Read Hmar THUVARHAI 21 Bible Online

THUVARHAI 21 - Hmar bible

THUVARHAI 21

¹Lal lungril chu tui luong ruomhai angin LALPA kuta chun a um a, Ama nuomna tieng tieng a hêm hlak.

²Mihriem lampui tin el chu ama mithmua chun ân dik a, Amiruokchu, LALPA chun lungril chu ân khi hlak a nih.

³Rorêlna le thil fel thaw hi, Inthâwina nêkin LALPA ta dingin pawmtlâk a ni lem dai.

⁴Meng insâng le lungril chapo, Mi khawhlo khâwnvar ngei khawm chu suol a nih.

⁵Mi taima ngaituonahai chun hau hnawkna a âwn a, Amiruokchu, mi tin inhmaw ta hrim hrim chu tlasam ding chaua inhmaw a nih.

⁶Lei khêlinhlip leia hausakna hmu chu, Hmatieng hnungtienga tuihu lên hmanga um ang chu a na, a zawngtuhai chun thina an zawng a nih.

⁷Mi khawhlo hrângsietna chun anni chu hrût hmang a tih, Rorêlna indik thaw an nuom naw leiin.

⁸Mi khawhlo lampui chu a kâwi hle a, Mi inthieng sinthaw ruok chu a tluong a nih.

⁹Nuhmei hrângsie le in liena um nêk chun, Inchung sîp kilkhâwra chêng chu a ṭha lem.

¹⁰Mi khawhlo lungril chun thil suol a châk a, A mithmua chun a tuolbâwm chun ditsakna hrim a hmu nawh.

¹¹Hmusittu chu hrem a ni pha chun, mi mâwl chu sukvar a na, Mi var chu inchûktir a ni pha chun, hrietna a hmu hlak.

¹²Mi fel chun mi khawhlo sûngkuo chu a ngaituo hlak a; Iengtizieha mi khawhlohai chu an sietnaa pei thlâk am an niha ti hi.

¹³Tukhawm mi pasie khêk ria a nahai suksêt chu, Ama khawm khêk ngei a ta, amiruokchu, ngai ni naw nih.

¹⁴A rûka thilthlâwnpêk hin lunginsenna a sukre a, Ângsûnga thilpêk hin lunginsenna nasatak a sukre.

¹⁵Rorêlna indik hi mi fel ta ding chun hlimum a na, Thil suol thawtuhai ta ding ruok chun sietna a nih.

¹⁶Mi hrietthiemna lampuia inthawka invâkhmang chu Mithihai inkhâwmnaa chun châwl a tih.

¹⁷Nuomsipna ngaina mi chu mi pasie nîng a ta, Uoin le hriek ngaina mi chu hausa ngai naw nih.

¹⁸Mi khawhlo chu mi fel ta dinga intlanna a na, Bawsetu chu mi tluong aiawin a hung bawk.

¹⁹Nuhmei awnazawng le hrângsie le um nêkin, Thlalêr rama um a ṭha lem.

²⁰Mi var chêngnaa chun hriek le hausakna hlutak chu a um a, Mi invêt ruok chun a lem zo hlak.

²¹Zângaina le felna hnawttu chun, Hringna, felna le inzâkaina a hmu hlak.

²²Mi var chun mi hrât khawpui chu ân khi a, Chutaka inringzona hrâtna chu a sukhnuoi hlak.

²³Tukhawm a lei le a bau vêng ṭha chun, Buoinahaia inthawkin a lungril chu a vêng ṭha a nih.

²⁴Mi chapo le mi intivei, a hming khawm 'Hmusittu' a na, Chapo uongthuongtakin thil a thaw hlak.

²⁵Mi thabo nuom zâwng chun ama a that a, A kuthai chun sinthaw inrim a nuom naw a.

²⁶Sûnnithlâk thlâk ela duâmtaka inhnar hlak chu a um a, Mi fel ruok chun a pêk a, ân ro ngai nawh.

²⁷Mi khawlo inthawina chu tirdakum a na, Lungril suola a hung lâk pha lem chun a va ni nasa âwm de!

²⁸Thuhretu indik naw chu bohmang a ta, Thuhretu indik thu ruok chu sêldawng ni naw nih.

²⁹Mi khawhlo chun a hmai a sukngar a, Mi tluong ruok chun a lampuihai a rêl fel.

³⁰LALPA kal zâwnga thurâwn amanih, Hrietthiemna amanih, varna amani khawm a um nawh.

³¹Sakawr chu indo nia ding chun buotsai a ni hlak a, Hnêna ruok chu LALPA ta a nih.