Read Hmar HLAHAI HLA 3 Bible Online

HLAHAI HLA 3 - Hmar bible

HLAHAI HLA 3

¹Zânah ka khum chungah ka thlain a hmangai chu ka zawng a, Ama chu ka zawng a, anachu ka hmu naw a.

²“Tuhin tho ka ta, khawpui chu fang vêl ka ta, Kawtthlêrhaia le lamlienhaia chun, Ka thlain a hmangai chu zawng ka tih” ka ti a. Ama chu ka zawng a, ka hmu naw a.

³Vêngtu khawpui fang vêltuhai chun an mi hmu a, An kuoma chun, “Ka thlain a hmangai kha in lo hmu am?” ka ti a.

⁴Anni ka fe khêl hnung sâwt nawtêah, Ka thlain a hmangai chu ka hmu a. Ama chu ka chel a, kân fetir ta naw a; Ka nu inah ka hung ṭhuoi a, Kei a mi neitunu pindana ka hung ṭhuoi lût hmakhat chun.

⁵Aw Jerusalem naunuhai, ka ngên cheu, Phûla sazukpuihai le sakhihaiin, Ka hmangai chu sukṭhangin suktho naw ro, Ama a nuom hmakhat chun.

⁶Meikhu intung lui lui anga Thlalêra inthawka hung suok a, Dâwrkai paudâr po po le, Beraw le murraa innâl riminhnik hi tu am a na?

⁷En ta, a khum hi, Solomon ta hi, Mi thilthawtheitak sâwmrukin an inhuol a, Israel mi hrât khawkhênghai chun.

⁸Kâwlhnâm an chawi seng a, indonaa thiemsa an nih; Mi tin chun an kâwlhnâm chu an êlpui chungah an pai seng a, Zâna ṭitna lei chun.

⁹Lal Solomon chun inzâwnna khum a siem a, Lebanon thingin.

¹⁰A banhai chu tangkaruoin a siem a, A ṭuong rângkachakin, a ṭhungna a dumpâwlin, A sûngril tieng chu hmangaina le rem a na, Jerusalem nauhaiin.

¹¹Aw nangni Zion naunuhai, fe suok unla, lal Solomon chu en ro, Nuhmei a nei nia le a lungril a hlim nia a nuin lallukhum ân khumtir kha.