Read Hmar ISAI 32 Bible Online

ISAI 32 - Hmar bible

ISAI 32

¹Ngai ta, lal pakhat chu feltakin lalah ṭhung a ta, mi lienhai chun rorêlna felin ro rêl an tih.

²Mi pakhat chu thlipuia inthawka inbîkna hmun ang le, ruopuia inthawka inbîkna ang nîng a ta, hmun ṭâwla tui luonghai ang, ram châutaka lungpui lientak hlim ang el chu.

³Chuongchun, hmutuhai mit chu fie naw naw ni a, hretuhai na chun ngai a tih.

⁴Thaw thut hmanghai lungril chun hrietna thu chu hrefieng a ta, danginâwkhai lei chu fietakin ṭawng thei a tih.

⁵Mi suol chu mi tiktlai ti nâwk ta naw ni hai a, mi vervêk chu mi inzaum ti nâwk ta bawk naw hi hai.

⁶Pathien inza nawna thil thaw ding le, LALPA hêkna dinga thu indik naw hril dingin, phîngṭâmhai phîng sûng sukruok ding leh, dangchârhai dâwn ding sukbohmang dingin, mi suol chun suol thu a hril ding a ni si a, a lungril chun thil suksuol bawk a tih.

⁷Mi vervêk thuomhnawhai chu ṭha nawtak a na; pasiehai chun thu dik an hril khawmin mi rimsihai chu khêl thua sukbohmang dingin ama chun thil suol thaw dingin a ngaituo hlak.

⁸Mi tiktlai ruok chun tiktlaina thil tieng chu a ngaituo hlak a; chuongchun, tiktlaina tieng thilahai chun um zing a tih.

⁹Nuhmei um mei meihai, tho unla, ka râwl hi ngai ta u; naunu ngaisamhai, ka thu hrila hin na sit ro.

¹⁰Nuhmei ngaisamhai, kum khat le ni ieng amani zât chena chun lunginzîng tâng in tih; grêp lo ding hlak a um âwm si naw a, grêp lo khâwm dinga chun iengkhawm a hung pieng âwm si naw a.

¹¹Nuhmei um mei meihai, inthin ro; mi ngaisamhai, lunginzîngtakin um ro, inhlîp unla, saruokin insiem unla, in kâwngahai chun saiip puon bi ro.

¹²Lo ditumhai lei le grêphrui ra nuom mi lei chun in âwm inchum inchum ro.

¹³Ka mihai rama hin hlohlingneihai le buorhai chu tlâng a tih; anih, khawpui hlimumtaka hlimna in po pohai chunga chun,

¹⁴lal in chu mâksanin a um ding a ni si a; mi tamna khawpui chu suoksanin a um ding a na; a muol pâwng le a râlvêng bûkhai chu kumkhaw pûk dâm, ram sabengtung lâwmna dâm, ranruol tlatna hmunhai hung nîng a tih;

¹⁵Chung tienga thlarau chu ei chunga bura a um a, thlalêr chu hnuoi ṭhatak hmuna ân chang a, hnuoi ṭhatak hmun chu rampuia ngaia a um hmakhat chun.

¹⁶Chupha chun rorêl felna chu thlalêra chun chêng a ta, felna chu hnuoi ṭhatakna hmuna chun um a tih.

¹⁷Chun, felna sinthaw chu inremna nîng a ta, felna thil suok chu kumkhuoa muongtaka umna le ring tlata umna nîng a tih.

¹⁸Chuongchun, ka mihai chu râlmuonga umnaahai le in dettakhaia le châwlna hmun muongumtakhaia chun um tâng an tih.

¹⁹Nisienlakhawm, rampui chu sukthlu dingin riel tla dur dur a ta; khawpui chu suktlâwm dêrin um a tih.

²⁰Tui luongna po po panga chi the hlaktuhai le, bâwngchal le sabengtung inthla hlakhai, in hamṭha ie.