Read Hmar THUHRILTU 5 Bible Online

THUHRILTU 5 - Hmar bible

THUHRILTU 5

¹Pathien ina i fe pha chun i ke vêng ṭha rawh, invêthai inthâwina inhlân nêk chun ngai dinga va hnai chu a ṭha lem si a; thil ṭha naw an thaw ti an hriet si naw a.

²I bauin ti rawk rawk naw la, Pathien hmaa thil iengkhawm hril dingin inhmaw naw rawh; Pathien chu vânah a um a, nang chu hnuoia um i ni si a; chuleiin, i thu chu suktlâwm rawh.

³Mang chu sin tamtak leh a hung hlak si a; mi invêt râwl chu thu tamtak leh a hung bawk a.

⁴Pathien kuoma ṭawng în khâm pha chun hlen dingin muongchâng naw, mi invêta chun lâwmna a nei si naw a, în khâmna chu hlen el rawh.

⁵În khâma i hlen si naw nêk chun, în khâm naw law law kha a ṭha lem.

⁶I bauin suolna tieng a ṭhuoilût ding che phal naw la; Pathien mitirhai hmaa chun 'intiem suolpal a ni kha' ti bawk naw rawh; iengleiin am i ṭawngbauah Pathien chu lunginsenin, i kut sinthawhai chu a sukbohmang el a ta?

⁷Mang tamtak le, thu tamtakhaia chun teplo tamtak a um a[12]; nang ruok chun Pathien ṭi rawh.

⁸Mi rimsi chu nêksâwra a um a, rambunga thawluina chun rorêlna le indikna chu lâk hmang i hmu chun, chu thila chun makti naw rawh, hotu insâng chu a nêka insâng lem chun a enthlit zing si a, anni nêka insâng lem khawm chu an la um pei a nih.

⁹Chu nawa khawm leihnuoi hlâwkna chu mi tin ta ding a na, lal khawm chu lohma ring mi tho a nih.

¹⁰Tangka ngainatu chu tangkaah lungawi naw ni a; hausakna ngainatu khawm hlâwknaa chun lungawi bawk naw nih: hi khawm hi teplo el a nih.

¹¹Thilhai chu an hung pung chun, a fatuhai khawm an hung pung pei a nih; chutaka chun a neitu ta ding chun, a mithaia a hmu chau ti naw chu ieng am ṭhangkaina a um chuong leh?

¹²Mi sinthaw inrim îmu chu ân hnik a, fa tamin fa tlâwm sien khawm; amiruokchu, hausa chu a hausakna chun inintir phal naw nih.

¹³Nisa hnuoia thil ṭha naw lungzingthlâktak ka hmu a um a; chu chu, hausaknahai a neituin ama le ama insuknatna ding chaua a kawl hi a nih;

¹⁴chuong hausaknahai chu tuorna khawhloah an bohmang a; naupasal a nei a, anachu a kuta chun iengkhawm a um nawh.

¹⁵A nu phîng sûnga inthawka a hung suok ang khan, a ruok bawkin fê nawk a ta, a sininrimna man, a kuta a chawi thei khawm chu iengkhawm fêpui naw nih.

¹⁶Chun, hi khawm hi thil ṭha naw lungzingum tak chu a nih, a hung dân ang kawng tinrênga chun; chuong ang bawkin fêng a ta; a lungril sukrim saka a sininrimnaa chun ieng am hlâwkna a hmu leh?

¹⁷A dam sûng po po chun inthim hnuoiah a fâk a, a lunginsen êm êm a, natna le lunginsenna a nei a.

¹⁸Ngai ta u, mi ta dinga ditum le ṭha âwma ka hmu chu, Pathienin ama a ipêk a dam sûng po poa, nisa hnuoia a sininrimna, a sininrimna po poa chun thil ṭha chu chên a, dâwna fâk hi a nih; chu chu ama chanpuol a ni si a.

¹⁹Mi tin Pathienin hausakna le neinungna a pêk a, chutaka fâk theina a pêk a, a sininrimnaa chun hlimna a pêk bawk a; hi hi Pathien thilthlâwnpêk a nih.

²⁰A dam sûng nihai po po chu hre zing nâwk si naw ni a; Pathien chun a lung lâwm zâwnga ama chu a dawn tâk leiin.