Read Hmar ISAI 50 Bible Online

ISAI 50 - Hmar bible

ISAI 50

¹LALPA chun hieng ang hin a tih, “In nu mâkna lekha, ka mâkna chu, khaw lai am a um a? Annawleh, ka leibatnahai a tu tak kuom âm ka zawr cheu a? Ngai ta u, in khawhlonahai leiin a nih zawra in um chu, in bawsietnahai leiin a nih in nu khawm kha mâka a um chu.

²Ieng leiin am ka hung khan mi hrim hrim an um naw a? Ieng dinga ka ko khan a mi dawn an um nâwm a na? Ka kut hi intlan thei lo dingin suktâwiin a um hrim hrim am a nih? Annawleh, sanhim dingin thilthawtheina hrim hrim ka nei nâwm a nih? Ngai ta u, ka kâwknain tuipui ka sukkang hlak a, vadungpuihai chu ram ṭâwlah ka siem hlak, tui hrim hrim a um naw leiin a ngahai chu an thu a, dangchârin an thi hlak.

³Vân khi inthimnain kân thuom hlak a, saiip puon ân khumna dingin ka siem hlak,” tiin.

⁴Mi sâwltak chu thua ka suksâwldam theina dingin LALPA Pathien chun inchûktirhai lei a mi pêk a; ama chun tûk tinin a keihar a, inchûktirhaiin an hriet anga hre dingin ka na hi a keihar hlak.

⁵Lalpa PATHIEN chun ka na a mi sukhawngpêk a, kei chu ka hel naw a, ka ngha kîr bawk nawh.

⁶Ka ruongzâng hi vawtuhai kuomah ka daw a, ka bienghai hi hmul phawituhai kuomah ka daw bawk a; muolphonaa le chilsâkkhumnaah ka hmai ka hup nawh.

⁷Lalpa PATHIEN chun a mi ṭhangpui ding a ni si a; chuleiin, kân zak ngai naw a; chuleiin, meitâwklung ang tlatin ka ngha hlak, muolpho naw ning ti ka hriet.

⁸Thiem mîn changtirtu chu a hnai a, tuin am mi do a ta? Ngîr ve vêng ei tih; a mi dotu chu tu am a ni leh? Mi hung hnai raw se.

⁹Ngai ta, Lalpa PATHIEN chun mi ṭhangpui a tih; tuin am thiemnaw mîn changtir a ta? Ngai ta, chuonghai po po chu silfên angin la hlui a ta, hângthimin fa se vawng a tih.

¹⁰Nangni laia LALPA chu ṭi a, a siehlaw thuawi chu, tu am a na? Inthima lênga var hrim hrim nei naw chun LALPA hming chu ring sienla, a PATHIEN chungah innghat raw se.

¹¹Mei sêm a, thingthu tivar hlak po pohai, ngai ta u, in mei vara le in thingthu tihai lai chun lêng ro. Hi hi ka kuta inthawka in la hmu ding chu a nih, lungngaitaka in la zâlna ding chu.