Read Hmar ISAI 29 Bible Online

ISAI 29 - Hmar bible

ISAI 29

¹E Ariel, Ariel, David umhmun khuorna khuo! kumah kum bel ro; ruoiṭhe hunhai chu hung tlung nâwk raw se;

²chu pha chun Ariel hi suklungzîng ka ta; chuongchun, sûnna le ṭapna um a tih; chun, ama chu ka ta dingin Ariel ang chu nîng a tih.

³Chun, nang chu thaw tumin i vêla chun ep ka ti che a, kul siemin inhuol vêl bawk ka ti che a, thaw ding chein inhuol vêlna kulbînghai siem bawk ka tih.

⁴Chuongchun, sukthlûkin um i ta, hnuoi hnuoia inthawkin thu hril i ta; i ṭawng chu pilvut lai chun damtein inri suok a tih: i râwl chu khawhri aisânthiem râwl ri ang chauin hnuoi hnuoia inthawk chun hung suok a tih; i ṭawng chu pilvut laia inthawk chun hung suok sal sal a tih.

⁵Nisienlakhawm, nanga dotu mipuihai chu pilvut inditak angin um an ta, mi ṭiumhai mipuihai chu busi bohmang hlak ang hin um bawk an tih; anih, chu chu mitkhapkâr lovin um thut a tih.

⁶Vâninrûm dâm, simkhawleihnuoi inhnîng dâm, ri nasatak dâm, thlivir dâm, thlipui dâm, thil kâng hmang thei meichawk dâmin ama chu sipaihai LALPA hremin um a tih.

⁷Chuongchun, Ariel dotu hnam po po mipuihai, ama le a kulbîng thawtuhai po po leh ama suklungzîngtuhai po po chu mang ang chau nîng an ta, zâna inlâr ang chau el hi.

⁸Mi phîngṭâmin mang a nei chun bu a lo fâk hlak a; nisienlakhawm, a hang har a, a phîng chu a lo la ruok zing ang hi nîng a tih; annawleh, mi dangchârin mang a nei chun tui a lo dâwn hlak a, nisienlakhawm, a hung har a, a lo la châu zingin, tui a la du rawp ang hi nîng a tih; Zion tlâng thawtu hnam po po mipuihai chu, chuong ang chu an ni ding a nih.

⁹Ngîr zing unla, makti ro, nuomtâwl unla, mitdelin um ro; an inrui a, nisienlakhawm, uoin lei a ni nawh; an pêm an pêm a, nisienlakhawm, zu lei a ni nawh.

¹⁰LALPA chun îmu hêna thlarau chu in chungah a buok a, in mit, zâwlneihai chu, ân sîmtir a; in lu, hmutheituhai chu, ân khum ta si a.

¹¹Chuongchun, inlârna hrim hrim in ta dingin lekhabu châr tlata thu ang a ni ta a, chu chu mihaiin lekha thiem mi kuomah, “Lunginsiettakin hi hi tiem rawh,” tiin an pêk hlak a; chun, ama chun, “Ka tiem thei nawh, châr tlat a ni hi,” a ti hlak;

¹²chun, lekhabu chu lekha thiem naw mi kuomah, “Lunginsiettakin hi hi tiem rawh,” tiin a pêk hlak a; chun, ama chun, “Lekha ka thiem nawh,” a ti hlak.

¹³Chun, LALPA chun, “Hieng mihai hin an mi hung hnai a, an bau le an hmûr hin an mi chawimawi hlak deha chu, an lungril chu keia hlatah an sawn hlak a, an mi ṭina chu mihriemhai thupêk miin an inchûktir el chu a nih;

¹⁴chuleiin, ngai ta, hienghai lai hin thilmak thaw nâwk nghâl ka ta, thilmak, thilmaktak el chu; chuongchun, an mi varhai varna chu bohmang tâng a tih, an mi bengvârhai hrietna chu thupin um tâng a tih,” a ta.

¹⁵An remruot chu LALPA kuoma thup dinga inthûktaka zawngtuhai chu an chung a rik ie! an thilthawhai chu inthim hnuoiah a um a, “Tuin am mi hmûng a ta? Tuin am hriet khawm mi hrieng a ta?” an ta.

¹⁶Thilhai hi in suklinglet vawng hlaka aw! Bêlhemtu chu bepil ang chaua ngaiin a um ding am a nih? Thilsiem chun a siemtu chu, “Ama mi siem ka ni hlak lêm” a ti ding am a ni? annawleh, thil inngîra um chun ân ngîrtu chu, “Hrietna hrim a nei nawh,” a ti ding am a ni?

¹⁷Sâwt nawte hnungah ni lo am a ni, Lebanon chu hnuoi ṭhatak hmuna inchangtira uma, hnuoi ṭhatak hmun chu ramhnuoia ngaia a um ding chu?

¹⁸Chu nia chun nasêthai chun lekhabu thu chu nain hre tâng an ta, mitdelhai mithai chun inthim hnuoi le inthim laia inthawkin hmu tâng an tih.

¹⁹Thuhnuoirawlhai khawmin LALPAA chun an hlimna chu sukpung tâng an ta, mihriem laia rimsihai chu Israelhai Mi Inthienga chun lâwm tâng an tih.

²⁰Mi ṭium chu iengkhawm ni lova siemin um tâng a ta, hmusittu chu a bo ta a, khawhlona nghâkhlatuhai po po chu sukbohmangin an um ta si a,

²¹chuonghai chun mi chu thupawi thuah suksuoltuah an siem hlak a, kul kawtkhârah kâwktu âwkna dingin châng an kam hlak a, mi fel chu thil teplo mei meiin an inkhêltir hlak.

²²Chuleiin, LALPA, Abraham intlantu chun, Jakob sûnghai chungchâng thuah hieng ang hin a tih, “Jakobhai chu tuhin chu muolpho ta naw ni hai a, an hmai chu dâng ta bawk naw ni.

²³An nau, ka kutsuokhai chu, anni laia an hmu chun, ka hming chu sukthieng lem tâng an tih; anih, Jakobhai Mi Inthieng chu sukthieng an ta, Israelhai Pathien chu ṭi tâng an tih.

²⁴Thlaraua invâkhmanghai khawm chun hrethiem tâng an ta, mi chierhai chun thuinchûktir chu inchûktir tâng an tih,” tiin.