Read Hmar LEVI DÂN 6 Bible Online

LEVI DÂN 6 - Hmar bible

LEVI DÂN 6

¹Chun, LALPA chun Mosie chu a biek a,

²“Tukhawma thil suksuolin, LALPA thu bawse ta sienla; sum inkawltir thu amanih, hlêp thu amanih, inrûk thu amania tuolbâwmhai hlêmin, mâni tuolbâwmhai lo nêksâwr ta sienla,

³annawleh, thil inhmang hmuin, chu thua chun khêl hrilin ṭawng inkhâm ta sienla, hieng thil po po a ieng ieng khawm hi a suksuol a,

⁴a thil suksuol leia thiemnaw a chang chun, a înrûk dâm, hlêma a thil lâk dâm, a kuoma sum inkawltira um dâm, thil inhmang a hmu dâm,

⁵khêla ṭawng a înkhâmna thil ieng khawm chu a thung nâwk ding a nih; a kim charin thung nâwk vawng a ta, a hmun ngaa ṭhea hmun khat chu a chuongin bel a tih; bâwsiet inthâwina ân hlân ni chun a neitu chu a pêk nâwk ding a nih.

⁶A bawsiet inthâwina dingin, berâm ruol laia mi, i ngaia bawsiet inthâwina dinga âwmtâwk, berâmchal demkailo LALPA ta dingin thiempu kuomah a hung kei ding a nih;

⁷chun, thiempu chun LALPA hmaah intlanna siempêk a ta, ngaidam nîng a tih, thiemnaw changna dinga thil a thaw taphawthai chungchânga chun,” tiin.

⁸LALPA chun Mosie a biek a,

⁹“Aron le a naupasalhai chu thu pe rawh. Hi hi pumrawhmang thilinhlân dân ding chu a nih. Pumrawhmang thilinhlân chu maichâm a chunga a râwnaa chun zânkhawvârin a zingkâr chen um a ta; chun, maichâm mei chu a hring zing ding a nih.

¹⁰Thiempu chun a puonzai inhmi silfên inbel a ta, a taksa inkhumna dingin a puonzai inhmi kekawr chu bun a ta; chun, maichâma pumrawhmang thilinhlân kâng vâmhai chu lâng a ta, maichâm sîra chun a sie ding a nih.

¹¹Chun, a silfên chu hlîp a ta, silfên dang inbel a ta, a vâmhai chu khawhnâwm tieng hmun faiah a fepui ding a nih.

¹²Maichâm chunga mei chu sukhring zing nîng a ta, a thi ding a ni nawh; chun, thiempu chun tûk tinin thing chu tîng a ta, pumrawhmang thilinhlân chu sie fel a ta, chutaka chun inremna thilinhlân thâuhai chu a raw ding a nih.

¹³Maichâma chun mei chu hring zing a ta, a thi ding a ni nawh.

¹⁴“Chun, hi hi fâkmi thilinhlân dân chu a nih: Aron naupasalhai chun maichâm bulah LALPA hmaah an inhlân ding a nih.

¹⁵Ama chun fâkmi thilinhlâna mi beiphit inditak vei khat le, chu fâkmi thilinhlân chunga hriek le berâw po po la suok a ta, LALPA ta dinga rim inhnik, hrietzingna dingin maichâma chun a râw ding a nih.

¹⁶Chun, lâk mahla chu Aron le a naupasalhai chun an fâk ding a nih; chu chu hmun inthienga chun chawl ṭhang lovin fâng an ta; intuokna puon in tuolah an fâk ding a nih.

¹⁷Chawl ṭhanga em ding a ni nawh. Mei hmanga ka thilinhlân an chanvo dinga ka thilpêk a nih; chu chu suol inthâwina le bawsiet inthâwina ang bawkin thil inthiengtak a nih.

¹⁸Aron thla pasal po pohai chun an fâk ding a nih. Chu chu LALPA ta dinga pumrawhmang thilinhlân chungchânga in thlahai chena kumkhawtluong dân nîng a ta; chu chu tâwk taphawt chu inthieng pei an tih,” tiin.

¹⁹Chun, LALPA chun Mosie a biek a,

²⁰“Hriek nâla an um nia Aron le a naupasalhaiin LALPA kuoma an inhlân ding thilinhlân chu hi hi a nih: fâkmi thilinhlân ding, beiphit inditak epha hmun sâwma ṭhea hmun khata mi, a zâtve zîngkâr, a zâtve zântieng.

²¹A zêuna thlêngdârah hriek pawla siem ding a nih. Ân chie pawl pha chun hung la lût i ta, a hlek te tein fâkmi thilinhlân chu LALPA ta dinga rim inhnik dingin în hlân ding a nih.

²²A naupasalhai laia mi a hnung thuoltu dinga hriek nâla um thiempu chun, kumkhaw dân dinga pêk a ni angin LALPA kuomah inhlân a ta; a rêng el chun rawhmang ding a nih.

²³Thiempuin fâkmi thilinhlân ân hlân taphawt chu râwhmang vawng ding a na: fâk dêr lo ding a nih,” tiin.

²⁴LALPA chun Mosie a biek a,

²⁵“Aron le a naupasalhai kuoma chun hril la: Hi hi suol inthâwina dân ding chu a nih. Pumrawhmang thilinhlân thatna hmuna chun suol inthâwina khawm chu LALPA hmaa that ding a nih. Chu chu thil inthieng tak a nih.

²⁶Suol inthâwina inhlântu thiempu chun fâng a ta; intuokna puon in tuolah, hmun inthiengah a fâk ding a nih.

²⁷Thil iengkhawm chu sa tâwk taphawt chu thil inthieng sie hran nîng a ta; chun, a thisen chu ieng puona khawm the kai a ni chun, a kaina taphawt chu hmun inthienga chun i sâwp ding a nih.

²⁸A suongna pil bêl chu sukkawi ding a na; dâr bêla suong a ni ruok chun nâwt faia intlêu fai ding a nih.

²⁹Thiempu sûngkuoa pasal taphawt chun chu chu an fâk ding a nih. Chu chu ân thieng tak a nih.

³⁰Suol inthâwina, a thisen, hmun inthienga intlanna siemna dinga intuokna puon ina hung lâk ruok chu fâk ding a ni naw a; râw el ding a nih.