Read Hmar ISAI 64 Bible Online

ISAI 64 - Hmar bible

ISAI 64

¹Tlânghai chu i hmaa an luong thlâk dûl dûl theina dingin vân kha sukthlêrin hung ṭum thei hrâm la chu aw!

²meiin thing nawi a suk chawk a, tui dâm a sukso ang hin, hnam tin i hmaah an inthin a, nangma dotuhai che kuoma chun i hming chu inhriettir a ni theina dingin.

³Kan beisei naw thil râpthlâk i thaw lai khan i hung ṭum a, tlânghai chu i hmaah an luong thlâk dûl dûl kha.

⁴Tienlaia inthawk tah mihaiin, nangma chau naw chu, anni nghâktuhai ta ding thawpêk hlaktu Pathien an hriet ngai si naw a, nain an hriet ngai naw a, mit khawma an hmu ngai bawk nawh.

⁵Nang chun hlimtaka uma, feltaka thawtu, i lampuihaia nangma hre zing hlaktuhai chu, i tuok hlak a; ngai ta, nang i lunginsen a, keinin thil kan suksuol a; chuongahai chun sâwttak kan lo um ta a, chuongchun, sandamin la um thei kan ti?

⁶Mi inthieng naw angin kan lo um vawng ta si a, kan felnahai po po khawm silfên inthieng naw ang a na; kan rêng hin hna angin kan vuoi hlak a; kan khawhlonahai hin thli angin a mi lên hmang hlak.

⁷Chuongchun, i hming lama, nangma chel dinga mâni insukhar tukhawm an um dêr naw a, keini kuoma hin i hmai i thup ta si a; kan khawhlonahai hmangin i mi sukbohmang tah a nih.

⁸Tu ruok hin chu aw LALPA, nang chu kan pa i na; keini hi bepil kan na, nang chu a mi hemtu i na, chuongchun, kan rêng hin i kutsuok kan nih.

⁹Aw LALPA, lunginsen talaw naw la, khawhlonahai khawm kumkhawtluong chun hre zing naw rawh; ngai ta, lunginsiettakin mi en la, kan rêng hin i mihai kan ni hi.

¹⁰I khawpui inthienghai chu thlalêrah a hung inchang a, Zion chu thlalêrah a hung inchang a, Jerusalem chu hmun râusanah a hung inchang ta hi.

¹¹Kan in inthieng le kan in mawitak, kan puhaiin an lo inpâkna hlak che chu, meia raw a na; kan thil ditumhai po po hlak chu suksietin a um ta vawng si a.

¹²Aw LALPA, chuong thilahai chun în sûm thei ding am a nih? I to zingin i mi sukrimsi nasa zing ding am a nih?