Read Hmar LEVI DÂN 7 Bible Online

LEVI DÂN 7 - Hmar bible

LEVI DÂN 7

¹“Hi hi bawsietna inthâwina dân ding chu a nih: Thil inthieng tak a nih.

²Pumrawhmang thilinhlân an thatna hmuna chun bawsiet inthâwina khawm chu an that ding a nih; chun, a thisen chun maichâm chu an the vêl ding a nih.

³A thâu po po chu inhlân an ta; a mei thâu tak dâm, a sûng thâu dâm,

⁴a kalhai pahni le a tuomtu thâu, a diemnêma mi le a thin tuomtu duorda, a kalhai pum chun phawr a ta;

⁵thiempu chun LALPA kuoma mei hmanga thilinhlânin maichâm chunga chun a râw ding a nih; chu chu bawsiet inthâwina a nih.

⁶Thiempu sungkuoa pasal taphawt chun chu chu fâng an ta; hmun inthienga fâk ding a nih; chu chu thil inthieng tak a nih.

⁷Bawsiet inthâwina chu suol inthâwina ang bawk a na, dân angkhat a nih; chutaka intlanna siemtu thiempu chun, chu chu a nei ding a nih.

⁸Pumrawhmang thilinhlân inhlânpêktu thiempu ngei chun pumrawhmang thilinhlâna an înhlân vun chu a chang vawng ding a nih.

⁹Chun, a urnaa ur fâkmi thilinhlân taphawthai, a zêunaa zêu le thlênga zêu po pohai chu ân hlântu thiempu chanpuol ding a nih.

¹⁰Fâkmi thilinhlân po po chu hrieka hmet khawm, a ṭâwl khawm a dang ang bawkin Aron naupasalhaiin an insem tlâng ding a nih.

¹¹“Hi hi miin LALPA kuoma a înhlân ding, inremna thilinhlân inthâwina dân ding chu a nih:

¹²Lâwmthu hrilna dinga ân hlân chun, lâwmthu hril inthâwinaa chun hrieka hmet chawl ṭhanglo bei le, hrieka nâl chawl ṭhanglo beiphêk inphânhai le, hrieka hmet beiphit inditak inchie zawp ân hlân sa ding a nih.

¹³Lâwmthu hrilna dinga inremna thilinhlâna inthâwina ding chun chawl ṭhang bei ân hlân sa ding a nih.

¹⁴Chutaka mi chu thilinhlân tina mi LALPA kuoma thêna thilinhlân dingin pakhat seng inhlân a ta; inremna thilinhlân thisena thetu thiempu chanpuol ding a nih.

¹⁵Lâwmthu hrilna dinga inremna thilinhlân inthâwina sa chu, chu thilinhlân ân hlân ni ngei chun fâk zo ding a nih; zîngkâr chen iengkhawm a khêk ding a ni nawh.

¹⁶Amiruokchu, a thilinhlân inthâwina chu thutiem amanih, mâni nuomthua thilinhlân amanih a ni chun, ân thâwina ân hlân ni ngei chun fâk ding a nih; fâk mahla chu a zîng tûka fâk ding a nih;

¹⁷amiruokchu, inthâwina sa a ni thum ni chena la um ta rawp chu râw el ding a nih.

¹⁸A inremna thilinhlân inthâwina sa chu ni thum ni chena an fâk chun pawmpêk ni naw ni a, ân hlântu khawm chu inhlâna ngai ni naw bawk a tih; thil tirdakum nîng a ta, tukhawm a fa taphawt chun an khawhlona maw chu phur an tih.

¹⁹“Sa, thil inthiengnaw hrim hrim le intâwk chu fâk ding a ni naw a, râw el ding a nih. Sa chu ân thienghai po chun fa thei an ta,

²⁰inthienglo puma LALPA chanpuol inremna thilinhlân inthâwina sa fatu ruok chu, a chipuihai laia inthawka tuithlârin a um ding a nih.

²¹Tukhawma thil inthiengnaw hrim hrim, mi inthiengnaw amanih, ran inthiengnaw amanih, thil tirdakum pawrche hrim hrim a tâwk a, inremna thilinhlân inthâwina sa, LALPA chanpuol chu a fâk chun, ama chu a chipuihai laia inthawka tuithlârin a um ding a nih,” tiin.

²²LALPA chun Mosie a biek a,

²³“Israel mihai chu hril la: Sebâwng amanih, berâm amanih, kêl amani thâu chu in fâk ding a ni nawh.

²⁴Mânia thi thâu le sa ise thâu chu thil dang ienga khawm hmang thei nîng a ta, fâk ruok chu in fâk dêr ding a ni nawh.

²⁵Tukhawm LALPA kuoma mei hmanga thilinhlâna inhlân sa thâu fatu chu, a chipuihai laia inthawkin tuithlârin a um ding a nih.

²⁶In umna taphawta chun thisen hrim hrim, vate amanih, ramsa amanih thisen chu in fâk ding a ni nawh.

²⁷Tukhawm ni sienla, thisen fa hrim hrim chu, a chipuihai laia inthawkin tuithlârin a um ding a nih,” tiin.

²⁸LALPA chun Mosie a biek a,

²⁹“Israel mipuihai kuoma chun hril la: LALPA kuoma inremna thilinhlân inthâwina inhlân taphawt chun a thilinhlân chu LALPA kuomah a hung inhlân ding a nih; a inremna thilinhlânhai inthâwinaa inthawk chun,

³⁰ama kuthai ngeiin mei hmanga thil inhlânhai chu LALPA kuomah a hung chawi ding a na; a thâu chu a âwm pumin a hung lâk ding a nih, a âwm chu LALPA hmaa thên thilinhlâna thên a ni theina dingin.

³¹Thiempu chun a thâu chu maichâmah rawng a ta; a âwm ruok chu Aron le a naupasalhai chanpuol ding a nih.

³²A mal changtieng chu, i inremna thilinhlânhai inthâwinaa inthawka i thilinhlân dingin thiempu kuoma chun i pêk ding a nih;

³³Aron naupasalhai laia mi, inremna thilinhlânhaia thisen le thâu inhlântu chun, a mal changtieng chu ama chanpuol dingin a nei ding a nih.

³⁴A âwm an ithên le a mal an inhlân hlak chu, Israel mihai an inremna thilinhlân inthâwinahaia inthawkin ka lâkpêk a, Israel mihai kumkhaw thaw dân dingah thiempu Aron le a naupasalhai ka pêk tah a nih.

³⁵Hi hi a nih, Aron le a naupasalhai chanpuol dinga, LALPA kuoma mei hmanga thilinhlânhaia inthawka sie hran, anni chu thiempu sin thaw a, LALPA rawngbâwl dinga inhlân an nia inthawka an chanpuol ding chu;

³⁶anni chu hriek nâla an um niin, Israel mipuihaiin hi thil hi pe dingin LALPAIN thu a pêk tah a nih; hi hi an thlahai chena dinga kumkhaw thil phût chu a nih,” tiin.

³⁷Hi hi, pumrawhmang thilinhlân dâm, fâkmi thilinhlân dâm, suol thâwina thilinhlân dâm, bawsiet inthâwina thilinhlân dâm, inhlân inthiengna thilinhlân dâm, inremna thilinhlânhai dâm dinga,

³⁸Sinai thlalêrah, an thilinhlânhai chu, Israel mipuihai chun LALPA kuoma hung inhlân dinga thu a pêk nia, Sinai tlânga LALPAIN Mosie kuoma thu a pêk chu a nih.