fel hmûrhai chun mi tamtak a châwm a, Invêt ruok chu hrietthiemna tlasamin a thi.

²²LALPA malsâwmna chun a siem hausa a, Chutaka chun[22] lungngaina a belsa nawh.

²³Khawhlona thaw hi invêt ta ding chun ruolsiekna ang a na, Chuong ang bawk chun, hrietthiemna nei mi ta dingin varna chu a nih.

²⁴Mi khawhlo ṭitna chu ama chung ngeiah hung tlung a ta, Mi fel ditna chu inhlawtlingtir nîng a tih.

²⁵Thlivir chu a fe hmang el hlak angin, mi khawhlo chu a um ta naw a, Nisienlakhawm, mi fel chu kumkhaw lungphûm ang a nih.

²⁶Uoin thûrin ha a sukṭim ang le, meikhuin mithai a sukthîp angin, Chuong ang chu a nih mi thabo chu a tirtuhai ta dingin.

²⁷LALPA ṭina chun nihai chu a suksei a, Mi khawhlo kumhai ruok chu suktâwi nîng a tih.

²⁸Mi fel beiseina chu lâwmna nîng a ta, Mi khawhlo beiseina ruok chu bohmang a tih.

²⁹LALPA lampui chu mi tluong ta ding chun kul nghettak a na, Suolna thawtuhai ta ding ruok chun bohmangna a nih.

³⁰Mi fel chu sawn hmang ni ngai naw ni a, Mi khawhlo ruok chu hnuoia hin chêng naw nih.

³¹Mi fel bau chun varna a phusuok a, Lei khêlinhlip ruok chu ât bawng nîng a tih.

³²Mi fel hmûrhai chun lâwm tlâkhai chu a hriet a, Mi khawhlo bau ruok chun khêlthu a sâk suok hlak.