Read Hmar ISAI 63 Bible Online

ISAI 63 - Hmar bible

ISAI 63

¹Edom rama inthawka hung, Bozra khuoa inthawka silfên suksen sil saw tu am a na? A puon sila ropuitak, a hrâtna a nasatzie anga hung saw? Keima, feltaka thu hril a, sandam kawnga mi hrâttak kha ka nih.

²Iengleiin am i puon sil kha a sen a, i silfênhai khawm kha grêp sâwrna khura sirsâwrtu silfên anga um am a na?

³Keima chauin grêp sâwrna khurah ka sirsâwr a; mi tin laia mi pakhat khawm ka kuomah an um naw a, anih, anni chu ka lunginsenin ka sir a, ka lunginsenin ka chîl a; chuongchun, an hringna thisen chu ka silfênahai hin thein a um a, ka puon po po hi ka sukpawrche ta a.

⁴Phubalâk ni chu ka lungrilah a um si a, ka mi intlanhai kum chu a hung tlung ta bawk a nih.

⁵Chuongchun, ka hei en a, ṭhangpuitu ding hrim hrim an um nawh; chel ngîrtu ding hrim hrim an um naw chu mak ka ti a; chuleiin, keima bân ngei hin sandamna a mîn tlun a; ka lunginsenna chun a mi chel ngîr ta a.

⁶Chuongchun, mi tin chu ka lunginsenin ka sirde a, ka lunginsenin ka sukrui a, an hringna thisen chu hnuoiah ka bunthlâk tah.

⁷LALPAIN thil iengkima a mi vur ang peiin LALPA zainêmzie thuhai le LALPA inpâkna thuhai chu hril ka tih; a lunginsietnahai ang pei le a zainêmna nasatzie ang peia Israel sûnghai chunga a ṭhatna nasataka an chunga a vur thu khawm kha hril bawk ka tih.

⁸Ama chun, “Ka mihai, nau a tehlêma thaw lo dinghai an ni ngei el,” a ti si a; chuongchun, anni sandamtuah a hung um ta a.

⁹An lunginzîngna po poa chun ama chu a lunginzîng ve hlak a, vântirko, a hmaa um mi chun, anni chu a sanhim bawk hlak a; a hmangaina le a lunginsietnain ân tlan tâwl ta a; tienlai ni po poa chun anni chu a puokin anni chu a pawm hlak a.

¹⁰Nisienlakhawm, an hel a, a thlarau inthieng chu an suklungngai a; chuleiin, anni do dingin ân let a, ama ngei chun anni chu a thaw ta a.

¹¹Chuong lai chun a mihai chun, Mosie tienlai nihai chu an hriet zing a, hieng ang hin an tih, “Tuipuia inthawka a berâm ruol vêngtuhai leh anni hang ṭhuoitu kha khâwlai am? A thlarau inthieng anni laia sietu kha khâw lai am?

¹²A bân ropuitak Mosie changtienga infetirtu kha khâw lai am? Kumkhaw hming insiemna dinga an hmaa tui sukṭhetu kha khâwlai am?

¹³An insui nawna dinga tui inthûktaka thlalêra sakawr ṭhuoi anga anni ṭhuoi kaitu kha khâw lai am?

¹⁴Ruoma ran zu fehai angin LALPA thlarau chun anni chu ân châwltir a, chuong ang chun, hming ropuitak în siemna dingin, i mihai chu i ṭhuoi kha,” tiin.

¹⁵Vâna inthawk khan zuk thlîr la, i în thiengna le i ropuina umnaa inthawk khan hung en ta: i ṭhahnemngaina le i thilthaw ropuitakhai kha khâw lai am? I lungrila i ngaina le i lainatnahai kha keia inthawk hin sukboin a um tah.

¹⁶Abraham chun mi hre lovin, Israel khawm chun mi ngaisak naw sien khawm, nang chu ka pa i ni si a; nang chu, aw LALPA, kan pa i na, i hming chu chatuona inthawka keini mîn tlantu a nih.

¹⁷Aw LALPA, nangin iengleiin am i lampuia inthawk dâm hin i mîn vâkhmangtir hlak a, nangma chu ṭi lo dinga kan lungril hi i mi sukngarpêk hlak am a na? I siehlaw, i rohluo hnamhai lei hin, hung kîr nâwk rawh.

¹⁸I mi inthienghai chun sâwt nawtê chau an nei a, a mi dotuhai chun i hmun inthieng chu an sir siet tah.

¹⁹An chunga ro i rêl ngai nawna, i hming put ngailohai ang chu kan hung ni ta hi.