Read Hmar ISAI 43 Bible Online

ISAI 43 - Hmar bible

ISAI 43

¹Tu ruok hin chu aw Jakob rawihai, LALPA nangni siemtu le, aw Israel rawihai, nangni inngîrtirtu chun hieng ang hin a tih, “Ṭi naw ro, kân tlan ta cheu hi; in hmingin ka ko cheu a, ka ta in nih in sawnnaw.

²Tuihai in palkai lai khawmin kei in kuomah um ka ta; vadunghai in palkai lai khawmin chîm tlum naw ni cheu; meia in fe thleng lai khawmin kâng naw ni cheu a; meichawkin sukchawk bawk naw ni cheu.

³Kei hi LALPA in Pathien Israelhai Mi Inthieng, nangni sandamtu ka ni si a; nangni intlanna dingin Aigupta ram ka pêk a, Ethiopia le Seba ramhai chu nangni aiah ka pêk a.

⁴Ka ngaia hlutak in na, mi inzaumtak in na, ka hmangai bawk cheu leiin, nangni aiah mihai pêng ka ta, in hringna aiah mi tin pêng ka tih.

⁵Ṭi naw ro, in kuomah ka um si a; in thlahai chu khawsak tienga inthawkin hung ṭhuoi ka ta, khawthlang tienga inthawkin ṭhuoi khâwm ka ti cheu a,

⁶hmârtieng kuoma chun, ‘Inthla ro,’ tîng ka ta, simtieng kuoma chun, ‘Hrên zing naw ro,’ tîng ka tih; ka naupasalhai chu hlataka inthawkin hung ṭhuoi unla, ka naunuhmeihai chu leihnuoi tâwpa inthawkin hung ṭhuoi ro;

⁷ka hming puthai po le ka ropuina dinga ka isiemhai po chu; anni chu kân ngîr an nih, anni chu ka siem an nih.

⁸Mit nei si mitdelhai le, na nei si nasêthai chu, ṭhuoi suok ro.

⁹Hnam tinrêng inkhâwm sienla, mi tin um khâwm raw se; anni laia tuin am hi hi hril thei a, kha hmaa thilhai mîn hriettir thei? Thiem inchangtira an um theina dingin an thu hretuhai chu hung ṭhuoi raw hai se; annawleh, nain hre hai sienla, “Thutak a nih,” ti raw se.

¹⁰“In mi hriet a, in mi ring a, ama chu ka nih ti in mi hriet theina dingin nangni hi a mi hrietpuituhai in nih; ka siehlaw ka ithlang khawm chu,” LALPAIN a tih, “Ka um hma chun pathien hrim hrim inngîr an um naw a, ka um hnunga khawm um bawk naw ni hai.

¹¹Kei, keima ngei hi, LALPA chu ka nih; keima naw chu sandamtu hrim hrim an um nawh.

¹²Keimain ka hril a, ka sandam a, kân hriettir a, nangni lai khan ram dang pathien hrim hrim an um naw kha; chuleiin, nangni hi ka thu mi hrietpuituhai in nih, LALPAIN a tih, chun, kei chu Pathien ka nih.

¹³Anih, ni um china inthawk khan kei chu ama chu ka nih, chuongchun, ka kuta inthawka sansuok thei tukhawm an um dêr nawh, sin thâwng ka ta, tuin am chu chu sût an ta?” tiin.

¹⁴LALPA, nangni intlantu, Israelhai Mi Inthieng chun hieng ang hin a tih, “Nangni leiin Babulon khuoa chun sipaihai ka tir a; chuongchun, an rêng chun, Kaldaihai chu, an lâwmna lawngpuiahai chun mi tlân hmang ṭhuoiin ṭhuoi thlâng ka tih.

¹⁵Kei hi LALPA, in Mi Inthieng, Israelhai Siemtu, in Lal chu ka nih,” tiin.

¹⁶LALPA chun hieng ang hin a tih: tuipuia lampui siemtu le, tui nasatakhaia lam siemtu;

¹⁷tawlailîr le sakawr, sipaihai le thilthawtheina ṭhuoi suoktu chun (chuonghai chu ân zâl khâwm rum a, tho nâwk ta naw ni hai a, an chimit zo a, khâwnvar phita sukmit angin sukmitin an um tah) hieng ang hin a tih,

¹⁸“Kha hma thilhai chu hre zing naw unla, kha hma thilhai kha ngaituo bawk naw ro.

¹⁹Ngai ta u, thil thar ka thaw ding a nih; tuta inthawk hin mâwng a tih; chu chu in hriet naw ding am a nih? Thlalêra meu khawm lampui siem ka ta, ram ṭâwla chun vadunghai siem bawk ka tih.

²⁰Ka mi, ka ithlanghai chu dâwn ding ka pêk theina dingin thlalêra chun tuihai kân umtir leiin ramsahai chun mi chawimawi an ta, sihalhai le vate rîngsei chen khawmin;

²¹chuong ka mihai chu ka ta dinga inpâkna an suklang theina dinga ka ta dinga ka siemhai chu an nih.

²²Nisienlakhawm, aw Jakob, nangin i mi ko si naw a, aw Israel, i mi nghawk ta lem a ni hi.

²³Pumrawhmanga in thilinhlân ran chînhai chu in mi hung pêk ngai naw a, in inthâwina tieng chun in mi chawimawi ngai bawk nawh. Thil inhlânin rawng kân bâwltir ngai naw cheu a, berawin ka suksâwl ngai bawk naw cheu a.

²⁴Mafu hrim hrim tangkain in mîn châwkpêk ngai naw a, in inthâwina thâuhaiin in mi sukkhawp ngai bawk nawh; in suolna phur sinhai in mîn thawtir lem a, in khawhlonahaiin nangnîn in mi suksâwl tah a nih.

²⁵Kei, keima ngeiin, keima le keima lei ngawta in bawsietnahai thaihmang hlaktu chu ka nih; in suolnahai khawm hre zing naw ning.

²⁶Mi hrietpui ta u, ngaituo hmun-khat ei tiu; thiem inchangtira in um theina dingin in thu chu hril ro.

²⁷In thlatu hmasa tak khan thil a suksuol a, in palaihai khawmin ka hmaah an bawsiet a.

²⁸Chuleiin, hmun inthienga mi lienhai chu sukthieng nâwng ka ta, chuongchun, Judahai chu ṭawngsephurah siem ka tih; Israelhai chu insêlna bûrah siem bawk ka tih.