Read Hmar ISAI 38 Bible Online

ISAI 38 - Hmar bible

ISAI 38

¹Chuong lai chun Hezekia chu thi ngamin a na a; Chun, Amoz naupa zâwlnei Isai chu a kuomah a hung a, a kuomah, “ LALPA chun hieng ang hin a tih, ‘I sûnghai khawsak dân ding rêlpêk rawh; dam suok lovin, i thi ngei ding a ni si a,’ tiin,” a ta.

²Chuongchun, Hezekia chu bang tieng ngha chun ân let a, LALPA kuomah a ṭawngṭai a.

³“Aw LALPA, i hmaa thutak le lungril ṭha famkim puta ka um hlakzie le, i mithmua thil ṭha ka thaw hlakzie kha, ka hni che hi hre zing raw aw,” a ta. Chun, Hezekia chu a ṭap a ṭap ta a.

⁴Chuongchun, LALPA thu chu Isai kuoma chun a hung tlung a,

⁵“Fe la, Hezekia kuomah hril rawh, ‘ LALPA, i pu David Pathien chun hieng ang hin a tih. I ṭawngṭâina kha ka hriet a, i mitthlihai khawm ka hmu a, ngai ta, i dam sûng nihai hi kum sâwmpangain suksei ka tih.

⁶Chun, nang le hi khawpui hi Assuria lala inthawkin sanhim ka ta, hi khawpui hi hum ka tih.

⁷Chun, LALPAIN a thil hril hi a thaw ngei ding a nih ti, hi hi LALPAA inthawka i ta dinga inchikna chu nîng a tih,

⁸en ta, sirbia nisa hlim saw, Ahaz dâr chin hrietnaa nisaa sukhnuoia um ta saw, sirbi sâwm chenin sukkîr nâwk ka tih, a tih,’ tiin.” Chuongchun, nisa chu ân hnuoi ṭana dâr chin hrietnaa chun sirbi sâwm chenin a kîr nâwk ta a.

⁹Juda lal Hezekia damnaw, a dam nâwk hnunga a lekha ziek chu:

¹⁰“Ka dam sûng nihai inding lai tak hin thlân kawtkhârahai chun ka lût ding a na, Ka dam sûng kum la bâk dinghai chu lâkpêkin ka um tah, ” ka ti a.

¹¹“ LALPA, LALPA ngei chu mi hring rama hin ka hmu ta naw ding a na, Khawvêla umhai laia hin mihriem ka hmu ta naw ding a ni hi.

¹²Ka umna hi sawnin a um a, berâm vêngtu puon in angin ka kuoma inthawka lâk hmangin a um ta a. Puon khâwngtuin a puon chu a zuol angin ka hringna hi ka zuol a; ama chun puonkawla inthawk chun a mi chep bawng hmawk ding a nih. Nangin ni khat le zân khat thil thuah i mi suktâwp el ding a ni hi,” ka ti a.

¹³Zîngkâr chenin ka to hrâm hrâm a, Sakeibaknei angin ka ru po po a suktliek vawng a: Nangin ni khat le zân khat thil thuah i mi suktâwp el ding a ni hi.

¹⁴Pelêu amanih, vakâwl amanih angin kân hrâm kân hrâm a, Vaṭhu angin kân rûm kân rûm a, chungtieng thlîrnain ka mit ân vai zo tah. Aw LALPA, nêksâwra ka um hi, nang chun a bul mi tumpêk la.

¹⁵Ieng am hril ka ti aw? ama chun a mi biek a, ama bawk chun a thaw ta a: Ka hringna ninginîp lei khan ka dam sûng kum po poa chun damtêtein fe dîm dîm tâng ka tih.

¹⁶Aw Lalpa, hieng ang thil lei hin mihriemhai hi an hring hlak a, Chuonga chau chun ka thlarau hringna chu a um hlak; Chu chu lei chun mi sukdam nâwkin mi sukhring nâwk rawh.

¹⁷Ngai ta, ka lungmuongna dingin a nih, ninginîpna nasatak ka nei kha; Nisienlakhawm, nang chun ka hringna i lunginsiet leiin, sietna khur sûnga inthawk chu i sanhim ta a; Ka suolhai po po kha i hnungtienga chun i pei vawng si a.

¹⁸Thlân hin ân pâk thei si naw che a, thina hin a chawimawi thei bawk naw che; Seola zu fehai chun i thutak chu an beisei thei naw a nih.

¹⁹Mi hringin, mi hringin, anni ngei chun vawisûna ka thaw ang hin inpâk an ti che; Pa chun a nauhai kuomah i thutak chu inhriettir a tih.

²⁰LALPA chu a mi sandam dingin ân zosa zing a nih, Chuleiin, ka dam sûng po poin, LALPA ina chun, Ka hlahai hi ṭingṭang leh sak ka tih.

²¹Isai chun, “Theichang ra hlawm khat la sienla, damdawi a bela bel mi dingin a khuoihliah bel raw se; chuongchun, dam a tih,” a lo ti tah a nih.

²²Hezekia khawm chun, “ LALPA inah hang fe nâwk ka tih ti hrietna ieng inchikna am hung um a ta?” a lo ti tah a nih.