Read Hmar HLAHAI HLA 6 Bible Online

HLAHAI HLA 6 - Hmar bible

HLAHAI HLA 6

¹Khâw tieng am i hmangaitak chu a fe ta a, Aw nang nuhmei laia hmêlṭha tak? I hmangaitak chu khâwtieng am ân her ta a, Nang leh ama chu kan zawngpui theina ding chein?

²Ka hmangaitak chu a huonah, riminhnikhai bila chun a fe a, Huona chun vân suktlai ding le, lilihai va la khâwm dingin.

³Ka hmangaitak ta chu ka na, ka hmangaitak chu ka ta a nih, An ran ruolhai chu lili lai chun ân tlattir a.

⁴Aw ka hmangai, Tirza angin i mawi a, Jerusalem angin ngaino i bei a; Puonzâr le sipai ruol angin ṭi i um bawk a.

⁵Keimaa inthawkin i mithai chu la kieng rawh, An mi sukṭi ta si a. I sam chu kêl ruol, Gilead sîr panga tlahai ang chu a nih.

⁶I hahai chu berâmpui ruol, Insilnaa inthawka hunghai ang chu a nih; A kawp kawpin an um seng a, Anni lai chun a tukhawm a khâtin an um nawh.

⁷I barêphai chu theibufai hlek ang a na, I puon lukhum hnuoia chun.

⁸Lalnu sâwmruk le, thaikêm chu sâwmriet an um a, Chun, nunghâk chu tiem sêng lo.

⁹Ka vaṭhu, ka ṭha famkim chu, pakhat chau a nih; Ama chu a nu nau nei sun a na, Ama châwitu nu lunglam tak chu a nih. Naunuhmeihai chun an hmu a, ama chu vângnei an ti a, Anih, lalnuhai le, thaikêmhai le chun ama chu an inpâk a.

¹⁰Vârṭien ang ela hung dâk suok a, Thlapa ang ela hmêlṭha a, Nisa ang ela inthieng a, Puonzâr le sipai pâwl ang el a ṭium khi tu am a na?

¹¹Makha huona chun ka zu fe thla a, Phai ruoma thil phun hringhai chu en ding le, Grêp hruihai chu an inder ta am, Theibufaihai chu an pâr ta am ti en dingin.

¹²Annawleh, kân ring naw kâr, Ka thla chun, ka mi dit zâwnghai sakawr tawlailîr lai a mi sie ta a.

¹³Kîr[1] rawh, kîr rawh, aw Shulam mi, Kîr rawh, kîr rawh, kan en theina ding chein; Mahanaim lâm en ang el chun, Iengdingin am Shulam mi chu en i ta?