Read Hmar THUHRILTU 3 Bible Online

THUHRILTU 3 - Hmar bible

THUHRILTU 3

¹Vân hnuoia hin thiltum tinrêng ta dingin hun a um a, thil tinrêng ta dingin hunbi a um:

²Pieng hun a um a, thi hun a um a; Phun hun a um a, phunsahai phâwi hun a um bawk a;

³Sukhlum hun le sukdam hun a um a, Ṭhiek hun le bâwl hun a um a;

⁴Ṭap hun le innui hun a um a, Sûnna hun le lâm hun a um a;

⁵Lung peihâwn hun le lung lâk khâwm hun a um a, Pawm hun le pawmnaa inthawk insûm hun a um a;

⁶Zawng hun le inhmang hun a um a, Vawng hun le peihâwn hun a um a;

⁷Keithlêr hun le ṭhui hun a um a, To ṭawk ṭawk hun le thu hril hun a um a;

⁸Hmangai hun le theida hun a um a, Indo hun le inrem hun a um a;

⁹Sinthawtu chun a sininrimnaah ieng hlâwkna am a hmu a?

¹⁰Chutaka an buoipui ngei ding mihriem nauhai kuoma chun Pathien chun sin dinga a pêk chu ka hmu a.

¹¹Thil tinrêng chu mâni hun senga mawi dingin a siem a; a bula inthawka a tâwp chena Pathienin sin a thaw chu mihriemin a hriet suok thei nawna dingin, an lungrilah khawvêl chu a ruotdet bawk a.

¹²An dam sûng poa thil ṭha thawa hlima um nêka an ta dinga ṭha lem iengkhawm a um nawh ti ka hriet a.

¹³Chun, mi tinin a sinthaw inrimna po poa thil ṭha a chêna, a dâwna a fâk chu Pathien thilthlâwnpêk a nih.

¹⁴Pathienin a thaw taphawt kumkhuoa ding a nih ti ka hriet a; chutaka chun iengkhawm belsa thei ni naw ni a, iengkhawm lâkṭhe thei ni naw nih; Ama hmaa mihriemhai chu an ṭit theina dingin Pathien chun a thaw tah a nih.

¹⁵Thil hung umhai chu um ta hnung dai kha a na, la hung ding khawm chu ni ta hnung dai kha a nih: thil fe liem ta hnung kha Pathien chun a hung lâk kîr nâwk pei a nih.

¹⁶Chu nawa khawm chun nisa hnuoia hin, rorêlna umnaa chun, rîtlona khawm a um a; felna umna hmuna chun rîtlona khawm a um ka hmu a.

¹⁷Ka lungril chun, “Pathien chun mi fel le rilo chunga chun ro rêl a tih; sin tinrêng le thiltum tinrênga dingin hun a um si a,” ka ti a.

¹⁸Ka lungril ma chun, “Mihriem nauhai lei a ni hi; Pathien chun anni chu a fie theina ding le, anni khawma ramsahai ang chau an nih ti an hrietsuok theina dingin,” ka ti a.

¹⁹Chu thil mihriem nauhai chunga tlung chu ramsahai chunga khawm a tlung si a; pakhat a thi angin a dang khawm chu an thi a. Thuok angkhat nei seng an ni a, mihriem chun ramsahai nêka chunghnungbîkna a nei nawh; thil po po chu teplo el a ni si a.

²⁰An rêngin hmun pakhatah an fe a; an rêngin pilvuta inthawk an na, an rêngin pilvut an inchang nâwk a.

²¹Mihriem thlarau chu chungtieng a fe a; ramsa thlarau chu hnuoitieng hnuoiah a fe ti tuin am a hriet a?

²²Chuleiin, miin a sinthawhaia a hlim nêka ṭha lem iengkhawm ka hmu nawh; chu chu ama chanpuol a na, ama hnunga thil hung um dinghai chu hmu dingin tuin am ama chu hung ṭhuoi kîr tâng a ti leh?