Read Hmar THUVARHAI 6 Bible Online

THUVARHAI 6 - Hmar bible

THUVARHAI 6

¹Ka naupa, i tuolbâwm ta dinga aiawtu i ni a, Hmêlmak mi ta dinga i kuthai i ben chun,

²I baua thuhai ngei chun âwk i na; I baua thuhai ngei chun man i ni tah.

³Tuhin hi hi thaw la, ka naupa, nangma le nangma chu insansuok rawh, I tuolbâwm kuta chun i lût a ni ta si a; Fe la, nang le nang chu insukhnuoi la, i tuolbâwm chu ngên rawh.

⁴I mithai chu inna inhmutir naw la, I mitkhohai chu ininnghiltir bawk naw rawh.

⁵Ramsuoktu kuta sakhi a suok angin le, Vate vêtua inthawka vate a suok ang elin, Nang le nangma chu insansuok rawh.

⁶Nang thabo, phaivâng kuomah fe la, A lampuihai ngaituo la, var rawh.

⁷Chu chun lal a nei naw a, Enkawltu amanih, rorêltu amani khawm a nei nawh.

⁸Nipui lai a bu a siekhwl a, Busîk hunah a bu a lâk khâwm hlak.

⁹Aw thabo, ieng chen am i zâl ding a na? I zâlnaa inthawkin iengtik âm i tho ding a na?

¹⁰Zâl dep bêk, in dep bêk, Zâla kuthai hang thlep dep bêk.

¹¹Chuongchun, inru angin i pasietna chu hung a ta, I tlâksamna chu mi râlthuoma inthuom angin hung a tih.

¹²Mi hmangna bo, mi khawhlo, Bau chapotakin a lêng a.

¹³A mithai a sêp a, a kehaiin thu a hril a, A kuthaiin inchiknahai ân chûktir a.[14]

¹⁴A lungrila chun kâwmâwna a um a, thilsuol a rawt suok rawp a, Indarna a tu hlak.

¹⁵Chu huna chun sietna hung tlung thut a ta, Mitkhap kâr lovin, siemṭhat ruollo sietna tlung a tih.

¹⁶Thil paruk LALPAIN a theidahai chu a um a, Anih, pasari, chuong chu ama ta dingin tirdakum an nih;

¹⁷Mit mengsânghai, lei khêlhlip, Pawitâwklo thisen insuoktir hlak kuthai le chun,

¹⁸Ngaituona suol ngairuot hlak lungril le, Pawi tâwk dinga ke tlân hrât hlakhai leh;

¹⁹Hrietpuitu indiklo khêlthu sâksuok hlaktu, Unauhai laia indarna tu hlaktu le chun.

²⁰Ka naupa, i pa thupêk hi kawl tlat la, I nu inchûktirna hi nghatsan bawk naw rawh.

²¹I lungrila chun khuopde tlat zing la, I rîng vêla chun zem tlat rawh.

²²I fe pha chun nang chu ṭhuoi a ti che a; I in pha chun nang chu vêng a ti che a; Chun, i hung meng pha khawm chun inbiekpui a ti che.

²³Thupêk chu khâwnvar a na, inchûktirna chu var a ni si a; Inchûktirna thununnahai chu hringna lampui a nih;

²⁴Nuhmei rilova inthawka hum ding chein le, Hmêlmak baua inpâk tehlêmnaa inthawka vêng ding chein.

²⁵I lungrila chun a mawina chu châk naw la, A mitsîrhai chun nang chu kuoi bawk naw raw se che.

²⁶Nuhmei hur lei hin pasal chu bei hlekah siem a ni hlak a nih, Chun, uirenu chun hringna hlu chu a pêlin a pêl hlak.

²⁷Miin a kalakah a puonhai kâng lovin, Mei a chepdê thei am a nih?

²⁸Annawleh, mi a ke kâng lovin, Meiling chungah a lâwn thei am a nih?

²⁹Mi a tuolbâwm nuhmei kuoma lût chu chuong ang bawk chu a na; Amanu va tâwk taphawt chu hrem naw ni naw nih.

³⁰Rûkru a phîngṭâm laiin ân sukkhawpna dinga ân rûk chun mihaiin an hmusit[15] ngai naw a.

³¹Amiruokchu ama chu hmu suok a ni chun a lêt sariin thung a ta; A ina thuomhnaw po po chu pe vawng a tih.

³²Nuhmei le uiretna thil thawtu chu lungril bo a na, Ama lungril ngei sukse dingin thil a thaw a nih.

³³Inhliemna le hmaimâwkna hmûng a ta, A hmaimâwkna chu hrûk hmang ni naw nih.

³⁴Itthîkna hi mihriem lungsenna a na, Phubalâk ni chun hla naw nih.

³⁵Intlanna hrim hrim ngaisak naw ni a, Thilpêk tamtakhai chu pe la khawm, lungawi el chuong naw nih.