Read Hmar THUVARHAI 28 Bible Online

THUVARHAI 28 - Hmar bible

THUVARHAI 28

¹Mi suol chu tukhawm ihnawt naw khawmin a tlânsie a, Mi felhai ruok chu sakeibaknei angin an huoi.

²Ramin a bawsiet pha chu rorêltu tamtak a hung nei hlak a, Nisienlakhawm, hrietna le hrietthiemna nei mihai lei chun ram chu ngirsuok a tih.

³Mi tlasam mi pasie nêksâwrtu chu, Ruo pheisûr bu hla lo ang chu a nih.

⁴Dân mâksantuhai chun mi rilo chu an inpâk a, Dân vawngtuhai chu anni leh an inkhing.

⁵Mi suol chun rorêlna chu a hrietthiem naw a, LALPA zawngtuhai ruok chun thil po po an hrietthiem.

⁶Mi pasie lungril ṭha put chu Hausa khawhlotaka um nêk chun a ṭha lem.

⁷Tukhawm dân vawngtu chu naupa var a nih, Mi hnukinrâwl inruolpuitu ruok chun a pa a sukzak.

⁸Sum duâmna le hlâwkna dinga a thuomhnaw sukpungtu chun, Mi pase chunga lunginsietna neitu ta dingin a khâwlkhâwm a nih.

⁹Dân chu ngai dinga a na sit nawtu chu, A ṭawngṭâina khawm chu tirdakum a nih.

¹⁰Tukhawm mi tluong suolna lampuia infe pêttirtu taphawt chu, Ama khur ngeia chun tlâng a tih, Mi fel ruok chun thilṭha ro chu hluong a tih.

¹¹Mi hausa chu ama ngairuotna ngeia chun a var a, Mi pasie hrietthiemna neitu ruok chun ama chu a zawng suok hlak.

¹²Mi fel chu a hlawtling pha chun, chawimawina nasatak a um hlak a, Mi khawhlo chu a tho ve pha ruok chun mi an inbihmang hlak.

¹³Mi a bawsietna inkhumtu chu hlawtling naw ni a, Thupha chawia, nghatsan hlaktu ruok chun zângaina hmûng a tih.

¹⁴LALPA ṭi zing zinga um hlak mi chu a lâwm a, A lungril sukngartu ruok chu lungngainaah tla lût a tih.

¹⁵Rorêltu suol chu mi pase chunga chun, Sakeibaknei inrûm hlak le savawm inhûk hlak ang hi a nih.

¹⁶Lal naupa hrietthiemna tlasam hi nêksâwrtu nasatak a na, Hlâwkna indiklo theidatu ruok chun a nihai suksei a tih.

¹⁷Mi tukhawm mi dang hrim hrim thisena suksipa um chu Khur tieng chun tlân hmang a ta, tukhawma chel naw raw se.

¹⁸Tukhawm tluongtaka fe mi chu sanhim nîng an ta, A lampuihaia pêthmangtu ruok chu, kârlovin tlu nghâl a tih.

¹⁹Ama ram inlettu chun bu tamtak nei a ta, Mi teplo mei meihai zuitu ruok chun, pasietna a huntâwk zet nei a tih.

²⁰Mi ringum chun malsâwmnahai a hau a, Mi hausa dinga hmawsaruma thilthaw ruok chu hrem lo ni naw nih.

²¹Mihai thlierbîkna nei hi a ṭha naw a, Bei hlek lei mei meiin min a bawsiet bawk ding a ni nawh.

²²Mit rilo neitu chun hausaknahai a bawin a baw a, Tlâksamna a chungah a hung tlung ding a nih ti a hriet nawh.

²³Leia mi inpâkdertu nêk chun. Mi kâwktu chun a hnungah ditsakna tam lem hmûng a tih.

²⁴Tukhawm a nu amanih, a pa amani inrupêk a, “Bawsietna a ni nawh,” titu chu, Chu mi chu suksetu ruolpa chu a nih.

²⁵Lungrila huomhap mi chun inkhingna a chawktho a; LALPA chunga a ringna innghattu ruok chu sukthâu nîng a tih.

²⁶Mi mâni lungril ngawt ringtu chu invêt a nih, Tukhawm vartaka fetu ruok chu, ama chu sanhim nîng a tih.

²⁷Mi pase kuoma petu chu tlasam ngai naw ni a, A mithai insimsan el hlaktu ruok chun ṭawngsie tamtak phur a tih.

²⁸Mi khawhlo chu a tho ve pha khawm, mi an inbihmang hlak a, Amiruokchu, an bohmang chun, mi fel chu an pung hlak.