Read Hmar LEVI DÂN 5 Bible Online

LEVI DÂN 5 - Hmar bible

LEVI DÂN 5

¹“Tukhawm a thil hmua manih, a thil hrieta manih hretu a ni a, inkhâmtirtu râwl a hriet khawma hril nuom lotu chun, a hril nuom nawna suola a rîtlona maw chu phur a tih.

²Tukhawma thil thiengnaw hrim hrim, ramsa thiengnaw ruong amanih, invâka invâk chi ran inthiengnaw ruong amanih hre lo khawmin lo themin hung pawrche ta sienla, thiemnaw chang a tih.

³Mihriem inthiengnawna ieng ang khawm, a thiengnawna hre lova a them pal khawmin, a hriet suok pha chun thiemnaw chang a tih.

⁴Tukhawma thil ṭha naw amanih, thil ṭha amanih thaw dinga, ieng dâwn loa ṭawng ân khâm zung zung chun, a hriet suok huna chun, ân khâm zung zungna ṭawngbau a ieng ienga khawm chun thiemnaw chang a tih.

⁵Hieng thil pakhata khawm hin thiemnaw a chang pha chun a suolna chu inpuong a ta;

⁶a thil suol thaw ta leia bawsiet inthâwina dingin, ran ruol laia mi berâmte amanih, kêl amanih suol inthâwinaa hmang dingin LALPA kuomah hung chawi a ta; thiempu chun a suol leia intlanna siempêk a tih.

⁷“A neiin berâmte chu a tlin naw ruok chun, LALPA kuoma inhlân dingin, a suol thaw ta leia bawsietna inthâwina dingin; vaṭhu pahni amanih, pârvate pahni amanih a hung chawi ding a nih; pakhat chu suol inthâwina dingin, pakhat chu pumrawhmang thilinhlân dingin.

⁸Thiempu kuoma chun hung chawi a ta; ama chun suol inthâwina ding chu inhlân hmasâng a ta, phel lovin a lu chu a rîngah her bawng a ta;

⁹suol inthâwina thisen chu maichâm panga chun tlâwmte thêng a ta; thisen la um po chu maichâm bula chun infar kangtir ding a nih; chu chu suol inthâwina a nih.

¹⁰A pakhat nâwk chu dân angin pumrawhmang thilinhlân dingin inhlân a ta, thiempu chun a thil suksuol ta chungchânga chun intlanna siempêk a ta, ngaidam nîng a tih.

¹¹Amiruokchu, a neiin vaṭhu pahni amanih, pârva te pahni amani khawm a tlin naw chun, a suol mana dingin a thilinhlânah suol inthâwina beiphit indîtak epha hmun sâwma ṭhea hmun khat hung chawi a ta; hriek a nâl ding a ni naw a, a chungah berâw khawm a sie ding a ni nawh, suol inthâwina a ni leiin.

¹²Thiempu kuoma chun hung chawi a ta, thiempu chun hrietzingna puola dingin a vei khat lâng a ta, maichâm chungah LALPA kuoma mei hmanga thilinhlân angin a râw ding a nih; chu chu suol inthâwina a nih.

¹³Chun, chuong thilhai a ieng ieng khawm a lo suksuol ta chungchângah intlanna siempêk a ta, ngaidam nîng a tih; a la um po chu fâkmi thilinhlân ang bawkin thiempu chanpuol ding nîng a tih,’ ti rawh,” tiin.

¹⁴LALPA chun Mosie a biek a,

¹⁵“Tukhawmin thil a suksuol a, LALPA thil inthienghai chunga a suol pal chun, a bawsiet inthâwina dingin, a ruol laia mi berâmchal demkailo, hmun inthieng shekel anga tangka shekel iemani zât hua ngai chu, LALPA kuomah a hung kei ding a nih; chu chu bawsiet inthâwina a nih.

¹⁶Thil inthieng chunga a lo sukdik nawna chu thung a ta, a hmun ngaa ṭhea hmun khat bel a ta, thiempu chu a pêk ding a nih; chun, thiempu chun bawsiet inthâwina berâmchal chun intlanna siempêk a ta, ngaidam nîng a tih.

¹⁷“Nangni laia tukhawmin LALPAIN thaw lo dinga thu a pêkhai thawin a lo suksuol chun, hriet naw leia a thaw khawm ni sien,thiemnaw chang ning a ta,a suksuol maw chu phur a tih.

¹⁸Berâm ruol laia mi berâmchal demkailo amanih,a tlukpui amanih, bawsiet inthâwina ding chun thiempu kuomah a hung kei ding a nih; chun, thiempu chun, hre lova a thaw pal chungchânga chun intlanna siempêk a ta, ngaidam nîng a tih.

¹⁹Chu chu bawsiet inthâwina a nih, LALPA hmaa thiemnaw chang a ni ngei a nih,” tiin.