Read Hmar ISAI 65 Bible Online

ISAI 65 - Hmar bible

ISAI 65

¹A mi lam ngai nawhai zawngin ka um a, a mi zawng ngai nawhai hmuin ka um a; ka hming put naw hnam kuoma chun, “Hitaka hin ka um, hitaka hin ka um,” ka ti a.

²Mi hel hmanghai ta dingin sûnnithlâkin ka bânhai ka phar hlak, chuonghai chu anni ngaituona ang peia lampui ṭha nawa fe hlakhai,

³huonahai inthâwia, ṭêklei chungahai thil rim inhnik rawa, ka hmaisan ngeia mi suklungsen hlaktuhai,

⁴thlân laiahai ṭhunga, hmun fienrielhaia riek hlakhai, vawk sa faa, an bêlhaia thil tirdakumhai tuihâng um hlakhai,

⁵“Nanga khât chauin ngîr rawh, mi hung hnai naw, nanga nêk chun kân thieng lem hi,” ti hlaktuhai chu an nih; chuonghai chu ka hnâra meikhu um, sûnnithlâka mei hring zing hlak chu a nih.

⁶Ngai ta u, ka hmaah ziekin a um a, to zing naw ningah a, thung lem ka tih, anih, an ângsûngah thung ve vêng ka tih,

⁷nangni khawhlona le in puhai khawhlona chu, LALPAIN a tih, chuonghai chun tlâng lien chungahai thil rim inhnik an raw a, tlâng chungahai chun ka hming an hrilsiet hlak; chuleiin, an sinthaw chu a hmasatakin an ângsûngah inkhipêk ka tih.

⁸LALPA chun hieng ang hin a tih, “Grêp bâwrah uoin thar an hmu a, miin, ‘Sukse naw, khataka khan malsâwmna a um si,’ an ti ang khan, ka siehlawhai leiin ti vêng ka tih, an rênga ka suksiet vawng nawna dingin.

⁹Chun, Jakoba inthawkin chi pakhat suksuok ka ta, Judaa inthawkin ka tlânghai hluotu ding chu suksuok bawk ka tih; chuongchun, ka mi thlanghai chun chu chu hluong an ta, ka siehlawhai chu chutaka chun um an tih.

¹⁰Ka mi, a mi zawngtuhai ta ding chun, Saron chu berâm ruolhai huon nîng a ta, Akor ruom chu bâwng ruolhai bawkna hmun ding nîng a tih.

¹¹Nisienlakhawm, nangni LALPA mâksana, ka tlâng inthieng theinghila, Vângneina Siemtu ta dinga dawkân buotsaia, Chantâwka Khawrêltunu dinga uoin chawkpawl sa suksip hlaktuhai;

¹²ka ko lai cheu khan in mi dawn nuom naw a, thu ka hril lai khan nain in hriet nuom naw a, ka mithmuah thil suol chu in thaw lema, ka thil lâwm naw zâwng chu in thlang leiin kâwlhnâmin in chantâwk chu rêlpêk ka ti cheu a, in rêngin thatnaa chun kûn vawng in tih.

¹³Chuleiin, LALPA Pathien chun hieng ang hin a tih, “Ngai ta u, ka siehlawhai chun fâng an ta, nangni ruok chu phîngṭâmin um in tih: ngai ta u, ka siehlawhai chun dâwn an ta, nangni ruok chu dangchârin um in tih; ngai ta u, ka siehlawhai chu hlim an ta, nangni ruok chu inzak in tih:

¹⁴ngai ta u, ka siehlawhai chu lungrila an lâwm leiin hlimtakin hla sak an ta, nangni ruok chu lungrila in lungngai leiin ṭap in tih, thlaraua in lungngai leiin khêk rak rak in tih.

¹⁵Chun, in hming chu ṭawng inkhâmna dingin ka mi thlanghai kuoma chun mâksan in ta, Lalpa PATHIEN chun sukhlum a ti cheu a, chun, a siehlawhai chu hming dangin ko tâng a tih;

¹⁶chuongchun, hnuoia hin mâni le mâni mal insâwm fâwmtu chu thutak Pathiena chun mal insâwm a ta; hnuoia hin ṭawng inkhâmtu chu thutak Pathien sâlin ṭawng inkhâm a tih; kha hmaa lunginzîngnahai chu theinghila a um ta leiin le ka mita inthawka thupa a um ta leiin.

¹⁷Ngai ta u, vân tharhai le hnuoi thar ka siem a ni hi; kha hmaa thilhai chu hriet zingin um ta naw ni a; lungrila khawm lût ta bawk naw ni.

¹⁸Nisienlakhawm, ka thil siema chun kumkhuoin lâwmin hlim ro; ngai ta u, Jerusalem chu hlimnaah ka siem a, a mihai chu lâwmnaah ka siem a ni hi.

¹⁹Jerusalem chunga chun hlim ka ta, ka mihai chunga khawm lâwm ka tih; a sûnga chun ṭap ri chu hriet ni ta naw ni a, inrûm ri khawm hriet ni ta naw ni;.

²⁰Chutaka inthawka suok chu nautê ni sâwt nawtê dam um naw ni hai a, putar a dam sûng nihai tlingtla naw um bawk naw ni hai: naupang chu kum za mi niin a thi ding a ni si a, mi suol kum za chau dam chu ṭawngsephur a ni ding a nih.

²¹Chun, inhai bâwl an ta, chuonga chun um zing bawk an tih; grêp huonhai siem an ta, a ra fa bawk an tih.

²²Mi dang umna dingin in bâwl ta naw ni hai a, mi dang fâk dingin grêp huon siem nâwk ta bawk naw ni hai; thing dam sûng nihai ang hin ka mihai dam sûng nihai chu a um ding a ni si a, ka mi thlanghai chu sâwttak an thawsuok chunga chun an lâwm ding a nih.

²³A thlâwnin sin inrim naw ni hai a, vângduoina el dingin nau nei bawk naw ni hai a, LALPA malsâwm mi thlahai an ni si a, an nauhai chu an kuomah um zing an tih.

²⁴Chun, hieng hi hung nîng a ta, annin an mi ko hma khawmin dawn ka ta; thu an la hril lai zing khawmin ka nain hrieng ka tih.

²⁵Satene le berâmte chu tla hmunkhat tâng an ta, sakeibaknei chun bâwngchal angin bupâwl fa tâng a tih; pilvut chu rûl bu ni bawk a tih. Ka tlâng inthienga hrim hrim chun sukna ta naw ni hai a, sukse ta bawk naw ni hai, LALPAIN a tih.