Read Hmar LEVI DÂN 17 Bible Online

LEVI DÂN 17 - Hmar bible

LEVI DÂN 17

¹LALPA chun Mosie a biek a,

²“Aron le a naupasalhai le Israel mipui po po chu hril la, an kuomah, ‘Hi hi LALPA thupêk chu a nih.

³Israel sûngkuo laia mi hrim hrim, bâwngchal amanih, berâmte amanih, kêl amani khawm ni sien, riebûka manih, riebûk puoa manih that a,

⁴LALPA riebûk hmaa LALPA ta dinga thilinhlâna intuokna puon in kawtkhâr bula hung la naw taphawt chu, ama chu thisen insuoa ngai nîng a tih; thisen insuo ngei a na, ama chu a chipuihai laia inthawkin tuithlârin a um ding a nih.

⁵Chu chu Israel thlahaiin hmun uolaua inthâwina an ithathai an hung chawi theina dingin, LALPA kuom ngeiah, intuokna puon in kawtkhâr bulah thiempu kuoma an hung chawi theina dingin le, LALPA kuoma inremna thilinhlâna an inhlân theina dingin a ni a;

⁶Chun, thiempu chun intuokna puon in kawtkhâr bula maichâm chu thisen chun thêng a ta, a thâu chu LALPA ta dinga rim inhniktaka dingin a râw ding a nih.

⁷Lepchie taka umin, khawhrihai chu zuiin an kuomah an inthâwi ta hrim hrim ding a ni nawh,’ Hi hi an thlahai chena an kumkhaw dân ding a nih.

⁸Chun, an kuomah hril la, Israel sûngkuo laia mi hrim amanih, ram dang mi anni laia khawsahaiin amanih, pumrawhmang thilinhlân amanih, inthâwina amanih ân hlân a,

⁹LALPA kuoma inthâwi dinga intuokna puonin kawtkhâr bula hung la lo chu, ama ngei chu a chipuihai laia inthawka tuithlârin a um ding a nih.

¹⁰“Chun, tukhawm Israel sûngkuo laia mi amanih, ram dang mi anni laia khawsa amanih, ieng thisen khawm fa taphawt chu, chu thisen fatu chunga chun ka hmai sukthim ka ta, a chipuihai laia inthawka tuithlârin inumtir ka tih.

¹¹“Tisa hringna chu thisena chun a um si a; in hringna intlanna siemna dinga maichâm chunga ka pêk cheu a nih; hringna dinga intlanna siemna chu thisen ngei chu a ni si a.

¹²Chuleiin, Israel mipuihai kuomah, ‘Tukhawma thisen in fâk ding a ni naw a, ram dang mi nangni laia khawsahai khawmin thisen chu an fâk ding a ni bawk nawh,’ ka ti a nih.

¹³Chun, Israel mipuihai laia mi amanih, ram dang mi anni laia khawsain amanih, ramsuoka sa amanih, vate amanih fâk thei a hung phur chun, a thisen chu suksuok a ta, pilvut a vur khum ding a nih.

¹⁴“Tisa po po hringna chu thisen chu a ni si a; chuleiin, Israel mipuihai kuoma chun, ‘Ieng sa thisen khawm in fâk ding a ni nawh, tisa po po hringna chu a thisen chu a ni si a; tukhawm a fa taphawt chu tuithlârin a um ding a nih.

¹⁵Chun, mânia thi amanih, sa se amanih fa taphawt chu, chu rama mi hrim amanih, ram dang mi amani khawm ni sienla, a puonhai sâwp a ta, ân sil ding a nih; chun, zântieng chenin inthiengnaw nîng a ta, chu hnunga chun inthieng hung nîng a tih.

¹⁶Ân sâwp naw a, ân sil naw ruok chun, ama rîtlona maw chu phur a tih,’ ti rawh,” tiin.