Read Hmar ISAI 23 Bible Online

ISAI 23 - Hmar bible

ISAI 23

¹Tura khaw phurrik chu. Tarsis lawng lienhai, khêk rak rak ro; in hrim hrim um naw khawp le lûtna hrim hrim um naw khawp rauin Tura chu suksietin a um ta hi, chu chu Kupra rama inthawk chun an kuoma suklangin a um a.

²Thlierkâra umhai, to ṭhiep ro, Sidon khaw sumdâwng tuipuia fehai isukmuk chu.

³Tuipuia Sihor chi, Nile vadung bu sîk chu, a hlâwkna a ni hlak a, hnam tin sumdâwngna hmun a ni hlak.

⁴Aw Sidon, inzak rawh: tuipui, tuipui kulpui chun, thu a hril ta si a, “Nauha se kân vawi ngai naw a, nau ka nei ngai bawk nawh, tlangvâl hlak ka châwm ngai bawk naw a, nunghâk khawm ka vailien ngai nawh,” tiin.

⁵Thuthang chu Aigupta ram a tlung pha chun Tura thuthang chu nasatakin invawi an tih.

⁶Tarsisah va kai unla; thlierkâra umhai, khêk rak rak ro.

⁷Hi hi maw in khaw hlim tak, a hlunzie khawṭoṭima mi tah, a kein hlataka um dinga a iṭhuoi hlak chu?

⁸Lallukhum inkhumtirtu khuo Tura chunga hin tuin am hi hi tlung dingin a ruot a? Chutaka sumdâwngtuhai chu mi lienhai an na, chutaka sumdâwngtuhai chu hnuoi mi inzaumhai an ni si a.

⁹Sipaihai LALPA chun ropuina po po chapona chu sukmawi lo ding le, hnuoia mi inzaumhai po po hmusituma inumtir dingin a ruot a nih.

¹⁰Aw Tarsis naunu, Nile vadung angin i rama chun luong liem rawh; i kâwngkhitna hrim hrim a um ta naw hi.

¹¹Tuisuoriet chungah a kut a phar a, ramhai chu a sukhnîng a, LALPA chun Kanaan ram chungchâng thuah thu a pêk a, a kulbînghai sukse dingin.

¹²Chun, ama chun, “Aw Sidon nau nunghâk, mi nêksâwr, hlim nâwk ta naw ti nih; tho la, Kittim ramah kai rawh; chutaka khawm chun châwlna hrim hrim hmu chuong naw ti nih,” a ta.

¹³En ta, Kaldaihai ram hi, hieng mihai hi an um ta nawh; Assuria mi chun thlalêra ramsahai ta dingin a ruot tah a nih; an in insânghai chu a bâwl a, chutaka lal inhai chu an sukbohmang a, in sieah a siem ta a.

¹⁴Tarsis lawng lienhai, khêk rak rak ro, in kulbîng chu suksietin a um ta hi.

¹⁵Chun, chu nia chun, Tura khuo chu, lal pakhat kum tiem a, kum sâwmsari sûng chu theinghilin um a tih; kum sâwmsari bo hnung chun nawchizawr hlaa an hril angin Tura khaw chunga chun la tlung a tih:

¹⁶“Nang nawchizawr mihai theinghil ta hnung! ṭingṭang la la, tuol fang rawh, ṭingṭang kei la, hla tamtak sak rawh, hrieta i um nâwk theina dingin.”

¹⁷Chun, kum sâwmsari bo hnung chun, LALPA chun Tura khuo chu hung sir a ta, chuongchun, ama chu a hlaw hnawtin um nâwk a tih, hnuoi chunga khawvêl ram po poa nawchizawrin um a tih.

¹⁸Chun, a sum themsuok le a hlaw chu LALPA ta dinga thil inthieng nîng a ta, chu chu inkhâwlin amanih, sie khâwlin amanih um naw ni a; a sum themsuok chu LALPA hmaa umhai ta dingin a ni ding a ni si a; hnienghnâra an fâk ding le, silfên ropuitak an nei theina dingin.