Read Hmar THUVARHAI 2 Bible Online

THUVARHAI 2 - Hmar bible

THUVARHAI 2

¹Ka naupa, ka thuhai hi i pawm a, Nangmaa ka thupêkhai hi i siekhâwl a,

²Chuonga varna tienga i na chu i sit a, Hrietthiemna tienga i lungril chu i hmang chun;

³Anih, ngairuotdikna chu i ko a, Hrietthiemna koa i râwl în suo bawk a,

⁴Tangka anga i zawng a, Ro phûm rûkhai anga i zawng suok chun;

⁵LALPA ṭitna chu hung hre tâng i ta, Pathien hrietna chu hmu suok tâng i tih.

⁶LALPA chun varna a pêk si a; A baua inthawk chun hrietna le hrietthiemna hung suok a tih.

⁷Mi tluong ta ding chun varna hrisêl chu a siekhâwl a; Lungril ṭhataka fetuhai ta ding chun phaw a nih.

⁸Rorêlna lampuihai chu a vênghim theina ding le, A mi inthienghai lampui chu a vawngṭhatna dingin.

⁹Chun, rorêlna le felna chu hung hrethiem tâng i ta, Thlierbîk nei nawna chu, anih, lampui ṭha tinrêng el le chun.

¹⁰Varna chu i lungrila chun hung lût a ta, I hringna ta ding chun hrietna chu inhawitina nîng a tih.

¹¹Ngairuot thiemna chun nangma chu vêng a ti che a, Hrietthiemna chun kawl tlat a ti che;

¹²Mi rilo lampuia inthawka sansuok ding che le, Thil khawhlohai hriltuhaia inthawka sansuok ding chein;

¹³Inthimna lampui hraw dinga, Felna lampuihai nghatsantuhaia inthawk le,

¹⁴Rîtlona thaw kawnga hlimtuhai, Mi rilo khawhlonaa lâwm hlaktuhaia inthawk le,

¹⁵An lampuihaia mi kâwihai, An lampuihai pêtsantuhaia inthawkin.

¹⁶Hmêlmak nuhmeia inthawka sansuok ding chein, A bâuthluma zaihlêmtu che, ram dang mi ngeia inthawk chun;

¹⁷A tleirâwl lai ṭhien chu nghatsan a, A Pathien thuthlung theinghiltua inthawk chun.

¹⁸A in chun thina chu ân nghâi zing a, A lampuihai chu thinaah:

¹⁹A mânu kuoma fetu chu tukhawm an hung kîr nâwk ta naw a, Hringna lampuihai khawm chu an pâw phâk ngai bawk nawh;

²⁰Mi ṭhahai lampui chu i hraw theina ding le, Mi fel lampuihai chu i hraw theina dingin.

²¹Mi tluong chu rama chun chêng a ta, Mi ṭha famkim chu a um zing ding a ni si a.

²²Nisienlakhawm, mi khawhlo chu rama inthawka sât thlâk nîng a ta, Bawsetuhai chu amaa inthawk chun zunga phawi hmangin um an tih.