Read Hmar ISAI 22 Bible Online

ISAI 22 - Hmar bible

ISAI 22

¹Inlârna ruom phurrik chu. Ieng am in ti a ni leh, in chunga dâm in lâwn vawng a?

²Aw khêk ria sip, khawpui sa mur mur, khaw hlimtak, i sûnga an thathai chu kâwlhnâma that an ni naw a, indonaa thi an ni bawk nawh.

³I rorêltuhai po po chu an tlân hmang tâwl a, thal kâp mihai khuopin an um a; i ta an hmu po po chu khuop hlawmin an um a, hlataka inthawka hung tlân hmanghai chu.

⁴Chuleiin, kei chun, “Mi en lovin, khingtieng en ro, ka ṭap rak rak ding a nih; ka mihai naunuhai râllâka an lâk thua chun mi thlêm inkhaw nuom naw ro,” ka ti a.

⁵LALPA, sipaihai LALPAA inthawk chun, inlârna ruoma hin buoina le sirdena le lunginzîngna ni a ni si a; kulpui bang suksietna le tlânghai kona chu.

⁶Chuongchun, Elam mihai chun thal bâwm an chawi a, mihriem chuongna tawlailîrhai le sakawr chung chuong mihai leh; Kir mihai chun phaw tuomna chu an sût a.

⁷Chun, i ruom ṭhatakhai chu tawlailîrhaiin a sip ta a, sakawr chung chuong mihai chu kul kawtkhâr bula chun an intlim hmur a.

⁸Chun, Judahai inkhumna chu a lâk hmang a; chu nia chun rampui hmuna râl inthuomna chu in en ta a.

⁹David khaw kul a se laihai chu in en bawk a; a tam ti in hriet a, chun, dîl thlanghnung lem tuihai chu in inluong khâwmtir ta a.

¹⁰Chun, Jerusalem inhai in tiem a, kulpui bang siem ṭhatna dingin inhai chu in ṭhiek a.

¹¹Dîl hlui tui umna dingin kulpui pahni inkâra chun tui intling khâwmna in siem a; nisienlakhawm, chuong thawtu tieng chu in en si naw a, inhmaa lo siemtu chu in ngaisak bawk nawh.

¹²Chu nia chun LALPA, sipaihai LALPA chun, ṭap ding le, âwm inchum ding le, lu sukkawl ding le, saiip puon dierkei dingin a ko a;

¹³nisienlakhawm, ngai ta, hlimna le lâwmna dâm, bâwng thatna le berâm thatna dâm, sa fâkna le uoin dâwnna dâm a um ta lem a. “Fain dâwn ei tiu khai, zinga chun ei thi el ding a ni si a,” an ti a.

¹⁴Chuongchun, sipaihai LALPA chun ka naah ân hriettir a, “Matheilovin hi suolna hi in thi hmakhat chun nangni laia hi sukfai ni ta naw nih, LALPA, sipaihai LALPA chun a tih,” tiin.

¹⁵LALPA, sipaihai LALPA chun, hieng ang hin a tih, “Fe la, hi sum enkawltu hrep kuoma hin, Sebnaa, lal in chunga hotua um ngei kuoma chun fe rawh.

¹⁶Chun, a kuomah hieng ang hin hril rawh: Hitaka hin ieng am i thaw a? Hitaka hin tuhai am i nei a, thlân hi i kerkuok kher a ni leh? Nangma ta dingin insângtakah thlân i kerkuo a, i ta dinga lungpuia umna i siem hrim hi!

¹⁷Ngai ta, LALPA chun mi hrâtna a pei angin pei rak a ti che; anih, a fûnin fûn tlat a ti che.

¹⁸Ama chun matheilovin thil hlûm angin sukvir a ti che a, ram lientakah vawr lût a ti che; chutaka chun thîng i ta, chutaka bawk chun, nang mâni lal insûng sukmuolphotupa, i ropuina tawlailîrhai chu um a tih.

¹⁹I sinthawnaa inthawk chun hnawt suok ka ti che a, ama chun i hotu ninaa inthawk chu hnûk thlâng a ti che.

²⁰“Chun, chu nia chun ka siehlaw Eliakim, Hilkia naupa chu, ko ka ta;

²¹ama chu i zakawfuol hi inhâktir ka tih, i kâwngkhi hin sukhrât ka ta, i rorêlna hi a kutah inkawltir ka tih; chuongchun, ama chu Jerusalema umhai ta dingin le Juda sûnghai ta dingin pa nîng a tih.

²²David sûnghai châbi chu a liengkoah sieng ka ta, ama chun hawng a ta, tukhawma khâr naw ni hai; khâr a ta tukhawma hawng naw ni hai.

²³Ama chu kilna hi hmun dettaka an kil tlat angin, sukdet tlat ka ta, chuongchun, ama chu a pa sûnghai ta dingin lalṭhungpha ropuitak ding nîng a tih.

²⁴Amaa chun a pa sûnghai ropuina po po chu la khai vawng an ta, a nauhai le a thlahai, bûr le bêl chîn tinrêng, berbu bûr le bêla inthawka tui siena bûr le bêl po po chenin.

²⁵Chu nia chun, kilna, hmun nghettaka kil tlata um chun la dâwl naw nih; sât thlâka umin, tla tâng a ta, a chunga thil rik um chu sukbohmangin um tâng a tih, LALPAIN chu chu a hril ta si, sipaihai LALPA chun a tih,” tiin.