Read Hmar ISAI 11 Bible Online

ISAI 11 - Hmar bible

ISAI 11

¹Jessai a bula inthawkin a dâwn hung suok a ta, a zunga inthawka kak suokhai chu râng a tih;

²chun, LALPA thlarau-varna le hriet theina thlarau, remruotna le hrâtna thlarau, hrietna le LALPA ṭina thlarau chu-a chungah fûng a tih.

³Chuongchun, a lâwmna chu LALPA a ṭinaah nîng a ta, a mita a hmu angin ro rêl naw ni a, a naa a hriet angin kâwk el bawk naw ni a;

⁴rimsihai chu feltakin ro rêlpêk lem a ta, hnuoia mi thuhnuoirawlhai ta ding chun thlierbîk nei lovin kâwkpêk bawk a tih; a bau hembâwk chun hnuoi hi vuong a ta, a hmûra thuok chun mi rilohai chu that a tih.

⁵Felna hi a kâwnghrên nîng a ta, ringumna hi a kâwngkhi nîng a tih.

⁶Chun, satene chu berâmte leh um hmunkhat tâng an ta, keite chu kelte leh bawk hmunkhat tâng an tih; bâwngte le sakeibaknei vânglai le ran châwmthâuhai chu um hmunkhat tâng an ta; naupangtêin ṭhuoi dup dup a tih.

⁷Chun, sebâwng le savawm chun fa tlâng an ta, an têhai chu bawk hmunkhat diel diel tâng an tih; chun, sakeibaknei chun bâwngchal angin bupâwl fa tâng a tih.

⁸Chun, nau nêne ne lai chu rûlriel kuo khotlângah inhnel tâng a ta, nau nêne nêk bân ta chun rûlhmuk intawmkûk kuo khotlânga chun a kut innghat a tih.

⁹Ka tlâng inthienga hrim hrim chun insuknat um ta naw ni a, insuksiet um bawk ta naw ni; tuihai hin tuisuoriet ân khum zing angin, leihnuoi hi LALPA hrietnain a sip zo vawng ta ding a nih.

¹⁰Chun, chu nia chun, Jessai zung, mi tin inchikna dinga ngîr chu ama ngei chu hnam tinin râwn an ta, a châwlna hmun chu ropui a tih.

¹¹Chun, chu nia chun LALPA chun a mihai, a thi mahla la um sun, Assuria rama inthawk dâmin, Aigupta rama inthawk dâmin, Pathros rama inthawk dâmin, Kus rama inthawk dâmin, Elam rama inthawk dâmin, Sinar rama inthawk dâmin, Hamath khuoa inthawk dâmin, tuisuoriet thlierkâra inthawk dâma la nâwk dingin a vawi hninaa chun a kut la phar nâwk a tih.

¹²Chun, hnam tin ta dingin inchikna târ suok a ta, Israel hnawt suoka umhai chu ṭhuoi khâwm a ta, Juda indarhai kâwl kil lia inthawkin ṭhuoi khâwm a tih.

¹³Chuongchun, Ephraim hai îtthîkna chu bo tâng a ta, Juda hai sukbuoituhai chu sukbohmangin um tâng an tih; Ephraim hai chun Juda hai chu îtthîk ta naw ni hai a, Juda hai khawma Ephraim hai chu sukbuoi ta naw ni hai.

¹⁴Chuongchun, annihai chu thlangtienga Philistin mihai liengkoa chun zuk vuongin zu fûng an ta; khawsak nauhai chu rawk hmunkhat an tih; Edom le Moab mihai chungah an kut thlâk an ta; Ammon thlahai chun an thu awi tâng an tih.

¹⁵Chun, LALPA chun Aigupta tuisuoriet kilkawi chu sukse vawng a ta; Vadungpui khawm chu a thli lum vut vut chun a kut thin khum a tih; vadungtê pasaria siem khawp rauin vuong a ta, mihai chu kepha khawm hu lovin infekaitir a tih.

¹⁶Chuongchun, Aigupta rama inthawka an suok nia, Israelhai ta dinga lamlien a lo um ang khan a mihai thi mahla la um sunhai ta ding chun Assuria rama inthawkin lamlien hung um a tih.