Read Hmar THUVARHAI 4 Bible Online

THUVARHAI 4 - Hmar bible

THUVARHAI 4

¹Ka naupasalhai, pa inchûktirna hi lo ngai unla, Hrietthiemna hre dingin ngaisak ro.

²Thuinchûktir ṭha chu ka pêk si cheu a, Ka inchûktirna hi nghatsan naw ro.

³Ka pa ta dingin naupasal ka na, Ka nu mithmua chun duotum le dittak ka ni ngâwk a.

⁴Chun, a mîn chûktir a, ka kuomah a hril a, “Ka thuhai hi i lungril invawngtir zing la; Ka thupêkhai hi vawng la, hring rawh;

⁵Varna hung nei la, hrietthiemna khawm hung nei rawh, Theinghil hlek naw la, ka baua suok thuhaia inthawkin intâwl hmang bawk naw rawh;

⁶Ama chu nghatsan naw la, vawngṭhâng a ti che a, Ama chu hmangai la, vêng a ti che.

⁷Varna chu thil bulpui tak a na, chuleiin, varna nei rawh; Anih, i nei tasahai po poa chun hrietthiemna nei rawh.

⁸Ama chu chawimawi[10] la, ama chun inkaisângtir a ti che, Ama i pawm chun inzaumtakin siem a ti che.

⁹I lua dingin zângaina lukhum pêng a ti che a, Mawina lallukhum pêng a ti che,” tiin.

¹⁰Aw ka naupa, ngai la, ka thuhrilhai hi lo pawm la, I dam sûng kumhai chu tamtak hung nîng a tih.

¹¹Varna lampuia chun kân chûktir ta che a; Felna lampuihaia chun ka ṭhuoi ta che a nih.

¹²I fe pha chun, i kalchawihai chu zâng a ta; Chun, i tlân khawmin, insui naw ti nih.

¹³Inchûktirna chu cheldet tlat la, infetir dêr naw rawh; Kawl tlat rawh, ama chu i hringna a ni si a.

¹⁴Mi khawhlo lampuia chun lût naw la, Mi rilohai lampui chu hraw naw rawh.

¹⁵Pumpel la, achun fe dêr naw; Chutaka inthawk chun inherhmang la, fe pei rawh.

¹⁶Thil pawi an thaw zet naw chun an in ngai si naw a; Mi ṭhenkhat bêk an sukthlûk naw chun, an îmu chu lâk hmang a ni hlak.

¹⁷Khawhlona bei chu an fâkin, Nunrâwngna uoin chu an dâwn hlak si a.

¹⁸Mi fel lampui ruok chu zîng khawvar ang a na, Sûn chang lai chena var deu deu ang chu.

¹⁹Mi khawhlohai lampui chu inthimna ang a na, Ieng âm an insui ti khawm an hriet nawh.

²⁰Ka naupa, ka thuhai hi pawisa la, Ka thuhrilhai tieng hin i na chu sit rawh.

²¹I mithmua inthawk infe hmangtir naw la, I lungril sûng taka chun kawl tlat rawh.

²²A hmutuhai ta dingin hringna an na, An taksa ta dingin hrisêlna an ni si a.

²³Fîmkhur thei tâwpin i lungril chu vêng ṭha rawh, Chutaka inthawk chun hringna rasuokhai chu a um si a.

²⁴Ṭawng ki nei hrim chîng naw la, Khêl hril chu bân dai rawh.

²⁵I mithai chun hmatieng chau en sienla, I khaw nghat chun i hmatieng thlîr tlat raw se.

²⁶Ngaiven dêkin i kal chawi la, I lampui chu sukdet ni raw se.

²⁷Changtieng khawm, vawitieng khawm pêt naw la, Suola inthawk i ke her hmang rawh.