Read Hmar ISAI 1 Bible Online

ISAI 1 - Hmar bible

ISAI 1

¹Amoz naupa Isaiin Judahai lal Uzzia, Jotham, Ahaz le Hezekia hai inlal laia Judahai le Jerusalem chungchâng thua inlârna a hmu chu.

²Aw vânhai, ngai unla, aw leihnuoi, na sit rawh, LALPA chun thu a hril ie: “Nauhai chu ka châwm puitling a, ka chungah an hel ta si a.

³Bâwngchal chun a pu a hriet a, sabengtung khawma a pu bupêkna a hriet bawk a, Israelhai ruok chun an hriet si naw a; ka mihai chun an ngaituo naw a nih,” tiin.

⁴A! hnam suol, khawhlona riktak phur mihai, chithla thil ṭha naw thawtuhai, nau rilotaka khawsa hlakhai an nih. LALPA chu an mâksan a, Israelhai Mi Inthieng chu an hmusit a, insuktumin an hnungtawl tah.

⁵Iengdinga hel zuol deu deu a, vuoka la um rawp ding am in ni a? Lu chu a pumin a na a, lungril khawm chu a pumin a châu tah.

⁶Kepha hnuoia inthawka lu chenin a dam lai hrim a um nawh; pawp dâm, vuok duk chur dâm, pânna hnâi la ruok an nih; chuong chu an hmetping naw a, an tuom bawk naw a, sahriek khawm an nâl bawk nawh.

⁷In ram chu rausanin a um zo a, in khuohai chu meiin a kâng zo a, in ram chu ram dang mihaiin in mithmu ngeiah an nei zo a, ram dang mihai suksiet angin a se zo tah.

⁸Zion naunu chu grêp huona vêngbûk ang le, fanghma huona ṭu ang le, khawpui inhuolvêl anga mâksanin a um tah.

⁹Sipaihai LALPA chun hlabîkhai tlâwmte mi lo hlapêk naw sienla chu Sodom ang khan um dai tâng ei ta, Gomorra ang el khan um tâng ei tih.

¹⁰Sodom rorêltuhai, LALPA thu hi hre unla, Gomorra mihai, ei Pathien dân thua hin na sit ro!

¹¹LALPA chun, “In inthâwina zozai hi ka ta dingin ieng am a ṭhangkaina a um a? Berâmchal pumrawhmanga inhlân le, ran châwm thâuhai thâu chu ka nghawk tah; bâwngchalhai le berâmte le kêlchalhai thisena hin ka lâwm ta nawh.

¹²Ka hmaa hin inlang dinga in hung hin, ka biekin inhuon sûng tuollai hi sir dingin tuin am a phût cheu a?

¹³Thilpêk mei meihai chu hung chawi ta ngai naw ro; thil riminhnik khawm chu ka ta dingin thil tirdakumtak a nih; thla thar dâm, châwlni dâm inkhâwmpuia infiel khâwm dâm mei mei chu ka ngai thei naw tawp el; khawhlona mei mei a nih, inkhâwm ropuitak khawm hi.

¹⁴In thla tharhai le in hunbi nei ruoiṭhehai chu ka lungril chun a theida a nih; ka ta dinga thil hnawksaktak a nih, tuor ka nghawk tah a nih.

¹⁵Chuongchun, in kut in phar pha khawm in tienga chun ka hmai hip tâng ka ta, anih, vawi tamtak in ṭawngṭai hnung khawmin ngai ta naw ningah; in kuthai chu thisenin a sip si a.

¹⁶Insâwp unla, insukfai ro, ka mithmu phâk nawah in thilthawhai hi a suolna chu sie hmang ro; suol thaw thaw el hi ma ta unla, thil ṭha thaw inchûk ta ro;

¹⁷rorêlna fel zawng unla, nêksâwrna tuorhai chu ṭhangpui unla, pa bohai chu ro rêlpêk unla, hmeithaihai chu hrilpui ro,” ti hi.

¹⁸LALPA chun, “Hung ta u, ngaituo tlâng ei tiu! In suolhai chu sen inlâr angin um ta sienla khawm, vûr angin vâr a tih; sen duk angin sen ta sienla khawm, berâm hmul angin um a tih.

¹⁹Tiâwitak le thuâwitaka in um chun, in rama thil ṭhahai hi fâng in ta;

²⁰nisienlakhawm, in nuom naw a, in hel chun kâwlhnâmin fa zo a ti cheu; LALPA bau chun chu chu a hril tah a nih,” a ta.

²¹Iengtiziea khawpui ringumtak chu nawchizawra inchang el am a ni le aw! Rorêl felnaa sipnu a ni hlak vei leh! Amaa chun felna a um hlak a, tu ruok hin chu tuolthattuhai an um lem ta hi.

²²I tangka chu a êksiein ân chang ta a, i uoin chu tui le pawl a ni ta a.

²³I mi lienhai chu mi hel hmang, inru hmanghai ruolhai an nih, mi tinin tham an nuom a, lâwmman an hnawt hlak; pa bohai ro an rêlpêk ngai naw a, hmeithai thu hlak an kuom a tlung ngai nawh.

²⁴Chuleiin, LALPA, Sipaihai LALPA, Israelhai Mi Hrât chun, hieng ang hin a hril a nih: “A! A mi dotuhai hi sukfithla el ka ta, ka hmêlmahai chungah phuba lâng ka tih:

²⁵chun, i chungah ka kut thlâk nâwk ka ta, i êksie chu faitakin sukbo ka ta, i suon po po chu la hmang vawng ka tih:

²⁶chun, i chungah rorêltuhai chu a tîra an um ang khan inumtir nâwk ka ta, i sûnga remruottuhai chu a hmasa taka an um ang khan inumtir nâwk bawk ka tih; chu hnunga chun, ‘Felna khawpui, khawpui ringumtak,’ la tîng an ti che.

²⁷Zion chu rorêlna fela sansuok ni tâng a ta, a sûnga mi nghakîr nâwkhai khawm felnaa sansuok nîng an tih.

²⁸Nisienlakhawm, bawsetuhai le mi suolhai suksietna chu um inruol a ta, LALPA mâksantuhai khawm sukbohmangin um an tih.

²⁹In thingsaisuo dittakhai chu inzâpui tâng an ta, in huon thlanghai lei chun inzaktakin in um ta ding a nih.

³⁰Thingsaisuo a hna vuoi ta le, huon tui hmu naw ang el hi in ni ding a nih.

³¹Chun, mi hrâttak chu ziza pawn ang ni tâng a ta, a sinthaw chu meisi ang ni tâng a tih; chuongchun, kâng rêl an ta, tukhawma sukrêm naw ni hai,” tiin.