Read Hmar THUVARHAI 29 Bible Online

THUVARHAI 29 - Hmar bible

THUVARHAI 29

¹Kâwka um rawpa, rîng sukngar hlak chu, Kârlovin se dar a ta, sukdam nâwkna um naw nih.

²Mi felhai chu an hung hlâwk pha chun mihaiin an lâwmpui a, Mi khawhloin, rorêlna chu a phur pha ruok chun mihai chu an kahâk.

³Varna hmangaitu chu a pa chunga chun a hlim a, Nawchizawr le inpâwlna neitu ruok chun a thuomhnaw a sukthâmral hlak.

⁴Lal chun rorêlna felin ram chu a tungding a, Amiruokchu, thilthlâwnpêkhai[42] dawngtu chun a suksiet.

⁵Mi a tuolbâwm inpâkdertu chun, A[43] kalchawihai ta dingin lên a pha a nih.

⁶Mi suol bawsietnaa hin châng a um a, Mi fel ruok chun hla a sak a, a hlim hlak.

⁷Mi fel chun mi pasie chungthu chu a hrietpui hlak a, Mi khawhlo chun hre dingin hrietthiemna a nei nawh.

⁸Mi hmusittuhai chun khawpui chu meiin an raw a, Mi varhai ruok chun lunginsenna an hnawt hmang.

⁹Mi varin mi invêt ân khingpui chun, A lunginsenin amanih, ân nuiin amani khawm, sâwldam um naw nih.

¹⁰Mi feltak chu thisen insuo inhâwk mi chun a theida a, Mi tluong ruok chun a hringna ding a zawng.

¹¹Mi invêt chun a lunginsenna thu po po a sâksuok hlak a, Mi var ruok chun a kawl tlat a, a sukdei hlak.

¹²Rorêltuin thil indik naw thu a ngai chun, A siehlawhai po po chu an rilo hlak.

¹³Mi pasie le nêksâwrtu chu an intuok a, LALPA chun anni mithai ve ve chu a sukvar a.

¹⁴Lal, mi pasiehai ringumtaka ro rêlpêk hlaktu chu, A lalṭhungpha chu kumkhuoin tungding nîng a tih.

¹⁵Hmawl le kâwkna hin varna a pêk a, Amiruokchu, naupang a khâta mâksan el hin a nu chu a sukzak hlak.

¹⁶Mi khawhlohai chu an hlâwk pha chun, bawsietna khawm a pung hlak, Mi fel ruok chun an tlûkna chu hmûng an tih.

¹⁷I naupa chu sukdik la, sâwldamna pêng a ti che, Anih, i lungrila chun lâwmna pêng a ti che.

¹⁸Hmulâwkna um nawna hmuna chun mihai an bohmang hlak a, Dân vawng ṭhatu ruok chu a hlim a nih.

¹⁹Siehlaw chu thu ngawt chun siem ṭhat ni naw ni a, Hrethiem sien khawm a pawisa âwm si naw a.

²⁰A thuhaia inhmaw mi i hmu hlak am? Ama nêk chun mi invêta khawm beiseina a tam lem a nih.

²¹Naupanga inthawka indawitaka a siehlaw sukpuitlingtu chun, A tâwpa chun naupa[44] hung innitir a tih.

²²Mi lunginsen chun inkhingna a chawktho a, Mi lungsen hmang chu bawsietnain a sip a nih.

²³Mi chu a chapona chun ama chu sukhnuoi a ta, Lungrila inngaitlâwm ruok chun chawimawina hmûng a tih.

²⁴Rûkru inṭâwmpuina neitu chun ama lungril ngei khawm a theida hlak a, Ṭawngsie inphurna ri chu a hriet hlak a chu iengkhawm a sâksuok ngai nawh.

²⁵Mihriem ṭîna hin châng a hung siem a, LALPAA a ringna innghattu ruok chu him a tih.

²⁶Mi tamtakin rorêltu ditsakna chu an zawng hlak a, Amiruokchu, mihriem rorêlna chu LALPAA inthawka hung a nih.

²⁷Mi indik naw chu mi fel ta dingin tirdakum a ni a, Mi tluong chu mi khawhlo ta dingin tirdakum a ni ve thung.