Read Hmar ISAI 10 Bible Online

ISAI 10 - Hmar bible

ISAI 10

¹Fel nawtaka thu ruottuhai le indik nawtaka ziektuhai chu an chung a rik ie!

²Pasiehai chu rorêlna fel inkhêltir ding le ka mihai laia pasiehai hmu thei ding âwm hrim hrim lâkpêk dinga, hmeithaihai chu an râllâk anga an um theina dingin le pa nei nawhai chu an thil lâkpêk anga an siem theina dinga thawtuhai chu.

³Chuongchun, an hung kan nia cheu le hlataka inthawka râusanna hung tlung dinga inthawk ieng am thaw tâng in ta le? Ṭhangpuina hniin tu kuom âm tlân tâng in ta le? In ropuina chu khâw lai am mâksan tâng in ta le?

⁴Salhai hnuoiahai chun kûn an ta, thata umhai hnuoiahai chun tlûng an tih, chu chau chu an chan ni tâng a tih. Chuong ang lâwma a thaw khawm chun a lunginsen chu a la bo chuong si naw a, a kut chu a lân let ta rawp a.

⁵Hung ta, Assuria mi, ka lunginsenna hembâwk, ka lungninawna chawitu hmawl!

⁶Râllâk la ding le, thil lâkpêk la ding le kawtthlêr chirhak anga sir dingin ama chu Pathien inza naw hnam do dingin tir ka ta, ka lunginsenna mihai chu thaw dingin thu pêng ka tih.

⁷Nisienlakhawm, ama chun chu chuong ang chu a tum a ni naw a, chuong ang chu a lungril khawma a ngaituo bawk nawh; hnam tam namêna tam lo suksiet le sukbohmang a nih a lungril lem chu.

⁸“Ka mi lien po pohai hi lal vawng an ni naw am a nih? Kalno khuo chu Karkemis khuo ang el a ni tah a ni naw am a nih?

⁹Hamath khuo chu Arpad khuo ang el a ni tah a ni naw am a nih? Samari khuo chu Damaska khuo ang el a ni tah a ni naw am a nih?

¹⁰Ka kut hin milimhai ram, Jerusalem khuo le Samari khuoa mi nêka milim siem fâwm ṭha lem neihai khawm, a zawng suok ta si a,

¹¹Samari khuo le a milimhai chunga ka thaw ang khan Jerusalem le a milimhai chunga khawm hin ka thaw ve naw ding am a nih?” a ti si a.

¹²Chu lei chun Lalpa chun, Zion tlâng le Jerusalem chunga sinthaw ding po po a thaw zo pha chun, Assuria lal a lungril chapo ra le a mit chapo ropuina chu la hrem ka tih.

¹³Ama chun, “Ka kut hrâtnain ka thaw tah a nih, ka varna le hin; ka bengvâr si a: chi tin ramrihai hlak chu ka sawn a; an rohai hlak ka lâkpêk a, lalṭhungphaa ṭhunghai hlak chu mi huoitak thaw angin ka hnûk thlâk ta a;

¹⁴ka kut hin chi tin hausaknahai hlak chu vate bu angin a zawng suok a; miin vate tui a pui râusan hnunghai an lâk angin, leihnuoi hluotuhai po po hi ka lâk vawng tah a nih; thla zâp amanih, bâu ka amanih, inhrâm hrim hrim khawm an um dêr si naw a,” a ti a nih.

¹⁵Hreipui hin thil chêkna dinga a hmangtu chu a uongkhum ding am a nih? Thingâtna hin a âttu chu a hnuoisie ding am a nih? Hembâwkin ân lettuhai chu ân let vêl lem ang amanih, hmawlin thing ni si lo ân let lem ang el hi a nih!

¹⁶Chuleiin, LALPA, sipaihai LALPA chun, a mi thauhai laia chun chêrna tir a ta, a ropuina hnuoia chun meichawk lai zing ang hin mei sêmin um a tih.

¹⁷Chun, Israelhai êntu chu mei dingin nîng a ta, an Mi Inthieng chu meichawk dingin ni bawk a tih: chu chun ni khat thilah a hlohlingneihai le a buorhai chu sukkângin sukbohmang a tih, hmawlin thing ni lo mihriem ân let lem ang elin maw!

¹⁸A rampui le a hnuoi ṭha hmun ropuina khawm chu, thlarau le taksa chenin sukbohmang a tih, chuongchun, inchikna chawitu a châu hun lai ang nîng a tih.

¹⁹A rampuia thing la um sunhai chu naupang ziek khawp chaua tlâwm ni tâng a tih.

²⁰Chun, chu ni chun, Israelhai hlabîkhai le Jakob sûnghai laia a la dam sunhai chun anni thattu chu ring nâwk ta naw ni hai a; LALPA Israelhai Mi Inthieng chu, titakzetin ring lem tâng an tih.

²¹Hlabîkhai, Jakobhai laia a la dam sunhai chu, Pathien hrâttak kuoma chun la kîr nâwk an tih.

²²I mi Israelhai chu tuisuoriet phaiphin zâtin um hai sien khawm, a la um sunhai chau chu an kîr nâwk ding a ni si a; felna luong liemna suksietna chu tlung dinga ruot tlat a nih.

²³Lalpa sipaihai LALPA chun, tâwpna, tâwpna tlung ngei dinga ruot tlat chu, hnuoi chung po po lailia chun a la siem ding a ni si a.

²⁴Chuleiin, Lalpa Sipaihai LALPA chun hieng ang hin a tih, “Aw ka mi, Ziona umhai, Aigupta rama an thaw ang khan hembâwka vaw cheuin a hmawl chu in chungah inlet sien khawm Assuria mi chu ṭi naw ro.

²⁵Sâwt nawtêa chun lungninawna chu hrîkthlâkin um tâng a ta, ka lunginsenna khawm anni sukbohmangnain hrîkthlâkin um tâng a tih.

²⁶Oreb lungpuia Midian mihai an that lai ang khan, sipaihai LALPA chun ama thaw dingin vuokna chu chawktho a ta, a hmawl chu tuipui chungtieng um a ta; Aigupta rama ân let ang khan inlet a tih.

²⁷Chu nia chun a rikphur chu i liengkoa inthawka lâk hmangin um a ta, a rîngkawl chu i rînga inthawka lâk hmangin um bawk a tih; hriek nâl lei chun rîngkawl chu suksietin um tâng a tih,” tiin.

²⁸Aiath khuo a tlung tah, Migron khuo a fe thleng tah; Mikmas khuoa chun a thuomhnaw a sie tah:

²⁹kâwnah an liem tah, Geba khuoah an riek tah; Rama khuohai chu an inthin an inthin el tah. Saula Gibea khuohai chu an tlânse tah.

³⁰Aw Gallim khaw naunu, i râwlin inringtakin ko rawh; aw Laisa khuo! ngai ta! aw Anathoth, lungsiet i va um ngei de!

³¹Madmena khuohai chu tlân hmangin an um tah; Gebim khuoa umhai chu tlân hmang tumin an inhâwrkhâwm luoi luoi a.

³²Vawisûn ngei hin Nob khuoah a châm ding a nih; Zion naunu tlâng, Jerusalem muol pâwng chu a kut a thin khum ie.

³³Ngai ta, Lalpa, Sipaihai LALPA chun, thil râpthlâktakin a kâuhai chu sât thlâng a ta, insângtak takhai chu phûrin um a tih, a dâwk bîkhai khawm chu râwt hnuoiin um a tih.

³⁴Thîrin ramhnuoi thing bittakhai chu phûr a ta, Lebanon Sidar thinghai chu mi ropui phûrin tlu dur dur a tih.