Read Hmar HLAHAI HLA 1 Bible Online

HLAHAI HLA 1 - Hmar bible

HLAHAI HLA 1

¹Hlahai hla, Solomon ta chu.

²A baua fâwpnahai chun mi hung fâwp sien; I hmangaina chu uoin nêk chun a ṭha lem si a.

³I hriekhai chun rim inhnikna tak a nei a; I hming chu hriek bun suok ang a nih; Chuleichun, nunghâkhaiin an hmangai che a nih.

⁴Mi hîp la, i hnungah hung tlân kan tih: Lal chun a pindanhaia chun a mi ṭhuoi a; Nangmaa chun hlimin lâwm kan tih; Uoin nêk chun i hming chu hung hril lem kan ta; An hmangai takzet che a nih.

⁵Ka hâng a, nisienlakhawm, ngaino ka bei, Aw nangni Jerusalem naunuhai, Kedar puon inhai ang le, Solomon puonzârhai ang el chun.

⁶Ka hâng êm leiin kei mîn sit naw unla, Nisa chun a mi em duk leiin. Ka nu naupasalhai chu ka chungah an lunginsen a, Grêp huon enkawltuah an mi siem a; Keima grêp huon ruok chu ka enkawl nawh.

⁷Mi hril rawh, nang ka thlain a ihmangai, I ran ruol chu khâwlai am în tlattir a, sûnah khâwlai am în bawktir hlak a? Iengleiin am kei hi i ruolhai hnunga,, Nuhmei puon lu inkhum ang nîng ka ta?

⁸Aw nang nuhmeihai laia hmêlṭha tak, i hriet naw a ni chun, Ran ruolhai kehnunga chun i lampui chu zui suok la, I kêltehai chu berâmpu puon in kâwla chun intlattir rawh.

⁹Aw ka hmangai, Pharao sakawr tawlailîra, Sakawr lâ le chun ka hrilkhi che a.

¹⁰I bienghai chu samphier le chun ngaino an bei hle a, I rînga lunghlu ṭhihruihai le chun.

¹¹Rângkachak ṭhi hrui, Tangkaraw sûngphûm nei siempêk kan ti che.

¹²Lal chu a ṭhungnaa a ṭhung lai chun, Ka spiknard chun a riminhnik a tirsuok a.

¹³Ka hmangaitak chu ka ta ding chun murra bâwm ang a na, Ka âwmhai inkâra um ang hi.

¹⁴Ka hmangaitak chu ka ta dingin henna pârbâwr, En-gedi grêp huona ang chu a nih.

¹⁵Ngai ta, ka hmangai, i hmêl a ṭha, ngai ta, i hmêl a ṭha, I mithai chu vaṭhu mit ang a nih.

¹⁶Ngai ta, i hmêl a ṭha, ka hmangai, anih, lung sukâwi; Ei khum khawm a hring a.

¹⁷Ei in tlungpûmhai chu sidar thing an na, Ei insunhai chu fâr thing an nih.