Read Hmar THUVARHAI 8 Bible Online

THUVARHAI 8 - Hmar bible

THUVARHAI 8

¹Varna chu a khêkin, Hrietthiemna chun a râwl ân suo a ni naw am a nih?

²Lampui sîra hmun insânghaia chun, Lampui ṭhuom laihaia chun a ngîr a;

³Khawpui lûtnaa, dâikawtkhâr sîrahai, Kawtkhâr lûtnaahai chun a khêk rak rak a;

⁴“In kuomah, aw mihriemhai, ka khêk a, Ka râwl chu mihriem naupahai kuomah kân suo a nih.

⁵Aw nang mi mâwl, varna hung hrethiem ta la, Chun, nangni invêthai, hrietthiemna lungril hung nei ro.

⁶Ngai ta u, thil ṭha bîkhai ka hril ding a ni si a, Ka hmûrhai kâkna chu thil indik a ni ding a nih.

⁷Ka bau chun thudik sâksuok a ta, Khawhlona chu ka hmûrhai ta dingin tirdakum a ni si a.

⁸Ka baua thu po pohai chu felna a na, Annia chun a kâwi amanih, a khêl amani khawm a um nawh.

⁹A hrethiemtu ta ding chun a fie vawng a, Hrietna hmu suoktuhai ta ding chun ân dik vawng bawk a nih.

¹⁰Tangka ni lovin, ka inchûktirna hi lo pawm ro, Rangkachak ditumtak nêkin hrietna chu lo chang bawk unla.

¹¹Lunghluhai nêkin varna chu a ṭha lem si a; Thil po po dit thei taphawthai chu ama le hrilkhi ding a um nawh.

¹²Kei varna hin varna chu ka chêngnaah ka hmang a, Hrietna le ngairuotthiemna chu ka hmu suok a.

¹³LALPA ṭi chu suolna theidana ding a na, Chapona le, insuklienna le rîtlona kawng leh, Bau chapo hi ka theida a nih.

¹⁴Thurâwnna chu ka ta a na, hrietna hrisêl leh, Hrethiemin ka um a, thilthawtheina ka nei a nih.

¹⁵Lalhaiin keimain ro an rêl a, Lal nauhai chun keimain rorêl dik chu an sukthlûk bawk a.

¹⁶Rorêltuhai chun keimain ro an rêl a, Mi ṭhahai le, hnuoi chunga rorêltuhai po po chun.

¹⁷A mi hmangaituhai chu ka hmangai ve a, Chun, nguntaka a mi zawngtuhai chun mi hmu suok bawk an tih.

¹⁸Hausakna le inzâkaina chu ka kuomah a um a, Hausaknahai le felna tlotak el chu.

¹⁹Ka ra chu rângkachak nêkin, anih, rângkachak inthieng nêkin a ṭha lem a, Ka pungna khawm chu tangka ditumtak nêkin a ṭha lem.

²⁰Felna lampuia chun ka fe a, Rorêlna lampuitakhaia chun.

²¹Kei a mi hmangaituhai chu thil nei dinga ka siem theina ding le, An sum inhai chu ka suksip theina dingin.

²²LALPA chun a lampui inṭanna angin a mi siem a, Inhmata a sinthawhai hmasatak angin.

²³Atîra inthawk, chatuona indinin ka um a, Hnuoi hrim la um hmain.

²⁴Tuipuihai a um naw laiin lâk suokin ka um a, Tuikhurhai tuia sipa umhai um naw lai chun.

²⁵Tlânghai siemrêl an ni hmain, Muolhai hma daiin, lâk suok ka ni ta a;

²⁶Ramhai le hnuoi a la siem naw lai le, Khawvêl pilvut inṭan hma dai bawk chun.

²⁷Vânhai chu a buotsai lai chun, chutaka chun ka um a, Tuipui chung inkuol a siem lai chun;

²⁸Vâna sûmhai a siem laiin, Tuipui tuikhurhai chu a sukdet lai chun.

²⁹Chuong lai chun tuipui ta dingin tiemchin a pêk a, Tuihai chun a thupêk chu an bawsiet nawna dingin, Leihnuoi lungphûmhai chu a ruot lai chun:

³⁰Chuong lai chun amaa chun sinthaw hotu[19] ang ka lo ni tah a; Chun, ama hmaa chun hlima um rawpin, Ni tina a lâwmna chu ka lo ni ta a.

³¹A leihnuoi chêng theinaa chun hlima umin, Ka lâwmna chu mihriem naupahai chungah a ni ta a.

³²Chuleiin, tuhin, ka naupasalhai mi lo ngai unla, Ka lampui hrawtuhai chu mi hamṭha an ni si a.

³³Inchûktirna chu ngai unla, var unla, Dit naw hrim hrim naw ro.

³⁴Ka thu hretu chu mi hamṭha a nih, Ka dâikawtkhâra ni tina nghâktu, Ka kawtkhâr bienga nghâk zingtu chu.

³⁵Tukhawm a mi hmu suoktu chun hringna chu a hmu suok a, LALPA ditsakna chu chang a tih.

³⁶Amiruokchu, ka chunga suksuol chun ama lungril ngei a sukkhawhlo a, Kei a mi theidatuhai po po chun thina an hmangai a nih.”