Read Hmar ISAI 59 Bible Online

ISAI 59 - Hmar bible

ISAI 59

¹Ngai ta u, LALPA kut chu sandam theilo dingin suktawiin a um naw a, a na chu hre theilo dingin, a sêt bawk nawh:

²in khawhlona chu nangni le in Pathien kâra tlain a sukṭhe lem cheu a nih, naa a hriet nuom nawna dingin in suolnahai chun a hmai chu a hliepêk bawk cheu a nih.

³In kuthai chu thisen sukpawrchein a um a, in kutpârhai hlak khawhlonaa sukpawrchein a um si a; in hmûrhai chun khêl a hril a, in lei chu rîtlona thu hrilin a chier num num hlak.

⁴Tukhawma thubuoi indiktakin an hril naw a, tukhawma indikna leh thubuoi an hril ngai nawh; thu teplo mei mei an ring a, khêl an hril hlak a; thil suksuolna an vawn a, khawhlona an nei hlak.

⁵Rûlhmuk tuihai an awp kêu a, aium rîl puon an khâwng hlak; an tui fatuhai chu an thi hlak a, sukkawia a uma inthawk chun rûl a hung suok hlak.

⁶An aium rîl puon chu silfênahai hung inchang naw ni a, an thilthawhai chun inbel bawk naw ni hai; an thilthawhai chu khawhlona thilthawhai a na, thil nunsetaka thawna chu an kutah a um bawk a.

⁷An kehai chu thil ṭha naw tieng a tlân hlak a, pawitâwklo thisen insuo dingin an inhmaw hlak; an ngaituohai chu khawhlona ngaituonahai a ni hlak a; râusanna le sietna chu an lampuia chun a um hlak.

⁸Lungmuongna lampui an hriet naw a; an fenaahai chun indikna hrim hrim a um nawh; an ta dingin lampui kâwihai an siem a; chutaka fe taphawthai chun lungmuongna an hriet ngai nawh.

⁹Chuleiin, rorêlna chu einia in- thawka hlatakah a um hlak a, felna chun a mi hnawt phâk ngai bawk nawh: var ei nghâk hlak a, nisienlakhawm, ngai ta, inthim a hung ni hlak; varna ei nghâk hlak a, nisienlakhawm, inthim mupa bawk ei fe hlak.

¹⁰Mitdel angin bang ei themmai zut zut hlak a, anih, mit nei nawhai angin ei themmai hlak; thimbut ang elin sûnah ei insui hlak a; mi hrâthai lai chun mithi ang el ei nih.

¹¹Savawmhai angin ei rêngin ei inhûk dur dur hlak a; vaṭhuhai angin nasatakin ei in ṭuk rût rût hlak; rorêlna ei nghâk hlak a, nisienlakhawm, a um dêr si naw a; sandamna ei nghâk hlak a, nisienlakhawm, einia inthawka hlatakah a um hlak.

¹²Kan bawsietnahai hi i hmaah a pung ta si a; kan suolnahai hin a mi hêk hlak a nih: kan bawsietnahai hi kan kuomah a um zing si a, kan khawhlonahai chu kan hriet a nih:

¹³kan bawsiet dâm, LALPA kan inphatsan dâm, kan Pathien zui pei lova kan nghatsan dâm, nêksâwr thu le hel thu kan hril dâm, khêl thu kan vawng a, lungrila inthawka kan hril suok hlak hi.

¹⁴Chuongchun, rorêlna chun hnungtieng a mîn nghatsan a, felna chun hlatakah a mi ngîrsan tah; thutak chu kawtthlêra chun a tlu zing si a, indikna hlak chu a lût thei naw a.

¹⁵Anih, thutak a um ta naw a; thil ṭha naw bânsantu chu râllâkah ân siem hlak; LALPAIN chu chu a hmu a, indikna hrim hrim um ta naw chun a suklungni ta naw a.

¹⁶Chun, mi hrim hrim an um nawh ti a hriet a, hnipêktu hrim hrim an um nawh ti a hriet a, hnipêktu hrim hrim an um naw chu mak a ti a; chuleiin, ama bân ngei chun sandamna ân siempêk a, ama felna ngei chun ama le ama ân chelngîr ta a.

¹⁷Chun, felna chu âwmphawah a hâk a, sandamna lukhum a khum a, chun, inthuomnaa chun phubalâkna silfênhai chu ân bel a, zakawfuola chun ṭhahnemngaina a hâk a.

¹⁸An thilthawhai angin, an thilthawhai ang ngeiin, ama chun thung a tih, ama dotuhai chu lunginsennain, a hmêlmahai chu thungnain thung a tih; thlierkârhai khawm thungrul a tih.

¹⁹Chuongchun, LALPA hming chu thlangtienga inthawkin ṭîng an ta, a ropuina chu nisa suoknaa inthawkin ṭi bawk an tih; ama chu tui lien thut, LALPA thuoka mût luong vut vut angin a hung ding a ni si a.

²⁰“Chun, Ziona chun intlantu hung a ta, Jakobhai laia bawsietna nghatsantuhai kuoma khawm hung a tih,” LALPAIN a tih.

²¹“Kei chu hi hi a nih an kuoma ka thuthlung chu: ka thlarau i chunga um le, ka thu i baua ka siehai chun, tuta inthawka chatuon chen khawmin i bau chu suoksan naw ni hai a, i thlahai thla nâwk sâwng bau khawm suoksan bawk naw ni hai,” LALPAIN a tih.