Read Hmar THUVARHAI 27 Bible Online

THUVARHAI 27 - Hmar bible

THUVARHAI 27

¹Zînga dingin[38] nang le nang insuong naw la, Ni chun ieng am a hung suokpui ding ti i hriet si naw a.

²Mi dangin inpâk lem raw se cheu, nangma hmûr ngeia inpâk ni lovin, Hmêlmak miin ni raw se, nangma hmûrhai ngeiin ni lovin.

³Lung chu a rik a, phaiphin chu a khîn a; Amiruokchu, mi invêt lunginsenna[39] chu a ieng lem lem nêk khawm chun a rik lem.

⁴Lunginsenna hi a suol a, lungawi nawna hi a phulliem a; Amiruokchu, tu am îtthîkna hmaa chun ngîr thei a ta?

⁵Phuongphotaka inkâwkna hi a ṭha lem, Hmangaina inthup nêk chun.

⁶Ruol isukhliemnahai chu ring a um a, Hmêlma fâwpnahai ruok chu ringhla a um.

⁷Mi khawp chun khuoithlâr khawm chu a tirdak a, Mi phîngṭâm ta ding ruok chun thil kha tinrêng khawm chu a thlum.

⁸Mi a hmuna inthawka invâk suok chu, Vate a bua inthawka invâk suok ang chu a nih.

⁹Hriek le riminhnik hin lungril a suklâwm ang bawkin, Lungril taka inthawka suok ruolpa thurâwn ṭha chun a suklâwm hlak,[40]

¹⁰Nangma ruol ngei ngei le, i pa ruolpa chu nghatsan naw, I lunginzîng nia chun i unaupa ina chun fe bawk naw rawh. Unau inhlatpui tak nêkin, tuolbâwm inhnaipui tak chu a ṭha lem.

¹¹Ka naupa, var la, ka lungril suklâwm ta, Keima mi kâwktu chu ka dawn theina dingin.

¹²Mi var chun thil ṭha naw chu a hmu a, ân bihmang hlak a, Mi mâwl ruok chu a fe pei a, a tuor pha hlak.

¹³Hmêlmak mi ta dingin a aiawtu silfên la la, Nuhmei hmêlmak mi ta dinga mawphurtua insiem chu aiawah chel rawh.

¹⁴Zîngkâra tho a, a ruolpa ta dinga râwl inringtaka malsâwmtu chu, Ama ta ding chun ṭawngsiea ngai nîng a tih.

¹⁵Ruo chîng nia ruomal tla zing le, Nuhmei hrângsie chu angkhat an nih.

¹⁶Tukhawm amanu thuptu chu thli thup a na, A kut changtiengin hriek ân suolpui a nih.[41]

¹⁷Thîr chu thîr bawkin a sukngei a; Chuong ang bawk chun mi chun a ruolpa hmêl chu a sukngei.

¹⁸Tukhawm theichang kûng enkawl chun, chutaka a ra chu fâng a ta, A hotu lo nghâk zingtu chu chawimawi ni bawk a tih.

¹⁹Tui sûnga hmaiin hmai a hawi angin, Mihriem lungril chu mihriem bawkah ân lang a.

²⁰Seol le Abaddon chu an khawp ngai naw a, Mihriem mithai khawm chu an lungawi ngai nawh.

²¹Rawtuina bêl chu tangkaruo ta ding a na, pûm mei chu rângkachak ta ding, Chun, mihriem chu a înpâk nuom zâwngah fie a nih.

²²Bu lai fahrelin sumah invêt chu suk rak la khawm, Ân vêtna chu amaa inthawk chun inkieng chuong naw nih.

²³I ranruolhai umdân hre dingin taima hle la, I bâwngruolhai chu en ṭha rawh.

²⁴Hausaknahai hi kumkhuoa ding a ni naw a, Lallukhum khawm hin suon po po chu a dai hlak am a nih?

²⁵Bupâwl chu lâk a na, hlohna thar innêmhai chu an hung inlang a, Chun, tlânghaia thlaihnahai khawm chu lâk khâwm an nih.

²⁶Berâmhai chu i silfên ding an na, Kêlhai chu lo man ding an nih.

²⁷Buha i ring khawp kêl nênetui um a ta, i in sûnga buha ring dingin, I nunghâkhai châwmna ding leh.