Read Hmar ISAI 30 Bible Online

ISAI 30 - Hmar bible

ISAI 30

¹LALPA chun, “Nau helhmanghai chu an chung a rik ie! chuonghai chun mi an râwn a, kei ruok chu an mi râwn si naw a, an suol chunga suol an belsana dingin inkhumnain an inkhum a, ka thlarau thu ruok chun an inkhum si naw a;

²Pharao hrâtnaa insukhrât ding le, Aigupta hlim ring dingin, ka bau indawn si lovin Aigupta rama fe thlâk tumin an fe a.

³Chuleiin, Pharao hrâtna chu in muolphona ni tâng a ta, Aigupta hlim in lo ring hi in inzakna ni tâng a tih.

⁴A mi lienhai chu Zoan khuoah an um a, a palaihai chun Hanes khuo an tlung ta si a.

⁵An ta dinga ṭhathnemna hrim nei lo mi, ṭhangpuitu ni lova, ṭhathnemna nei mi ni dêr lova, inzakna le hmingsietna ni lemhai chu, an rêngin lân zâpui an tih,” a ta.

⁶Sim rama sahai phurrik chu. Lunginzîngna le thlaphângna ram, sakeibakneipui le sakeibakneichal, rûlhmuk le rûl chawk vuong thei suokna ram chu, an sum chu sabengtungte chunga dâm, an rohai chu sanghâwngsei zângpâwngahai chun phurin an ta dinga ṭhathnemna nei naw mihai kuoma pêk dingin, an fe tlâng duol duol a.

⁷Aigupta chun ṭhahnem lotak le, ṭhangkai lotakin a ṭhangpui hlak si a; chuleiin a nih, ama chu, “Rahab ṭhung ṭawk ṭawknu” kân bûk chu.

⁸Tuhin fe la, chuong chu an hmaa lekhaziekna phêkah ziek la, lekhabua khawm ziek rawh, hi hnunga kumkhawtluonga ding a ni theina dingin.

⁹Chuonghai chu mi hel hmang dâm, nau khêlhlip dâm, nau, LALPA dân ngai nuom lohai an ni si a;

¹⁰hmutheituhai kuomah, “Hmu naw ro,” zâwlneihai kuomah, “Thil indikhai mi hrillâwk ro, thil inhawi tieng kan kuomah hril ro, hlêmna thu hrillâwk naw ro;

¹¹lampui boah fe ro, lampui sîrah pêt ro; Israelhai Mi Inthieng chu kan hmaa inthawk hin sukbo ro,” ti hlaktuhai chu.

¹²Chu lei chun, Israelhai Mi Inthieng chun hieng ang hin a hril a, “Hi hi thu hi in hmusit lei le nêksâwrna le kâwmawsietna in ring a, a chunga in innghat leiin;

¹³hi khawhlona hi nangni ta ding chun lung bang insângtak a se lai, chim vâng vâng, pâwng pûr, kârlova, mitkhapkârlova se rup ding ang hi a ni ding a nih.

¹⁴Chuongchun, bêlhemtu bêl chu an suknawi ang hin, hla um dêr lova kawinawiin, a hlek laia, behâr thuka mei lâkna ding amanih, tuikhura tui thâlna ding amani khawm um lo khawpin, sukkawi nawi a tih,” tiin.

¹⁵Lalpa PATHIEN, Israelhai Mi Inthieng chun hieng ang hin a hril ta si a, “Kîr nâwka châwla umin sandamin um in ta; muongtaka umnaa le ringtaka umnaa hin in hrâtna um a tih,” tiin, nisienlakhawm, in nuom si nawh.

¹⁶“Ni lo, sakawr chunga chuongin tlân dur dur kan tih,” in ti lem si a; chuleiin, tlân dur dur ngei in tih; “Thil hrâttak chungah chuong kan tih” in ti a; chuleiin, a hnawttu dinghai cheu chu hrâttak nîng an tih.

¹⁷Mi pakhat ihrâwkin tlân dur dur in tih; a tâwpa chun tlâng sîpa pholêng târ ang le, muol chunga inchikna mâksana um angin la um el in tih.

¹⁸Chuleiin, LALPA chun a lunginsiet theina ding cheuin, nghâk a ta, chuleiin, a lainat theina ding cheuin chawimawiin um a tih; LALPA chu rorêl felna Pathien a ni si a; ama nghâktuhai po po chu an hamṭha ie.

¹⁹Mihai chu Jerusalema Ziona chun an um ding a ni si a; ṭap nâwk ta naw ti niu a, in khêk ria chun ama chun lunginsiet ngei ngei a ti cheu a, a hriet phingleh dawn a ti cheu.

²⁰Lalpa chun lunginzîngna bu le rinumna tui pe sienla cheu khawm, in inchûktirtuhai chu inbihmangin um ta naw ni hai a, in mitin in inchûktirtuhai chu hmu lem tâng a tih;

²¹chun, changtienga kal in chawiin amanih, vawitienga kal in chawiin amanih, hnungtienga thu, in nain, “Hi hi lampui a nih, hitaka hin fe ro,” ti hre pei a tih.

²²Chun, in tangkaruo milim siem, tangkaruoa cheina le in rângkachak milim sung, rângkachak tuia inluonna chu, suksieng in ta, thil pawrche angin pei tâng in tih; a kuoma chun, “Fe hmang dai rawh,” tîng in tih.

²³Chuongchun, ama chun in bu chi hnuoia in tu ding ta ding chun ruotui chu pêng a ta; hnuoia thil mâwnghai chu bu dingin pêng a tih; chu chu ṭhatak, hlâwktak nîng a ta, chu nia chun in ranhai chu ran tlatna hmun lientakahai chun tlâng an tih.

²⁴Bâwngchal le sabengtungtê hnuoi inlettuhai chun bu al, suodûr le leipupa sukfai sa, fa bawk an tih.

²⁵Chun, inthatna nasatak nia râl vêng inhai chu a chim ni chun, tlâng insâng tina le muol pâwng insâng tina chun vadungpuihai le vadungtê tui luonghai hung um a tih.

²⁶Chu naw khawm chu, LALPA chun a mihai silna chu a tuom a, an sâtna pawphai chu a sukdam ni chun, thla var chu nisa var tlukin um tâng a ta, nisa var chu a lêt sariin, ni sari sûng var tlukin, um tâng a tih.

²⁷Ngai ta, LALPA hming chu, a lunginsennaa chawk hlut hlut meikhu sâmup intung lui lui lai chun, hlataka inthawkin a hung ie; a hmûrhai chu lungninawnain a sip a, a lei chu thil kânghmang mei ang a na;

²⁸a thuok chu bohmangna leidâra hnam tin rel dingin, vadung rîng chen zet a kuong liem dûl dûl ang a nih; chun, mi tin baua chun ṭhuoi suoltirna kei dingin hrui um a tih.

²⁹Chun, zâna ruoiṭhe inthienga an ṭhe a, hla an sak angin hla sak in tih; LALPA tlânga Israelhai Lungpui kuom tlung dinga theihle le an fe laia lungril hlimna an nei angin lungril hlimna khawm nei in tih.

³⁰Chun, LALPA chun a râwl ropuitak chu inhriettir tâng a ta, a lunginsenna nasatak le thil kânghmang meichawkin, thlipui le ruopui le rielin, a kut thlâk dân chu inentir tâng a tih.

³¹LALPA râwl lei chun Assuria mi, hembâwka mi vaw hlaktu chu suknawiin a um ding a ni ta si a.

³²Ama chu hmawl ruotsaa LALPAIN a vuok po leh khuongtêhai le ṭingṭanghai leh vuong a ta; a hmawl inleta inthawnahai chun anni chu thâwng a tih.

³³Topheth pakhat chu inhma daia lo buotsai tah a ni si a, anih, lal ta ding chun siem zosa hieu a nih; inthûktak le lientakin a siem a, a thil sêkkhâwl chu mei le thing tamtak a nih; LALPA thuok, kât vadung luong ang chun a sukkâng dur dur a.