Read Hmar THUVARHAI 16 Bible Online

THUVARHAI 16 - Hmar bible

THUVARHAI 16

¹Lungril siemrêlnahai chu mihriem ta a na, Leia dawnna ruok chu LALPA kuoma inthawk a nih.[28]

²Mihriem lampuihai po po chu ama mithmuahai chun ân thieng a, LALPA ruok chun lungrilhai chu ân khi hlak.

³I sinthawhai chu LALPA kuomah inkawltir la, I ngaituohai chu sukdet nîng a tih.

⁴LALPA chun thil tinrêng hi san nei sengin a siem a, Anih, mi khawhlo ngei khawm chu ni ṭha nawa dingin.

⁵Lungrila chapo taphawt chu LALPA ta dingin tirdakum a nih, Ama chu hrem naw ni naw nih.

⁶Zângaina le thutak chun khawhlona chu sâwpfai a na, LALPA ṭina leiin mihaiin suolna an zâmsan.

⁷Mi a um dânin LALPA a suklawm chun, A hmêlmahai ngei khawm ama le inrem dingin a siem.

⁸Indiklona leia hlâwkna nasatakhai nêkin, Felna leia tlâwmte chu a ṭha lem.

⁹Mihriem lungril chun a lampui chu a riruong hlak a, A kalchawihai ruok chu LALPA chun a kâwkhmu hlak.

¹⁰Lal hmûrhaia chun vân tieng thusukthlûk chu a um a, Rorêlnaah a bau chun bawse ngai naw nih.

¹¹Inkhina le bûkna indikhai chu LALPA ta a na, Ip riknahai po po khawm chu ama sinthaw a nih.

¹²Khawhlona thaw chu lalhai ta dingin tirdakum a nih, Lalṭhungpha chu felnaa tungding a ni si a.

¹³Hmûr felhai chu lalhai lâwm zâwng a na, Thudik hriltu chun an ngaina hlak.

¹⁴Lal lunginsenna chu thina thangkohai an nih; Mi var ruok chun sukdei a tih.

¹⁵Lal hmêl vara chun hringna a um a, A ditsakna chu ruo nuhnung sûm ang a nih.

¹⁶Varna nei hi rângkachak nêka ieng ang khieua ṭha lem am a na! Anih, hrietthiemna nei hi tangka nêka thlang lem ding a nih.

¹⁷Mi tluong lamtluongpui chu rîtlonaa inthawka fe hmang hi a na; Mi a lampui vêng ṭhatu chun a lungril chu a vawng ṭha.

¹⁸Chapona hi sietna hmaah a fe hlak a; Chun, lungril uong chu tlûkna hmaah.

¹⁹Mi chapohai le râllâk sum insem nêk chun, Mi inngaitlâwmhai le lungril inhnuoitaka um a ṭha lem.

²⁰Thu pawisatu chun thil ṭha hmûng a ta, LALPA ringtu chu, ama chu a hlim a nih.

²¹Lungrila var chu mi var ti nîng a ta, Hmûrhai thlumna chun thiemna chu a sukpung.

²²Hrietthiemna hi a neitu ta ding chun hringna tuihnâr a na; Invêthai inchûktirna ruok chu an invêtna a nih.

²³Mi var lungril chun ama bau ân chûktir a; A hmûrhaia chun thiemna a belsapêk hlak.

²⁴Thu lâwmumhai chu khuoithlâr ang a na, Lungril ta dingin a thlum a, ruhai ta dingin hrisêlna a nih.

²⁵Mihriem kuoma indik âwmtaka inlang lampui chu a um a, Chu tâwpna ruok chu thina lampuihai a nih.

²⁶Mi sininrim phîngṭâmna chun ama ta dingin sin a thaw a, A bau chun ama chu a tirlui si a.

²⁷Mi hmangnabo chun pawitâwkna a rawtdawk a, A hmûrhaia chun mei em kâng thei ang chu a um a nih.

²⁸Mi dukindaklo chun inhalna a thedar a , Mi lâwtthiem chun ṭhien bulhai a sukṭhe.

²⁹Mi hrângsie chun a tuolbâwm chu a vethlêm a, Lampui ṭhalova chun ama a ṭhuoi hlak.

³⁰Mithai insîmtu chun thil ṭha naw a remruot a, Hmûr inchîp tlattu chun thil suol chu ân tlungtir hlak.

³¹Lu inṭuok chu ropuina lallukhum a na, Mi fel lampuia chun hmu nîng a tih.

³²Mi lunginsen intaktak chu mi thilthawtheitak nêkin a ṭha lem a, A lungril thunun theitu chu khawpui latu nêkin a ṭha lem.

³³Ai chu mal chunga sân a ni hlak a, Thutlûkna ruok chu LALPA ta vawng a nih.