Read Hmar LEVI DÂN 20 Bible Online

LEVI DÂN 20 - Hmar bible

LEVI DÂN 20

¹LALPA chun Mosie a biek a,

²“Israel mipuihai kuoma chun, ‘Tukhawm Israel thlahai laia mi amanih, Israel rama khawsa, ram dang mi amanih, mâni rîla rahai a tukhawm Molek kuoma pe taphawt chu sukhlum ngei ding a na, hi rama mihai hin lungin an dêng ding a nih.

³Kei khawmin ka hmun inthieng sukpawrche ding le, ka hming inthieng sukpawrche dinga a rîla ra Molek a pêk leiin, chu mi chunga chun ka hmai sukthim ka ta, a chipuihai laia inthawk chu sukbohmang ka tih.

⁴Hi rama mihai hin, chuong ang mi mâni rîla ra Molek petu chu an theinghil tehlêm a, an sukhlum naw chun, ama le a sûnghai chunga chun

⁵ka hmai sukthim ka ta, Molek kuoma uire dinga a mi uiretsantuhai po leh an chipuihai laia inthawk sukbohmang ka tih.

⁶“Khawhri aisânthiem zâwlhai le dâwithiemhai pana uiretu chunga chun ka hmai sukthim ka ta, a chipuihai laia inthawk chu sukbohmang ka tih.

⁷Chuleiin, insukthieng unla inthiengin um ro; Kei hi LALPA in Pathien chu ka nih.

⁸Ka thupêkhai chu in pawmin in zâwm ding a nih. Kei hi LALPA a sukthiengtu cheu chu ka nih.

⁹A pa amanih, a nu amanih ṭawngsie inphurtu taphawt chu sukhlum ngei ding a nih; a pa amanih, a nu amanih ṭawngsie inphur a na, a chungah a thisen maw chu a um ding a nih.

¹⁰“Mîn a tuolbâwm nuhmei a uiretpui chun, uiretupa le uirenu chu sukhlum ngei ding an nih.

¹¹Pahai nuhmei zâlpuitu chu mâni pahai saruokna hlîmtu a na, sukhlum ve ve ngei ding an na, an thisen maw chu an chunga um a nih.

¹²Mîn a monu a zâlpui chun sukhlum ve ve ngei ding an nih; rîtlona chungchuong thaw an na, an thisen maw chu an chunga um a nih.

¹³Mîn nuhmei a zâlpui anga pasal a zâlpui chun, thil tirdakum an thaw ve ve a na, sukhlum ngei ding an nih, an thisen maw chu an chunga um a nih.

¹⁴Mîn nufa faa nuhmeia a nei chun rîtlona nasatak a na, anni laia rîtlona a um nawna dingin, ama le anni pahni chu râw hlum ding an nih.

¹⁵Mîn ran a zâlpui chun sukhlum ngei ding a nih; ran khawm chu in sukhlum ding a nih.

¹⁶Nuhmeiin ran a va hnai a, ân pâwlpui chun, nuhmei le ran chu in sukhlum ding a nih; sukhlum ngei ding an nih, an thisen maw chu an chunga um a nih.

¹⁷“Mîn a farnu, a pa naunu amanih, a nu naunu amanih a nei a, a saruokna a hmu a, amanu khawma a saruokna a hmu bawk chun thil inzakumtak a na, an chipuihai thlahai mithmua sukbohmang ding an nih; a farnu saruokna hlîm a na, a rîtlona maw chu phur a tih.

¹⁸Mîn nuhmei a hul naw laia a zâlpui a, a saruokna a hlîm chun a thi suokna chu hlîm a na, nuhmei khawm chun ama thi suokna a hlîm a na; an chipuihai laia inthawka sukbohmang ve ve ding an nih.

¹⁹I nu zuorpuinu amanih, i pa farnu amanih saruokna chu i hlîm ding a ni nawh. Mâni laibunghai saruoka siemna a na; an rîtlona chu phur an tih.

²⁰Mîn a pami nuhmei a zâlpui chun, a pami saruokna hlîm a na, suol maw chu phur an ta, nau boin thîng an tih.

²¹Mîn a unaupa nuhmei a nei chun, thil tirdakum a nih; a unaupa saruokna hlîm a na, nau boin um an tih.

²²“Chuleiin, ka thupêkhai po po, ka rorêlhai po po pawmin in zâwm ding a nih; chuongchun, umna dinga ka ṭhuoina cheu ram chun luok dawk naw ni cheu.

²³In hmaa ka hnawt suok tah hnamhai dân dâm in hrâw ding a ni nawh; hieng thilhai po po hi an thaw hlak leiin ka tirdak tâwl an nih.

²⁴Amiruokchu, nangni kuoma chun, an ram, nênetui le khuoizua luong ram chu hluong in ta, in hluo dingin ka pêk cheu a nih, ka lo ti ta a. Kei hi LALPA in Pathien, hnam danghaia inthawka suktumtu cheu chu ka nih.

²⁵Chuleiin, sa thieng le thieng naw, vate thieng le thiengnaw in thlier hran ding a nih; sa amanih, vate amanih, hnuoia bawkinvâk chi hrim hrim amani chu in ta dingin inthieng lova ka ithlier hran tahai chun, in hringnahai in suktirdakum ding a ni nawh.

²⁶Ka ta dinga mi inthieng in ni ding a nih; kei LALPA chu kân thieng si a, ka ta in nina dingin hnam danghaia inthawkin ka suktum ta cheu a nih.

²⁷“Pasal khawm, nuhmei khawm, khawhri aisânthiem amanih, dâwithiem amani chu sukhlum ngei ding a nih; lunga dêng nîng an ta; an thisen maw an chungah um a tih,’ti rawh,” tiin.