Read Hmar ISAI 51 Bible Online

ISAI 51 - Hmar bible

ISAI 51

¹Felna hnawttuhai, LALPA zawngtuhai, ka thu hi lo ngai ta u; nangni sutna lungpui tieng le khursûnga nangni cho suokna khur tieng kha en ta u.

²In pu Abraham tieng le nangni neitu cheu Sara tieng kha en ro; ama chu pakhat chau a ni lai khan ka ko a, mal ka sâwm a, mi tamtakah ka siem ta kha.

³LALPA chun Zion chu a thlamuon ta si a; a hmun se tahai po po chu a thlamuon a, a thlalêr chu Eden angin a siem a, a ram ṭâwl chu LALPA huon angin a siem bawk a; chutaka chun lâwmna le hlimna dâm, lâwmthu hrilna le hla sak ri dâm um a tih.

⁴Aw ka mihai, ka thu hi lo ngai unla; aw ka hnamhai, ka thua hin na lo sit ta u; keimaa inthawkin dân thu a hung suok ding a ni si a, mi tin enna dingin ka rorêlna chu inchâwltir ka tih.

⁵Ka felna chu a hnai a, ka sandamna chu a suok ta a, ka bânhai hin mi tin ro rêlpêk a tih, thlierkârhai chun mi nghâk an ta, ka bân hi ring an tih.

⁶Vân tienga hai khin in mit hang inlên unla, hnuoi tienga leihnuoi chu en ro: vân khi meikhu angin lân zâm hmang a ta, leihnuoi hi silfên angin la hlui a tih, a sûnga umhai chu chuong ang bawk chun la thîng an tih; ka sandamna ruok hi chu kumkhuoin um a ta, ka felna khawm hi sukboin um naw ni.

⁷Felna hretu, ka dân thu lungrila vawn mihai, ka thu hi lo ngai ro, mihriemhai hrilsietna ṭi naw unla, an halna cheu leiin lunginzîng bawk naw ro.

⁸Hângthimin silfên a fâk siet vawng angin anni chu a fâk siet vawng ding a ni si a, a ngein sahmul a fâk angin anni chu a fâk ding a ni si a; ka felna ruok chu kumkhuoin um a tih, ka sandamna chu suon po po chenin um bawk a tih.

⁹Aw LALPA bân, har la, har la, hrâtna thar inbel rawh; tienlaia, tienlai suonhai um laia i har ang khan har rawh. Nang hi Rahab[4] sât nawitu, dragon suntu kha i ni an nâwm a nih?

¹⁰Nang hi tuipui, tui inthûk lientak tui sukkangtu, tuipui mawng inthûk chu intlanhai kaina dinga lampuia siempêktu i ni nâwm a nih?

¹¹Chun, LALPA intlanhai chu kir nâwk an ta, hla sak pumin Zion chu tlung an tih; chatuona lâwmna an lu chungahai chun um tâng a ta, lâwmna le hlimna hmûng an ta, lungngaina le inrûmna chu bo tâng a tih.

¹²Kei, keima ngei hi, nangni thlamuontu cheu chu ka nih; thi ding mihriem le hlobet ang chaua siema um ding mihriem naupa ṭia,

¹³LALPA nangni siemtu, vân keiphara leihnuoi innghatsanhai phûmtu theinghila, nêksâwrtu sukse dinga a tin lai lunginsenna lei ngawta sûnnithlâka ṭi zing chu, tu am i ni a? Nêksâwrtu lunginsenna chu khâwlai am a um ta a le?

¹⁴Sal ṭhuoi hmanga um chu inrangtaka insuoin um a ta, thiin khursûngah fe naw ni a, a bu chu um naw bawk naw ni.

¹⁵Kei LALPA i Pathien, a fâwnhai chu inri hum hum khawpa tuipui chawklettu chu ka ni si a; ka hming chu sipaihai LALPA a nih.

¹⁶Chun, vân khi ka keiphar thei a, leihnuoi innghatsan chu ka phûm thei a, Zionhai kuomah, “Ka mihai in nih,” ka ti theina dingin ka thuhai chu i bauah ka sie a, ka kutin ka hum che a nih.

¹⁷Aw Jerusalem, LALPA kuta inthawka a lunginsenna noa mi dâwntunu, har la, har la, tho rawh, nang chun pêm pêmna no berbua mi chu i dâwn a, i dâwn fai rêt a.

¹⁸A naupasal neihai po po lai chun ama ṭhuoitu ding tukhawm an um naw a; a naupasal châwm lienhai po po lai chun a kuta chel tukhawm an um bawk nawh.

¹⁹Hieng thil pahni hin a bur ta che hi; tuin am a ṭhangpui ding che a na? Rausanna le sietna dâm, ṭâm le kâwlhnâm dâm hin; iengtin am thlamuon ka ti che a?

²⁰I naupasalhai chu an châu a, sakêl lêna a âwk angin kawtthlêr tâwp tienga chun an zâl phung a, LALPA lunginsenna le i Pathien kâwkna chun an sip tah a nih.

²¹Chuleiin, nang sukrinum le uoin inrui ni si lova mi inrui, hi hi lo hre ta rawh:

²²i LALPA Jehova, i Pathien, a mihai thu hrilpui hlaktu chun hieng ang hin a tih; “Ngai ta, pêm pêmna no, ka lunginsenna no berbu ngei chu, i kuta inthawkin ka lâk suok tah; dâwn nâwk ta naw ti ni;

²³chuongchun, nangma sukrimsituhai kuta chun sieng ka ta, anni chun i hringna kuomah, ‘Kan hraw ding chein bawkkhup rawh,’ an ti kha; chuongchun, nangin a hrawtuhai kuoma chun i ruongzâng chu leilâk ang le kawthlêr angin i daw kha,” tiin.