Read Hmar ISAI 42 Bible Online

ISAI 42 - Hmar bible

ISAI 42

¹Ka siehlaw, ka chel zing, ka ithlang, ka lungrilin a ilawm êm êm hi en ta u; a chungah ka thlarau ka sie tah: Jentailhai kuoma pêk dingin rorêlna thu la suok a tih.

²Khêk naw ni a, a râwl insuo bawk naw ni a; kawtthlêrah a râwl chu inhriettir bawk naw nih.

³Luong pawr suktan naw ni a, khawnvar phita de rien rien khawm sukmit naw nih; indikna chu ringumtakin phur suok a tih.

⁴Hnuoia hin rorêlna ân umtir hmakhat chun ama chu châu naw ni a, beidawng bawk naw nih; chun, thlierkârhai chun a dân thu chu nghâk zing an tih.

⁵Pathien, LALPA, vân siemtu, keiphartu, hnuoi le a sûnga inthawka suok po po suklientu, a chunga mihai kuoma inthuokna petu chun hieng ang hin a tih:

⁶“Kei LALPA hin felnain ka ko che, i kut chel ka ta, humhim ka ti che a, mihai thuthlung ding le, Jentailhai sukvartu dingin ka ruot che a nih:

⁷mitdelhai mit sukvar ding le, mi intânghai intângna ina inthawka ṭhuoi suok ding le, inthim laia ṭhunghai intângna ina inthawka ṭhuoi suok dingin.

⁸LALPA chu ka nih, chu chu ka hming a nih; ka ropuina hi mi dang kuomah pe naw ningah a, inpâk ka hlawna hi milim siem fâwmhai kuomah pe bawk naw ning.

⁹Ngai ta u, kha hma thilhai chu a hung tlung tah, thil tharhai ka hril a ni hi; an mâwng hmain an chanchin ka hril cheu a ni hi.

¹⁰Tuisuorieta zu fehai le, a sûnga um po pohai le, thlierkârhai le, a chunga um po pohai, LALPA chawimawiin hla thar sak unla, leihnuoi tâwpa inthawk khawma ama inpâkna hla sak ro.

¹¹Thlalêr le an khawpuihai chun an râwl insuo raw se, Kedarhai umna khuohai chun: Sela khuoa umhai chu hlimtakin hla sak hai sienla, tlâng sîpa inthawk chun khêk raw se,

¹²LALPA chu sukropui sienla, thlierkârahai chun ân pâkna thu hril raw se.

¹³LALPA chu mi hrâttak angin suok a ta, indo mi angin lunginsenna chawktho a tih, khêk a ta, anih, inringtakin khêk a tih; ama dotuhai chunga chun hrâttakin châng a tih.

¹⁴Sâwttak ka to zing ta a; ka um ṭawk ṭawkin kân sûm hrâm hram hlak; tu ruok hin chu nuhmei nauhase angin khêk tuor tuor ka ta; inthuok huom huomin inthuok hlawp hlawp bawk ka tih.

¹⁵Tlânghai le muol pâwnghai chu sukchim ka ta, a hlohnahai po po chu sukṭâwl vawng ka tih: vadunghai chu thlierkâra hai siem ka ta, dîlhai chu sukkang ka tih.

¹⁶Mitdelhai chu an hriet ngai naw lampuiah ṭhuoi ka ta, an hriet ngai naw lampuiahai chun ṭhuoi ka tih; an hmaa chun inthim chu varah siem ka ta; lampui kâwi laihai chu suktlûn bawk ka tih. Chuong thil chu thâwng ka ta, anni khawm thlathlam naw ningah.

¹⁷Milim siem fâwmhai ring a, milim sunghai kuoma, “Kan pathien in nih,” tituhai chu innghatkîrtirin um an ta, nasatakin muolpho an tih.

¹⁸Nasêthai, nain hre ro; mitdelhai, in hmu theina dingin en ro.

¹⁹Ka siehlaw naw chu tu mit am ân del a? Annawleh, ka tirko tir angin tu na am a sêt a? A mi remtu angin tu mit am ân del a? LALPA siehlaw angin tu mit am ân del a?

²⁰Thil tamtak i hmu a, nisienlakhawm, i lungrilah i vawng zing ngai naw a, nahai chu ân âwng a, anachu a hriet ngai nawh.

²¹Dân chu a felna leia sukliena suk- inzaum chu LALPA chun ṭha a ti a.

²²Nisienlakhawm, hieng mihai hi rûkru inrûkpêk le rawk tuok mi an na; khurhaia tla an ni vawng a, intângna inahai khum hmang an na; sal ding an na, tukhawma an sanhim si naw a; râllâka lâk ding an na, tukhawma, “Pe nâwk rawh,” an ti si nawh.

²³Nangni lai hin chuonga chun tu am na sit ding um cheu chu? Hun la hung tlung dinga ngaia hre ding tu am in um a?

²⁴Tuin am Jakobhai râllâka la dinga pe a, Israelhai inruhai kuoma pe chu? LALPA a chunga thil ei suksuolna chun a pêk a ni naw am a nih? a lampuiahai an fe nuom si naw a, an dân thu hlak an awi si nawh.

²⁵Chuleiin, a lunginsenna nasatna le inthawna ṭha chu an chungah a bunthlâk a; chuongchun, anni chu a raw vêl a, nisienlakhawm, an lungrilin an ngaituo si nawh.