Read Hmar THUVARHAI 31 Bible Online

THUVARHAI 31 - Hmar bible

THUVARHAI 31

¹Lal Lemuel thuhai chu; thuvar a nuin ama a inchûktir chu.

²Ieng am, ka naupa? Ieng am, ka sul ra ka naupa? Ieng am, ka thutiemhai naupa?

³Nuhmeihai kuoma chun i hrâtna pe naw la, Lalhai sukbohmang hlaktu kuoma chun i lampuihai pe bawk naw rawh.

⁴Aw Lemuel, uoin dâwn hi lalhai ta ding a ni naw a, lalhai ta ding a ni nawh; Lal naupahai[48] khawm chun, “Zu khâw lai am a um a”? ti ding an ni nawh.

⁵Inrui hlau an ta, dân chu theinghil an ta, Suknawmnata um tukhawm ta dinga rorêlna chu her kâwi hlau an tih.

⁶Bohmang el dinga inzosa zing kuoma chun zu chu pe la, Lungrila rimsi kuoma chun uoin chu pe rawh.

⁷Indâwntir la, a tlâksamna chu theinghil raw se, A pasietna chu hre zing bawk ta naw raw se.

⁸Ṭawngtheilo ta ding chun i bau ka la, Chuong ang po po chungthua chun rausana mâksan an nih.

⁹I bau chu ka la, feltakin ro chu rêl la, Chun, tlasamhai le pasiehai ta ding chun rorêlna rawng chu bâwl rawh.

¹⁰Nuhmei ringum chu tuin am hmu thei a ta? A hlutna chu lung mantamhai nêkin ân sâng dai si a.

¹¹A pasal lungril chun ama chu a ring a, Hlâwkna tlâksamna hrim hrim nei naw nih.

¹²Amanu chun a dam sûng nihaia po po chun, Ama chu a thaw ṭhah a, a sukṭha naw ngai nawh.

¹³Pat le sahmul dâm chu a zawng a, A kuthai chun thafântakin sin a thaw hlak.

¹⁴Amanu chu sumdâwng mi lawnghai ang a na, Hlataka inthawkin a bu chu a hung lâk hlak.

¹⁵Zân a lân thim lai khawmin a tho a, A sûngkuohai ta ding chun bu a pêk hlak a, A siehlawnuhai ta dingin an chanpuol chu a pêk hlak.

¹⁶Lo chu a ngaituo a, ân châwk a. A kuthai rasuok chun an grêphrui[49] a phun a.

¹⁷Hrâtnain a kâwng chu a hrên a, A kuthai chu a sukhrât a.

¹⁸A sumdâwngna chu a hlâwk a nih ti chu a hmu a, A khâwnvar chu zâna khawm chun a thi ngai nawh.

¹⁹A kuthai chu sûthlâmah ân nghat a, A kuthai chun hmuithal chu a chel a.

²⁰Mi pasiehai tienga chun a kut chu a phar a; Anih, mi tlasamhai chu a kuthai chu ân tlungtir hlak.

²¹A insûng ta ding chun vûr chu a ṭi naw a, A insûng sûngkuohai po po chu sen inlâra inthuom an ni si a.

²²Ama ta ding chun puon kawp ta ṭiel ṭhungphahai a siem a, A silfên chu puon zai inhmi kawp dumpâwl a nih.

²³Daikawtkhârhaia chun a pasal chu hriet a na, Ram upahai laia a ṭhung lai khawm chun.

²⁴Puon zai inhmi silfênhai a siem a, a zawr a, Dâwrkaihai kuoma chun kâwngkhihai a pêk a.

²⁵Hrâtna le inzaumna chu a silfên an na, Hun la hung tlunga ding khawm chun ân nui a.

²⁶Varna leh a bau chu a ka a; Lunginsietna inchûktirna chu a leia chun a um a.

²⁷A insûng ta dinga lampuihai chu ṭhatakin a en a, Thabona bei hrim hrim chu a fâk ngai nawh.

²⁸A nauhai chu an tho a, ama chu vângnei an ta, A pasal khawm chun, ama chu ân pâk a;

²⁹“Naunuhmei tamtakhai chun ringumtakin an thaw ta a; Amiruokchu, nang chun an rêngin i khûm vawng a,” tiin.

³⁰Ditsakna hi hmusitum a na, mawina khawm hi teplo mei mei a nih, Amiruokchu, nuhmei LALPA ṭitu chu, ama chu inpâkin um a tih.

³¹A kuthai rasuok chu ama chu pe la, Dâikawtkhârhaia chun a sinthawhai chun ama chu inpâk raw se.