Read Hmar LEVI DÂN 21 Bible Online

LEVI DÂN 21 - Hmar bible

LEVI DÂN 21

¹ LALPA chun Mosie kuomah, “Aron naupasal thiempuhai chu hril la an kuomah, ‘Mi tukhawm mithi leiin an chipuihai lai an insukpawrche ding a ni nawh.

²A sûng bul, a nu, a pa, a naupa, a naunu, a unaupa dâm le,

³a farnu, nunghâk inthieng, pasal la neilo a ni leiin, chuonghai thinaa ruok chun insukpawrche thei a tih.

⁴A chipuihai laia lusa a ni leiin ân sukpawrche ding a ni naw a, ân sukhmingse ding a ni nawh.

⁵Thiempu chun an lu an vaw kawl ding a ni naw a, khâkhmul sîr tuok an mêt ding a ni bawk naw a, an taksa chu an ât pawp ding a ni bawk nawh.

⁶An Pathien ta dingin mi inthieng nîng an ta, an Pathien hming an suksiet ding a ni bawk nawh; LALPA kuoma mei hmanga thilinhlânhai le fâk ding dâm an inhlân hlak leiin; an inthieng ding a nih.

⁷Nawchizawr amanih, hming se tah amanih, a pasal imâk hnung amanih an nei ding a ni nawh; thiempu chu a Pathien ta dingin mi inthieng a ni si a.

⁸Ama chu în hlân thieng ding a na, i Pathien ta dinga fâkmi thilinhlân chu ân hlân hlak si a. I ta dinga mi inthieng a ni ding a nih. Kei LALPA a sukthiengtu cheu hi kân thieng si a.

⁹Thiempu naunuhmei tukhawm nawchizawra ân sukpawrche chun, a pa a sukpawrche a na, ama chu raw ding a nih.

¹⁰“A unauhai laia thiempu inlal tak, a lu hriek nâlmia nâl tah, silfên bel dinga suktuma um ta chun, a sam chu a thlâiin a put ding a ni naw a, a puonhai a keithlêr ding a ni naw a,

¹¹mithi ruong umnaa chun a lût ding a ni naw a, a pa amanih, a nu amani leiin ân sukpawrche ding a ni nawh;

¹²hmun inthienga inthawk chun a suok ding a ni bawk naw a, a Pathien hmun inthieng chu a sukpawrche ding a ni bawk naw; a Pathien hriek nâlmia suktumin a um ta si a: Kei hi LALPA chu ka nih.

¹³Nuhmei ding chun nunghâk hnakhat a nei ding a nih.

¹⁴Hmeithai amanih, mâk hnung amanih, nuhmei hming se tah amanih, nawchizawr amani chu a nei ding a ni naw a, ama chipui ngei nunghâk inthieng nuhmeiah a nei ding a nih;

¹⁵chuongchun, a chipui lai a thlahai chu a sukpawrche naw ding a nih; kei hi LALPA ama sukthiengtu chu ka ni si a,’ ti rawh,” tiin.

¹⁶LALPA chun Mosie a biek a,

¹⁷“Aron kuomah hril la, ‘I thlahai laia an suonlepârhai lai chena demkai taphawt chun, a Pathien fâk ding thilinhlân inhlân dingin hung hnai naw raw se.

¹⁸Tukhawm demkâi taphawt chun an hung hnai ding a ni dêr nawh; mitdel, kebai, hmai hmêlhem, kut le ke sei taluo dâm,

¹⁹kea hliemna nei, kut hliem dâm,

²⁰zângkûn, mi tawnginsam, mithmu fie naw, pang inthak nei, pang inhlip, tilmu kawi dâm;

²¹thiempu Aron thlahai laia mi tukhawm demkaina nei chu, LALPA ta dinga mei hmanga thilinhlân inhlân dingin a hung hnai ding a ni nawh; demkaina nei a na, a Pathien fâk ding thilinhlân chu inhlân dingin a hung hnai ding a ni nawh.

²²A Pathien fâkmi thilinhlâna mi, ân thieng tak le thil inthienghaia mi chu fa thei a ta;

²³amiruokchu, demkaina nei a ni leiin, puonzâr bula manih, maichâm hnaia mani chu hung thei naw ni, ka hmun inthienghai sukpawrche rawi a tih; kei LALPA anni sukthiengtu chu ka ni si a,’ ti rawh,” tiin.

²⁴Chuongchun, Mosie chun Aron le a naupasalhai le Israel mipuihai po po kuoma chun a hril ta a.