Read Hmar ISAI 17 Bible Online

ISAI 17 - Hmar bible

ISAI 17

¹Damaska khaw phurrik chu. Ngai ta, Damaska chu khawpui ni ta lo dingin lâk hmang a ni tah; chuongchun, in chim khâwm el ni tâng a tih.

²Aroer khuohai chu tlânsanin a um tah; berâm ruolhai umna ding ni el a tih; chuong chu bawk an ta, tukhawma sukṭi naw ni hai.

³Ephraima inthawka kulpui chu bo a ta, Damaskaa inthawkin ram chu bo a tih; Suria ram la um sunhai khawm chu bo a ta, Israel thlahai ropuina ang chauin um an tih, sipaihai LALPAIN a tih.

⁴Chu nia chun, Jakob ropuina chu sukchêrin um a ta, a tisa thâuna chu hung chêr tâng a tih.

⁵Chuongchun, bu sîktupain bu a lâk a, a vuihai chu kuta a ât bawng ang el hi nîng a tih; anih, Rephaim ruoma mihaiin buvui hmu ṭhel an rût ang el hi nîng a tih.

⁶Nisienlakhawm, oliv thing vuok hnunga a zikpui insângtak lêra ra pahni pathum amanih, thing ratak zâr seitaka hai pali panga amanih a um hlak ang hin chutaka chun hmu ṭhel rût ding la um a tih, LALPA Israelhai Pathien chun a tih.

⁷Chu nia chun miin anni siemtu tieng en tâng an ta, an mithai chun Israelhai Mi Inthieng chu inza tâng a tih.

⁸Maichâm anni kut suok tieng chu en ta naw ni a, anni kuta siem Asera amanih, nisa limhai amani khawm inza ta naw ni hai.

⁹Chu nia chun an khaw dettakhai chu rampui le tlâng sîpa hmun tlânsan hnung, Israel thlahai hmaa an tlânsan hnung ang khan nîng a tih; chuongchun, hmun râusan ni tâng a tih.

¹⁰Pathien i sandamtu i theinghil a, i hrâtna lungpui chu i hriet zing si naw a; chuleiin, kûng mawitak takhai i phun hlak a, a sûnga chun kau danglamtak takhai i sunbûr fur hlak a;

¹¹i phun ni chun în huon vêl hlak a, zîngkâr chun i thil chi chu i sukpâr hlak; nisienlakhawm, a ra lo chu lungngaina le natna nasatak nia chun a bo el hlak.

¹²A mipui tamtak inri dur dur, tuisuoriethai inri dur dur anga inri dur durhai le hnam tin inri hum hum, tui nasatak inri hum hum anga inri hum humhai chu aw!

¹³Hnam tin chu tui tamtak inri hum hum angin inri hum hum an tih; nisienlakhawm, ama chun kâwk a ta, hlatakah tlân hmang an ta, tlânga busi thli ilên ang le pilvut thlipui imût vir mup mup angin hnawtin um an tih.

¹⁴Zântieng chun ngai ta, thil râpthlâktak a um a nih; chun, khaw var hmain an um ta nawh. Chu chu râllâka mi lâkpêktuhai chan a na, a mîn rûkpêktuhai puol chu a ni bawk a.