Read Hmar ISAI 54 Bible Online

ISAI 54 - Hmar bible

ISAI 54

¹“Aw ching, nau nei lo, nang, hlimtakin hla sak rawh; nang, nauhase ngai naw, hla sak suok phut la, khêk suok rawh: pasal nei mi nauhai nêk chun khawsâwtnu nauhai an tam lem si a,” LALPAIN a tih.

²I puon in hmun chu zau rawh, i umnahai puon in chung chu keipharin um raw se; ret naw rawh, i hruihai chu suksei la, i keimarna hembûrhai chu sukdet rawh.

³Changtieng le vawitienga khawm în dar lien ding a ni si a; chuongchun, i chithlahai chun hnam tin chu roin hluong an ta, khawpui râusan hnungahai chun mîn umtir nâwk an tih.

⁴Ṭi naw, i muolpho âwm si naw a; beidawng bawk naw, muolphoin i um âwm bawk si naw a, i tleirâwl lai muolphona chu i theinghil tain, i hmeithaina hmingsietna khawm chu i hriet zing ta âwm si naw a.

⁵Nangma siemtu chu i pasal a ni si a; a hming chu sipaihai LALPA a nih; Israelhai Mi Inthieng chu nangma intlantu a ni bawk a nih; ama chu khawvêl po po Pathien tîng an tih.

⁶Nuhmei mâk, lungrila lungngaitak, tlangvâl laia nuhmei tah, pei hnung ko nâwk angin LALPAIN a ko che a ni hi, i Pathienin a tih.

⁷Mitkhapkâr chau el ka mâk che a; nisienlakhawm, lunginsietna nasatakin ṭhuoi nâwk ka ti che.

⁸Ka lunginsen luotin mitkhapkâr nanga tieng ka hmai ka thup a; nisienlakhawm, kumkhawtluong zainêmnain lunginsiet ka ti che, LALPA nangma intlantu chun a tih.

⁹Chu chu ka ta dingin Noa tuihai ang kha a ni si a; “Noa tuihai chun hnuoi chîm tlum nâwk ta naw ni,” tia ṭawng kân khâm ang khan, “I chungah lunginsen nâwk ta naw ning a, kâwk nâwk ta naw bawk ka ti che,” tiin ṭawng kân khâm tah a nih.

¹⁰Tlâng lienhai chu fe hmang an ta, tlâng chînhai chu sawnin um bawk an tih; ka zainêmna ruok hi chu i kuoma inthawkin fe hmang naw ni a, ka remna thuthlung chu sawnin um bawk naw ni, LALPA a lunginsiettu che chun a tih.

¹¹Aw nang sukrimsik, tuifâwn vawr vawra um, lungmuongna nei lo, ngai ta, i lunghai chu zie mawitakhaiin rem ka ta, i lungphûmhai chu sapphir lunghaiin rem bawk ka tih.

¹²I sîp zumhai chu rubi lungin, i kawtkhârhai chu karbankle lungin, i kul po po chu lung mawihaiin siem ka tih.

¹³I nauhai po po chu LALPA inchûktirin um an ta, i nauhai lungmuongna chu nasatak nîng a tih.

¹⁴Felnaa sukdetin um i ta, nêksâwrnaa inthawka hlatakah um i tih; i ṭi ta naw ding a nih; thil râpthlâka inthawka hlatakah um bawk i ta; a hnai naw ding che a nih.

¹⁵Ngai ta, an la pung khâwm a ni thei, nisienlakhawm, ka thu ni naw ni; nangma thaw dinga pung khâwm taphawt chu nangma leiin tlûng an tih.

¹⁶Ngai ta, kei chun thirsu pûm zâpa a sinthawna ding hriem sut hlaktu chu ka siem a; keima bawkin sukse dingin suksetu ka siem a nih.

¹⁷Nangma thawna dinga hriem sut hrim hrim ṭhahnem naw ni a, lei tinrêng thupawia nangma hung khingtuhai che chu thiemnaw inchangtir i tih. Chu chu LALPA siehlawhai rochan chu a na, an felna chu ka kuoma inthawk a nih, LALPAIN a tih.