Read Hmar THUHRILTU 4 Bible Online

THUHRILTU 4 - Hmar bible

THUHRILTU 4

¹Chun, ka thlîr a, nisa hnuoia nêksâwrna thawa umhai po po chu ka hmu a; chun, nêksâwra umhai mitthlihai chu ka hmu bawk a; thlamuontu hrim an nei nawh; nêksâwrtuhai tienga chun thilthawtheina a um a, nisienlakhawm, anni chun thlamuontu hrim an nei nawh.

²Chuleiin, mi hring la dam zinghai nêk hmanin, mi thi, thi ta hnunghai chu vângnei lemah ka ngai ta a;

³anih, chuhai ve ve nêk chun, nisa hnuoia thawa um sin rilo la hmulo le, la um ngailo ni chu a ṭha lem a nih.

⁴Chun, mi chu a tuolbâwmin a thîkna hlak san, sinthaw hlawtling le sininrimna tinrênghai po po chu ka hmu a. Hi khawm hi teplo el, lungril rimsikna el a nih.

⁵Mi invêt chun a kuthai a kuo a, ama taksa ngei chu a fâk a.

⁶Lungril rimsikna[9] le sinrimnaa kut sip hni nêkin, dei[10] zawta kut sip khat chu a ṭha lem.

⁷Chun, ka thlîr nâwk a, nisa hnuoia chun teplo el chu ka hmu a.

⁸Mi pakhat naupasal amanih, unaupa amanih khawm pakhat khawm nei lo a um a; ana hlak chu, a sininrimna po po chun tâwp hrim a nei naw a, a mithai chu hausaknaa chun a tlai ngai bawk naw a. “Tu ta ding taka hienga mâni inhawitirna chân raka sininrim am ka ni lie?” khawm a ti ngai nawh. Hi khawm hi teplo bawk a nih; anih, tuorna natak a ni chau a nih.

⁹Pakhat nêk chun pahni chu an ṭha lem a, an sininrimnaa chun lâwmman ṭhatak an hmu leiin.

¹⁰An tlu chun, a pakhat chun a ruolpa chu a keitho ding a ni si a; makhâta um ruok chu a chung a rik, a tlûk lai khawma ama keithotu ding khawm nei lo chu.

¹¹Chunawa khawm mi pahni zâl hmunkhat chu an insuklum a; pakhat chau ruok chu iengtin am insuklum a ta?

¹²Mi makhâta um chu hne el thei ni sien khawm, pahni chun lo dodâl thei an tih. Hruol zai thum neia siem chu awlrawnga suktan a ni ngai nawh.

¹³Lal tar invêt, thurâwn khawm pawm nachâng hre ta lo nêk chun tleirâwl var le rimsi khawm chu a ṭha lem,

¹⁴lungina inthawka lal ni dinga hung suok amanih, a lalram sûng ngeia mi rimsia pieng hrim khawm ni sien.

¹⁵Nisa hnuoia mi hring inzi nuoi nuoi po po chu lal aia la hung ngîr ding tleirâwl[11] zui ruokin ka hmu a.

¹⁶Mi an chunga a umnahai po po chu hriet sêng ruol an ni naw a, amiruokchu, ama hnunga hunghai chu amaa chun hlim chuong naw ni hai. Matheilovin hi khawm hi teplo el a na, lungril rimsikna el a nih.