Read Hmar LEVI DÂN 16 Bible Online

LEVI DÂN 16 - Hmar bible

LEVI DÂN 16

¹Aron naupasalhai pahniin LALPA an va hnaia an thi pha hnung chun, LALPA chun Mosie a biek a;

² LALPA chun Mosie kuomah, “I unaupa Aron hril la, puonzâr sûng hmun inthiengah, bâwm chunga zângaina ṭhungpha hmaa chun a hung zing zing ding a ni nawh, thi rawi a tih; zângaina ṭhungpha chungah sûm lai ka hung inlâr ding a ni si a.

³Hieng ang hin Aron chu hmun inthienga chun a fe ding a nih; suol inthâwina dingin bâwng tuoi, pumrawhmang thilinhlân dingin berâmchal leh.

⁴Puonzai inhmi zakaw chung chu hâk a ta, a tisa inkhumna dingin puonzai inhmi kekawr chu bun a ta, puonzai inhmi kâwngkhiin inhrêng a ta, puonzai inhmi lukhum a khum ding a nih; hieng hi silfên inthieng a nih. Insil zet zet a ta; chun, ân bel ding a nih.

⁵Israel mipui pungkhâwmhaia inthawkin, suol inthâwina dingin kêlchal pahni le pumrawhmang thilinhlâna dingin berâmchal pakhat chawi a tih.

⁶“Chun, Aron chun ama puola suol inthâwina bâwngchal chu inhlân a ta, ama le a sûnghai ta dingin intlanna siem a tih.

⁷Kêl pahni chu kei a ta, intuokna puon in kawtkhâr bulah LALPA hmaah sieng a tih.

⁸Chun, Aron chun kêl pahni chungchânga chun ṭhumvâwr a ta, pakhat chu LALPA chanpuol nîng a ta, pakhat chu Azazel chanpuol nîng a tih.

⁹Aron chun LALPA chanpuola tlu kêl chu lâng a ta, suol inthâwina dingin inhlân a tih.

¹⁰Azazel chanpuola tlu kêl ruok chu intlanna siemna dingin, Azazel ta dinga thlalêra insuo dingin LALPA hmaah a hringin sieng a tih.

¹¹“Aron chun ama puola suol inthâwina bâwngchal chu lâng a ta, ama le a sûnghai ta dingin intlanna siem a ta; ama puola suol inthâwina bâwngchal chu that a tih.

¹²Chun, meilâkna meilinga sip, maichâma inthawkin LALPA hmaa chun lâng a ta, riminhnik inhniktak râwt dip dap ṭhûm hni leh puonzâr sûngtieng chun hung lûtpui a tih.

¹³Riminhnik khû chun, thuthlungna bâwm chunga, zângaina ṭhungpha chu bâwm dingin, LALPA hmaah meia chun riminhnik chu phul a tih, chuong naw chun thi rawi a tih.

¹⁴Bâwngchal thisen iengzât amani chu lâng a ta, a kutpârin zângaina ṭhungpha hmatieng pang chu thêng a ta; chun, a kutpârin zângaina ṭhungpha hmabul vêl chu, thisen chun vawi sari a the ding a nih.

¹⁵“Mipui puola suol inthâwina kêl chu that a ta, a thisen chu puonzâr sûngtienga chun hung lûtpui a ta; a thisen chu bâwngchal thisen a thaw ang bawk khan thâwng a ta, zângaina ṭhungpha le, zângaina ṭhungpha hmabul vêl chu thêng a tih.

¹⁶Chuongchun, Israel mipui inthiengnawna lei dâm, an bawsietnahai lei dâm, an suolnahai lei dâmin hmun inthieng puola dingin intlanna siem a ta; chuong ang chun, an inthiengnawna laia chêng intuokna puon in puola ding khawmin siem a tih.

¹⁷Hmun inthienga intlanna siem dinga a lût lai chun, ama le a sûnghai le Israel mipuihai puola intlanna a siem zoa a hung suok nâwk hmakhat chun, tukhawm intuokna puon in sûnga chun an um ding a ni nawh.

¹⁸LALPA hmaa maichâm tieng chun suok a ta, chu puola ding chun intlanna siem a ta; bâwngchal thisen le kêl thisen iengzât amani chu lâng a ta, maichâm kia chun a vêlin nâl a tih.

¹⁹Chun, a kutpârin vawi sari thêng a ta, inthien a tih; chuongchun, Israel mipuihai inthiengnawnaa inthawk chun sukthieng a tih.

²⁰“Hmun inthieng le intuokna puon in le maichâm puola intlanna a siem zo chun kêl hring lai chu inhlân a ta;

²¹Aron chun kêl hring lai lu chunga chun,a kut a khing pahniin innghat a ta, a chunga chun Israel mipuihai rîtlonahai po po, an bawsietnahai po po, a suolna po po chenin insam a ta, chuonghai chu kêl lu chunga chun innghat a ta, mi pakhat a iruotsa khan thlalêr tieng ṭhuoi hmang dai a tih.

²²Kêl chun an rîtlona po po chu chêng nawna rama chun phur a ta, kêl chu thlalêra chun ân suo ding a nih.

²³“Chun, Aron chu intuokna puon ina chun lût a ta, hmun inthieng a lût laia puonzai inhmi silfên a hâk chu hlîp a ta, chutaka chun mâksan a ta;

²⁴hmun inthienga chun insil a ta, a silfên inbel a ta, suok a ta, ama puola pumrawhmang thilinhlân le mipui puola pumrawhmang thilinhlân chu inhlân a ta, ama le mipuihai ta dingin intlanna siem a tih.

²⁵Chun, suol inthâwina thâu chu maichâma chun râwng a tih.

²⁶Chun, Azazel kuoma kêl insuotu taphawt chun a puonhai sâwp a ta, insil a ta, chu zo chun a umna hmun tieng chun a kir nâwk ding a nih.

²⁷Suol inthâwina bâwngchal le suol inthâwina kêl, an thisen intlanna siemna dinga hmun inthienga an lûtpui chu, riebûk puotienga fepui nîng a ta; a vun dâm, a sa dâm, a êk dâm chu an râw ding a nih.

²⁸A rawtu chun a puonhai sâwp a ta, insil a ta, chu zo chun riebûk tieng hung thei a tih.

²⁹“Chun, hi hi in kumkhaw dân ding nîng a tih; thla sarina, chu thla ni sâwm ni chun insukrinum in ta, sin hrim hrim in thaw ding a ni nawh, a ram mi khawmin, nangni laia um ram dang mi khawmin.

³⁰Hi ni hin, nangni sukthiengna ding cheuin in ta dingin intlanna siem a ni ding a ni si a; chuongchun, LALPA hmaa chun in suolna po poa inthawk hung inthieng in tih.

³¹In ta dingin châwl ṭawk ṭawkna ni a na, in insukrinum ding a nih; hi hi in kumkhaw dân ding a nih.

³²Chun, thiempu, a pa aia thiempu ni dinga hriek nâl le, suktuma um chun intlanna siem a ta, puonzai inhmi silfên inthieng chu inbel a ta;

³³hmun inthieng puol dingin intlanna siem a ta, intuokna puon in le maichâm puola ding chun intlanna siem bawk a ta; chun, thiempuhai le mipuihai ta dingin intlanna siem bawk a tih.

³⁴An suolna po po leia kum tin vawi khat Israel mipuihai ta dinga intlanna siem hi in kumkhaw dân ding a nih,” a ta. Chuongchun, LALPAIN thu a pêk ang chun Mosie chun a thaw ta a.