Read Hmar JEREMIA 13 Bible Online

JEREMIA 13 - Hmar bible

JEREMIA 13

¹LALPA chun ka kuomah hieng hin a tih: “Fe la, puon zai inhmi hrên i ta dingin inchaw la, i kâwngah hrên la, tuia chun sukhu naw rawh,” a ta.

²Chuongchun, LALPA thu ang chun hrên chu kân châwk a, ka kâwnga chun ka hrên ta a.

³Chun, a vawi hninaah LALPA thu chu ka kuomah a hung tlung a;

⁴“I kâwnga um hrên închâwk kha la la, tho la, Euphrates vadunga chun fe la, chutaka chun lungpui kuoah va thup rawh,” tiin.

⁵Chuongchun, ka fe a, Euphrates vadung sîra chun ka thup ta a, LALPAIN thu a mi pêk ang tak chun.

⁶Chun, ni tam tak hnunga chun LALPA chun ka kuomah, “Tho la, Euphrates vadunga khan va fe la, chutaka inthawk chun, thup dinga thu ka pêk che, kha hrênpuon kha va la rawh,” a ta.

⁷Euphrates vadunga chun ka va fe a, ka cho a, ka thupna hmuna inthawk chun hrên chu ka lâk ta a; chun, ngai ta, hrên chu a lo inek ta a; iengakhawm ṭhangkai a ni ta naw a.

⁸Chun, LALPA thu chu ka kuomah a hung tlung a, LALPA chun hieng ang hin a tih:

⁹Hieng ang tak hin Juda chapona le, Jerusalem chapona nasatak chu suksieng ka tih.

¹⁰Hi hnam suol ka thu ngai nuom lova, an lungril ngarna anga fea, an rawng bâwl dinga pathien danghai chu zuia, anni chibai bûktuhai hi hi hrên ienga khawma ṭhangkai ta lo ang hi nîng an tih.

¹¹Hrênpuon chu mi kâwnga a kawp tlat angin, Juda sûngkuo po po le Israel sûngkuo po po chu keimaa kawp tlat dingin ka siem an nih, LALPA chun a tih: keia ta dinga mihai an ni a, hming an ni a, inpâkna an ni a, ropuina an ni theina dingin, nisienlakhawm, an ngai si naw a.

¹²Chuleiin, an kuoma chun hi thu hi hril i tih: LALPA, Israel Pathien chun hieng hin a tih: Savunpeng tin chu uoina suksip nîng a ta, chun, i kuoma chun, “Savunpeng tin chu uoina suksip nîng a tih, ti hi kan hriet naw a ni maw?” tîng an ta.

¹³Nang chun an kuoma chun, LALPA chun hieng hin a tih: Ngai ta u, hi ram hluotuhai hi, lalhai David lalṭhungpha chunga ṭhunghai le, thiempuhai le, zâwlneihai le, Jerusalem hluotuhai po po chu inruinain ka suksip ding a nih.

¹⁴Anni chu inbawtuotir ka ta, pahai le an naupasalhai ngei chu inbawtuong an tih, LALPA chun a tih; lunginsiet naw ning a, hla naw ning a, hmangaina khawm nei naw ning a, anni chu ka sukbohmang nawna dingin, iengkhawmin mi dâl naw ni.

¹⁵Ngai unla, in nahai daw ro; chapo naw ro, LALPA chun a hril ta si a.

¹⁶Tlâng inthimhai chunga in kehai chu ân sui hmain le, inthim ân umtir hma hin LALPA in Pathien chu chawimawina pe ro; chun, a var in zawng lai chun, ama chun thina hlimah ân changtir a, inthim nasatak el chu a siem ta a.

¹⁷Nisienlakhawm, in ngai naw chun, in chapona lei chun ka thla chu inrûkin ṭap a tih; LALPA berâm ruol chu sala man an ni tâk leiin ka mit chu rinum titakin ṭap a ta, mitthliin luong thlâng a tih.

¹⁸Lal kuoma le a nu kuoma chun hril la: “Inngaitlâwm unla, ṭhung ro, in lukâwmhai chu a hung inhnuoi ta a, in ropuina lallukhum ngei chu.

¹⁹Sim ram khawpuihai chu khârin an um ta a, a hawng ding tukhawm an um nawh; Juda chu a rêngin sala ṭhuoiin a um a: a rêng a ramin sala ṭhuoiin a um a nih,” tiin.

²⁰I mithai kha hang inlên la, hmâr tienga inthawka hunghai saw en ta, i berâm ruol, nanga kuoma pêka um, i berâm ruol mawitak el kha khâwlai am a um a?

²¹Nangma kal zawngin anni chu ân chûktir a nih ti hrein, i ruolhai chu i chungah luah a sie pha chun ieng am hril tâng i ta? Nuhmei nauhase nat tuor angin nang chu lungngaina chun a man ding che a ni nâwm a nih?

²²I lungril chun, “Hieng thilhai hi iengtiziea ka chunga hung tlung am a na?” i ti a ni thei a; i suolna tam êm lei chun i fênthuo chu hlîm a na, suolluina i tuok a nih.

²³Ethiopia mi chun a vun chu a thlengin, keitê khawma a zie chu a thleng thei am a nih? Thil ṭha naw thaw ngaia hmanghai hin thil ṭha chu in thaw ding am a nih?

²⁴Chuleiin, thlalêra thliin busi a lên hmang hlak angin anni chu sukdar ka tih.

²⁵Hi hi i chan tâwk, keima kuoma inthawka, i chan dinga ruot chu a nih; LALPA chun a tih; kei i mi theinghil ta a, thil dik lo chu i lo ring ta lei khan.

²⁶Chuleiin, kei khawma i fênthuo chu i hmai chunga chun hlîm ka ta, i înzapui chu inlang a tih.

²⁷Ramhnuoi muol chunghaia i châkna hurna, i în hrâmnahai, i uirenahai, i tirdakumnahai chu ka hmu a. Aw Jerusalem, i chung a va rik de! sukthieng i ni âwm si naw a, ieng chen am a la ni ding chu aw?