Read Hmar ISAI 40 Bible Online

ISAI 40 - Hmar bible

ISAI 40

¹Thlamuon ro, ka mihai hi thlamuon ro, in Pathien chun a tih.

²Jerusalem mihai kuomah thlamuongna tieng pangah thu hril unla, an indona chu a tâwp a, an suolna chu ngaidam an ni a, an thil suksuol po po aiah LALPA kuta inthawkin a let hniin an hmu tah ti hril ro.

³Mi khêk râwl chun, “Thlalêrah LALPA lampui buotsai unla, ram ṭâwla chun ei Pathien ta dingin lamlien sukruol ro.

⁴Ruom tin suksâng ni vawng a ta, tlâng tin, muol tin sukhnuoi ni bawk a tih; lampui kâwihai chu suktlûn nîng an ta, ân ṭum nawna laihai chu sukruol ni bawk a tih;

⁵chun, LALPA ropuina chu suklang nîng a ta, mi po poin chu chu hmu seng an tih; LALPA bau chun a hril ta si a,” a ta.

⁶Râwl chun, “Khêk rawh,” a ti a. Chun, kei chun, “Ieng thu hrilin am khêk ka ta?” ka ta.

⁷“Mi po po hlohna ang an na, an ropuina po po khawm phûl pâr ang a nih: LALPA thuok chun a mût leiin hlohna chu a vuoi a, a pâr chu a ṭuoi hlak; mihai chu hlohna ang an ni ngei el.

⁸Hlobet chu a vuoi a, a pâr chu a ṭuoi hlak: ei Pathien thu ruok hi chu chatuonin um zing a tih.”

⁹Aw Zion kuoma chanchin ṭha hriltu, tlâng insângtaka hin hang fe rawh, aw Jerusalem kuoma chanchin ṭha hriltu, inringtakin i râwl insuo rawh; insuo rawh, ṭi naw rawh; Juda khuohai kuoma chun, “En ta u, in Pathien hi!

¹⁰En ta u, Lalpa PATHIEN chu mi hrâttak angin a hung ding a ni hi; a bân chun a aiah ro rêl a tih; en ta u, a lâwmman chu a kuomah a um hi, a thungna chu a hmaah a um bawk a.

¹¹Ama chun berâm vêngtu angin a pâwl chu châwm a ta, berâmtehai chu a bânin pawm khâwm a tih, a ângsûnga siein fepui a ta, te ṭhuoi laihai chu damtêin ṭhuoi diel diel a tih,” ti rawh.

¹²Tuin am tuihai chu a kutpha zâwla chau inkhi a, vân khi khâp chaua inkhi a, hnuoia pilvut hi tekhâwng pakhat chaua thun vawng a, tlânghai chu khaina chaua bûk a, muol pâwng hai chu bûkna chaua bûk kha le?

¹³Tuin am LALPA thlarau chu thil thaw dân ding a khîkhmu hlak a? Annawleh, tu am a remruotpêktu nia ama inchûktir hlak?

¹⁴Ama chun tu am a râwn a, tuin am ama chu inhriettir a, rorêlna kawng inentir a, hrietna inchûktir a, hrietthiemna kawng inentir hlak?

¹⁵Ngai ta, hnam tin chu bâlṭina tui far khat ang chau an na, bûknaa thil nawi mahla kai ang chaua ngai an nih; ngai ta, ama chun thlierkârhai chu thil chiterek angin a lâk nel nel el hlak a.

¹⁶Lebanon meu khawm ti khawp a ni naw a, a rama ranhai khawm pumrawhmanga inthâwina khawp an ni bawk nawh.

¹⁷Hnam tinrênghai chu a hmaa chun iengkhawm an ni naw a, ama ngai chun iengkhawm ni lo nêka tlâwm lem, boruok el an nih.

¹⁸Pathien chu tu lêm hrilkhîng in ta? Annawleh, ieng lim am ama le chun hrilkhîng in ta?

¹⁹Milim siemfâwm hi, sinthaw mi chun a sung a, rângkachak sut mi chun rângkachakin ân luon a, chu chu ding chun tangka khaidiethai a sungpêk hlak.

²⁰Chuong ang thilpêk pe zo lova, pase taluo chun thing hmawn lo ding a thlang hlak; milem siemfâwm, inhnîng lo ding, a ta dinga inngîrtirpêktu ding ama ta dingin a zawng hlak.

²¹In lungrilin in hriet ngai naw am a nih? In nain in hriet ngai naw am a nih? A tira inthawk khan an hril naw cheu am a nih? Leihnuoi insieng tira inthawk khan in hrietthiem naw am a nih?

²²Ama chu leihnuoi inkuolkhumna chunga ṭhung chu a nih; a mithmua chun hnuoi chunga umhai chu khâuhai ang chau an nih, ama chu vân khi puon in chung anga keiphar a, puon in umna ding hmuna zâr a;

²³mi lienhai iengkhawm ni lova siem hlaktu chu a nih; ama chun hnuoia rorêltuhai chu boruokah a siem hlak.

²⁴Anih, phun an ni naw a, anih, tu an ni nawh; anih, an kûng chun hnuoiah zung a kei nawh; chu nawa khawm, ama chun anni chu a mût a, an vuoi a, thlivirin busi a lâk hmang angin a lâk hmang hlak.

²⁵Tu lêm mi hrilkhiin, tu tluk ang chau âm in mi ruot ding a na? Mi Inthieng chun a tih.

²⁶Chungtienga khin in mithai hang inlên unla, khienghai khi tu siem am an na, en ta u: ama chun sipaihai khi indawt peiin a ṭhuoi suok hlak a, an hmingin a ko seng hlak a; a hrâtna nasat lei le, thilthawtheina tienga a hrât leiin pakhat khawm kim naw an um ngai nawh.

²⁷Iengdinga, aw Jakobhai, hieng anga in thaw am a na, iengdinga, aw Israelhai, hieng anga in hril am a na, “Ka lampui hi LALPAA inthawka thup a na, ro a mi rêlpêkna hi ka Pathiena inthawka lâk hmang a ni tah,” ti hi?

²⁸In lungrilin in hriet zing hlak nâwm a nih? In nain in hriet ngai nâwm a nih? Kumkhaw Pathien, LALPA, kâwlkawdawng chen Siemtu chu, a châu ngai naw a, a sâwl ngai bawk nawzie hi; a hrietthiemzie chu zawng suok ruol a ni nawh.

²⁹Châuhai kuoma chun thilthawtheina a pêk hlak a; hrâtna hrim nei nawhai chu a sukhrât hlak.

³⁰Tleirâwlhai meu khawm sâwlin châu an ta, tlangvâlhai khawm chu tlu dêr an tih;

³¹LALPA nghâktuhai ruok chun an hrâtna chu siem ṭha nâwk an ta, mupuihai angin thlain hang vuong an ta, sâwl lovin tlân an ta; châu lovin kein fêng an tih.