Read Hmar ISAI 15 Bible Online

ISAI 15 - Hmar bible

ISAI 15

¹Moab ram phurrik chu. Zân khat kârin Moab rama Ar khuo chu suksietin a um a, iengkhawm ni lova siemin a um ta si a; zân khat kârin Moab rama Kir khuo chu suksietin a um a, iengkhawm ni lova siemin a um ta si a.

²Dibon mipui chu bâwlhmuna hai chun ṭap dingin an hang fe a, Moabhai chun Nebo le Medeba chu an ṭapkhum rak rak a, an lu po po a kawl vawng a, khâk hmul tinrêng khawm vawin a um ta vawng a nih.

³An kawtthlêrahai chun saiip puon an dierkei a, an in chungahai le an tuolzâwl lienna laiahai chun mi tin chu nasataka ṭapin an khêk rak rak a.

⁴Chun, Hesbonhai khawm chu an khêk a, Eleale mihai leh; an râwl chu Jahaz khuo chen khawma an lo hriet a; chuleiin, Moab mihai râlthuoma inthuomhai chu inringtakin an khêk a; an hringna chu an phîng sûnga chun ân thin a.

⁵Moabhai leiin ka lungril chu a khêk a; an mi ṭhahai chu Zoar khuoa le Eglath-selisijah-ah an tlân a, Luhith lam tunga chun ṭap pumin an fe a nih; Horonaim lampuia chun sietna khêkin an khêk suok a nih.

⁶Nimrim tuihai chu suksietin a um ding a ni si a; hlobet chu a vuoi zo a, hlobet inder thar chu a rawp a, thil hring rêng rêng chu a um ta si naw a.

⁷Chuleiin, an sum la nei sunhai le an sie ṭhathai chu Phahrâm Vadung râla chun fe hmangpui an tih.

⁸Khêkri chu Moab ramri vêlahai chun a um si a, khêk rak rak ri chu Eglaim khuo chenin ân hriet a nih; khêk rak rak ri chu Beerelim khuo chenin ân hriet a nih.

⁹Dimon tuihai chu thisenin ân pawl zo vawng si a; Dimon chunga chun thil nasa nâwk zuol kân tlungtir ding a ni si a, Moabhai laia tlânsuokhai chunga le, chu rama la um sunhai chunga chun sakeibaknei intlungtir ka tih.