Read Hmar LEVI DÂN 10 Bible Online

LEVI DÂN 10 - Hmar bible

LEVI DÂN 10

¹Aron naupasalhai Nadab le Abihu chun an mei lâkna chu an lâk ve ve a, chutaka chun meiling chu an sie a, riminhnik chu an phul a, LALPA hmaah thu a pêk naw dântakin mei inthiengnaw an inhlân a.

²Chuongchun, LALPA hmaa inthawkin mei a hung suok a, anni chu a kâng hlum a, LALPA hmaa chun an thi ta a.

³Chuongchun, Mosie chun Aron kuomah, “Hi hi a nih LALPAIN, ‘A mi hnaituhaia chun inthiengin inlang ka ta, mipui po po hmaa chun chawimawiin um ka tih,’ tia a hril kha,” a ti a. Aron chu a to zing a.

⁴Chun, Mosie chun Aron pami Uzziel naupa Misael le Elzaphan chu a ko a, an kuomah, “Hung hnai unla, in unauhai hi hmun inthienga inthawk hin riebûk puoah zâwn dawk ro,” a ta.

⁵Chuongchun, an hung hnai a, zakuo hâk pumin riebûk puoa chun, Mosie hril angin an zâwn dawk a.

⁶Mosie chun Aron kuoma le a naupasalhai Eleazar le Ithamar kuoma chun, “A sûnnain in sam inthla naw unla, in puonhai keithlêr bawk naw ro, chuong naw chun thi rawi in ta, mi po po chungah lunginsen rawi a tih; in unauhai Israel sûngkuo pumpuiin LALPA isêm chawk mei chu sûn lem raw se.

⁷Chun, intuokna puon in kawtkhâra chun in suok ding a ni nawh, chuong naw chun thîng in tih; LALPA hriek chu in chungah a um si a,” a ta. Chuongchun, Mosie thu ang chun an thaw ta a.

⁸ LALPA chun Aron chu a biek a,

⁹“Nang amanih, i naupasalhai amani khawmin, intuokna puon in sûnga in fe laiin uoin le zu hrim hrim dâwn naw ro, chuong naw chun thîng in tih; hi hi in thlahai chena kumkhaw dân ding nîng a tih.

¹⁰Chu chu ân thieng le ân thieng naw le, a thieng le a thieng naw in thlier theina ding le,

¹¹LALPAIN Mosie hmanga an kuoma a hril, thupêkhai po po chu Israel mipuihai în chûktir theina dingin nîng a tih,” tiin.

¹²Mosie chun Aron le a naupasal la dam hai, Eleazar le Ithamar kuoma chun, “LALPA kuoma mei hmanga thilinhlâna mi, fâkmi thilinhlân lâk mahlahai chu la unla, maichâm bulah chawl ṭhang lovin fa ro, thil inthieng a ni si a.

¹³LALPA kuoma mei hmanga thilinhlâna i chanpuol le i naupasalhai chanpuol a ni leiin hmun inthiengah in fâk ding a nih; chuong anga chu thu pêk ka nih.

¹⁴A ir thêna thên le a mal dawmkânga inhlân ruok chu hmun faiah in fâk ding a nih; nang le i naupasalhai le i naunuhmeihai leh; Israel mipuihai inremna thilinhlân inthâwinaa i chanpuol le i naupasalhai chanpuola ruot a ni si a.

¹⁵A mal dawm kâng le a ir thên chu LALPA hmaa a thêna thên thilinhlân dingin mei hmanga thilinhlân thâu leh an hung chawi ding a nih; chu chu nang le i naupasalhai leh kumkhuoa in chanpuol ding nîng a ta, LALPA thupêk ang khan,” a ta.

¹⁶Mosie chun suol inthâwina kêl chu nguntakin a zawng a; chun, ngai ta, an lo râw zo dêr tah a na; chuongchun, Aron naupasal la dam Eleazar le Ithamar chunga chun a lunginsen a,

¹⁷“Iengdinga suol inthâwina chu hmun inthienga in fâk naw am a na? Hi hi thil inthieng tak, mipui rîtlona in phur theina dinga a pêk cheu, LALPA hmaa intlanna in siempêk dinga a pêk cheu a ni si a.

¹⁸Ngai ta u, a thisen chu hmun inthienga chun in lâk lût lêm; thu ka pêk ang khan hmun inthienga chun in fâk ngei ding a nih in sawnnaw,” tiin.

¹⁹Chun, Aron chun Mosie kuomah, “Ngai ta, vawisûn hin LALPA hmaah an suol inthâwina le, an pumrawhmang thilinhlân chu an inhlân a na, hieng ang thil hi ka chungah a hung um el ta si a! Vawisûn hin suol inthâwina chu lo fa ta lang, LALPA mithmuah pawm tlâk a ni chuong ding am a nih?” a ta.

²⁰Mosiein chu chu a hriet chun a lungawi ta a.